Oseya 6 - Amazwi Yakwe Leza 2013

Aina Izlaeli aula kuzenzuka

¹ Antu yakuvwanga yati, “Tuini, tuwelele kuli Yawe. Wene watatulepola mu tupimfya, lelo amatupozya. Wene watatucisa, lelo amatunyepela ivilonda.

² Umu manda yaili nanti yatatu wene alatupuputula, nga naswe tulaya nu umi pa manso yakwe.

³ Lekini twezye ukumanya Yawe. Lekini tutukusye ukumumanya. Cumi kwene aliza kunotuli wa kutunka kwi lanzi, aliza kunotuli wa mvula ya macesya, ni yapa mooko ino ikatontekela umusili.”

⁴ Lelo Yawe akuti, “Mwe aluko lwakwe Efulemu, uzye icani cino namamucitila? Namwe mwe aluko lwakwe Yuda, uzye icani cino namamucitila? Ukutemwa kwinu kuli wakwe kungwi, wino akasalangana umu katondo, kukoline nu lumi ulukakuntika katondotondo.

⁵ Acino nemo namutumile yakasema yane, kuti yize yamunene ilandwe lyane lya uputuzi nu kononwa. Cino nkasi kuti mucite cili apaswe nupya icangupale ukuuvwa.

⁶ Cumi kwene nemo nkalonda ukutemwa ukwa muntaputuka, ukuluta ukumpela sile impolelwa, Nemo nkalonda kuti antu yane yamanye nene, ukuluta ukuntuula amawila yakoca.

⁷ “Lelo antu yayo yavuna upangano wane ndi vino Adamu wacisile. Kuku kwene, yene yatali acumi kunondi.

⁸ Gileadi umusumba wa antu akacita iviipe, yene yikalila sile ukukomana epela.

⁹ Ndi vino azanzi yakateyamila umuntu umwi, vivyo kwene avino yasimapepo yakacita kuti yakome antu umu museo uwaku Syekemu. Cumi kwene yene yakakoma antu uku mufulo sile.

¹⁰ Natindola icintu cawinyi pakasi ka ina Izlaeli. Aluko lwakwe Efulemu yasendwa mu uzelele. Na aluko lwakwe Izlaeli yaikowezya apa kulongozya.

¹¹ “Mwe aluko lwakwe Yuda, namwe kwene ndamuvunuka, “pa vintu vino mukucita.”