Tito 3 - Amazwi Yakwe Leza 2013

¹ Nena antu yako ukuti lyonsi yaiusya kutontela yakateeka na yao ali pa utunguluzi, kuyela nga nu kuiteyanya kucita visuma mu musango onsi.

² Uyanene yatavwangila umuntu umwi viipe, lelo yacita vya kuleta mutende nu kuyelezyanya. Nupya lyonsi yalinzile kufukila umuntu ali wensi.

³ Pano mpiti twali awelewele, asyayela nupya antu akaluvyanya. Twacisilwe uzya ku nsuna ni misango yonsi ya vintu vyakuizanzya. Twasumvile nsita zitu mu kucita vyalufyengo nga nu kuzuwilana. Antu yauze yatupasile nga naswe twayapasile.

⁴ Lelo lino luse nu kutemwa kwakwe Leza Katuula witu vyasokolwilwe,

⁵ wene watutuuzile. Citali apamulandu wa vicitwa visuma vino twacita, lelo apamulandu wa mizu yakwe umwisikulu acino watutuulile. Wacisile cii pa kutufula mu maka yakwe Mupasi Wamuzilo, wino uwatulenga kuvyalwa cipya cipya nu kutandika umi upya.

⁶ Leza watupongololwile Mupasi Wamuzilo nu kuluta muli Katuula witu Klistu Yesu.

⁷ Leza wacisile cii pakuti mu cikuku cakwe amuno tungacitwa kuya aololoke pa manso yakwe na kuti tukwate umi wape uno tukapaalila.

⁸ Muvwango uu uwa cumi. Nkulonda kuti walanda nu kukonkomezya vintu vii, pakuti yao ataila Leza yasakamale insita zyao mu kucita vintu visuma, ivyakwazwa umuntu wensi.

⁹ Lelo funtuka ku vikanza vyakutumpa, nu ku utantiko wa mazina ya vikolwe, kulemanila, nga nu kuntuvwana pali vino Masunde yakwe Mose yakasambilizya.

¹⁰ Muntu wino akapaatukanya auze ndi wamusoka nanti lili, lelo atuvwile, mumukane.

¹¹ Umanye ukuti umuntu wa musango uu umuvulungane, nga na maifyo yakwe yakamusinila ukuti wene waluvyanya.

Mazwi yakusyalikizya

¹² Lino ndatuma Alitema nanti Tikikasi kunuli, uce wezye na maka yako yonsi kwiza ku Nikopoli, pano nemo nati nelenganya kwikala kuku mu nsita ya pamwela.

¹³ Uce wezye na maka kwazwa Zenasi, nkonkotela ya Masunde nga na Apolo kutandika ulwendo lwao. Nupya uce usininkizye ukuti yapeelwa vyonsi vino yakulonda.

¹⁴ Antu itu yalinzile kusambilila kuomvya insita zyao mu kucita visuma. Yene yalinzile kucitila antu visuma yano alingine kwazwiwa. Lyene antu itu yatalikala mwa ukasu.

¹⁵ Onsi yano tuli nao yakumulamuka. Mutulamukile yacuza itu mu utailo. Cikuku ca Mwene ciye namwe mwensi.