Tito 1 - Amazwi Yakwe Leza 2013

¹ Kalata kufuma kuli ne Paulo, muomvi wakwe Leza nupya mutumwa wakwe Yesu Klistu. Nasolwilwe nu kutumwa ku kwazwa antu yakwe Leza asololwe kuti njatungulule ku utailo, yamanye cumi cingayalanga vino yangatumikila Leza.

² Utailo uwo nga nu kumanya vikafuma mu upaalilo witu uwa kuya nu umi wape. Leza wino asitumpoka uwatulaya umi kwene uu, kufuma lino kutandika kwa nsita kutali kuyeko.

³ Lino insita yafisile Leza, Katuula witu, wasokolwile cii ku antu kupitila mwi landwe lyakwe. Leza uwandasike mulimo uu. Nani nkakosola pa kuyela ilamulo lyakwe.

⁴ Nkulembela we Tito. Wemo ukoline wa mwanane inkonko, pano wewe nani twaya mu utailo onga. Cikuku nu mutende vifume kuli Leza Tata na Klistu Yesu Katuula witu viye kunuli.

Mulimo uno Tito waomvile mu Kulete

⁵ Nakusile mu Kulete, pakuti ulungike vintu ivyali nu kulungikwa. Nupya kuti usolole aikolo akutungulula iuvi muli cila musumba. Iusya vino nakutungulwile. Natile

⁶ uwikolo wino akatungulula iuvi atalinzile kuya uwa mpwelo mbi. Wene alinzile kukwata muci wenga, nupya ana yakwe yalinzile kuya ataila. Yene yatalinzile kuya ni mpwelo ya ononyi nanti kuya autizi.

⁷ Wikolo wino akatungulula iuvi wene akaangalila mulimo wakwe Leza. Caleka wene atalinzile kuya uwa mpwelo mbi. Wene atalinzile kuya akaitumika nanti musepukilwe, nanti mukolesi nanti uwalwete nanti uwalwiswa lwa mpiya.

⁸ Wene alinzile kuya kacita wa milimo ya luse, kapokelela wa enyi, nupya uwatemwa kucita visuma. Wene alinzile kuikanya, nu kucita vilungame, alinzile kuya uwamuzilo nupya musundike.

⁹ Wene alinzile kulemelela na maka kwi landwe lino lingatailwa nupya lilingine nu usambilizyo wa cumi. Mu musango uu, amuno usambilizyo wao wa cumi ungakomelezya yauze nupya amuno yene yangasokolola kuluvyanya kwakwe yayo akakana usambilizyo kwene uu.

¹⁰ Pano kwaya antu aingi yacisanguka, maka maka yao asenusi kufuma ku mipepele ya Ciyuda, nupya yano yakasomba antu yauze ku mvwango yao yaula mano.

¹¹ Cili icalondekwa kulesya mvwango yao, pano yene yakuvulunganya amu ng'anda zyonsi apa kusambilizya vintu vino yatalinzile kusambilizya. Yene yakucita vya nsonyi pamulandu wa kulonda impiya.

¹² Mwina Kulete umwisikulu, wenga uwa muli yakasema yao, uwavwanzile cumi lino wavwanzile ati, “Aina Kulete yene lyonsi antumpu. Yene yakoline wa vilyanyi. Yene yalilikisya nupya akasu.”

¹³ Pamulandu kwene uu, wemo ulinzile kuyanenola cuze, pakuti utailo wao uye uwa mpomvu.

¹⁴ Alino lyene yatalemelela ku kutaila tulai twa uwelewele utwa Ciyuda nga nu ku masunde ya antu. Masunde yaa yakapangwa na antu yano asyayela icumi.

¹⁵ Vintu vyonsi ivisanguluke kuli yao akwata myenzo isanguluke. Lelo kusi cimwi icisanguluke kuli yao akowela nupya atataila. Yene yakwata kwelengenya kukowele ni myenzo yao yakowela.

¹⁶ Yene yakati yamanya Leza, lelo vicitwa vyao vikayasinila ukuti mu cumi yatamumanya. Yene yaya nu lupato nupya yasyayela Leza. Yene yasi antu ampomvu angacita cisuma cili consi.