Oseya 4 - Amazwi Yakwe Leza 2013

Yawe wapeela aina Izlaeli umulandu

¹ Mwe ina Izlaeli, uvwini amazwi yakwe Yawe, pamulandu wakuti wene akumupeela umulandu, mwe antu mwemuno mwikala umu mpanga ii. Wene akumupeela umulandu wakuti, mu mpanga ii musi ucumi nanti ukutemwa, nga na antu yatazumila ukuti nene indi Leza.

² Muli sile ukutipwila, ukutumpoka, utazi wa katwe, ukwiya nu kulongozya. Antu yakulunduluka ukwifya, nupya yakalukukomana.

³ Pamulandu wakwe cii mu mpanga mulaya icilala, nga na antu yonsi aikala mwenemo yalacula, kumwi ni nyama zya mpanga kwene, ni vyunyi vyamu lwelele. Ni nswi kwene zyamuli yemba zilafwa.

⁴ Yawe akuti, “Lelo mutaleka umuntu ali wensi asiike umulandu, ali wensi wakupeela umuze umulandu, pano umulandu uli pakasi kane nga namwe yasimapepo.

⁵ Mwemo mukaluvyanya umusanya nu usiku, nga na yakasema nayo kwene yakacita cili cimwi kwene, caleka ndonona nyoko Izlaeli.

⁶ Antu yane yakononeka pamulandu wakuntamanya nene. Mwe yasimapepo mwakana ukusambilila vyapali nene, acino nani kwene ndakana ana inu yataya yasimapepo.

⁷ “Lino yasimapepo yavulilako, nu kwifya kwao kunondi ikuvulilako. Acino ndasangula ucindami wao kuti uye umuzewanya.

⁸ Yene yakaya akama ukupitila mu kwifya kwa antu yane, nupya yakalonda ukuti antu yayo yalukulunda penepo ukwifya.

⁹ Acino yasimapepo yayo ndayapezya ndi vivi kwene vino ndapezya antu. Ndayavunuka pamulandu wa miyele yao iipe nga nu kuyalambula pa milimo yao iyo.

¹⁰ “Yene yalalya lelo ukwaula ukwikuta. Yalacita ulenzyo, lelo yatalasanduluka, pamulandu wakuti yene yafutatila Yawe, kuti yalondele tuleza tuuze.”

Yawe wasausya upefi wa inamasi

¹¹ Yawe akuti, “Waini wampiti nanti umupya kwene, wene akaonona amano.

¹² Antu yane yakalonda amano ku kaluwi akawaze ku cimuti, nga umuti iuyanena vino yakasi ukumanya. Mupasi wa ulenzyo ukayaponzya, caleka apakusya Leza wao, lyene yasi acumi kunoli.

¹³ Yene yakapelela impolelwa zyao apa myamba papela, nu kufutumula ubani apa tulundu, umwisika ya miti imioko, imyovu nga ni miti iyaanza imisambo, mumo muno icisao caiko icisuma. “Caleka ana inu anaci yakucita uzelele na yanyokovyala yakucita ulenzyo.

¹⁴ Lelo ntalavunuka ana inu anaci pamulandu wa uzelele wao, ntalavunuka yanyokovyala pamulandu wa kulongozya kwao. Pano mwe onsi namwe mukapita na yacizelele, nu kupeela impolelwa pali pamwi na yacizelele aku ncende yakupepelapo. Antu aulilwa amano yalononeka.

¹⁵ “Nanti angala aina Izlaeli yakalongozya, lelo antu aku Yuda yataya nu mulandu ndi uo. Yatezya ukuya ku kupepa ku Giligali nanti ku Beti Aveni. Nupya yatezya ukulapa nu mulapo ala yakuti, ‘Umwi zina lyakwe Yawe waumi!’

¹⁶ Aina Izlaeli yakoma imyenzo, wa ana ya ng'ombe. Uzye lyene Yawe angayimula uli ndi vino akalisya ana ya mfwele mu nyika?

¹⁷ “Antu aku Efulemu yakonelela ku kupepa utuluwi, yatini sile!

¹⁸ Pacisila cakumwa waini umuvule, yene yakazangila mu kucita uzelele, ala yakulukisya ukuzewana ukuluta umucinzi.

¹⁹ Yene yalafumiwapo ungati icintu cino casendwa na nkungulupya, nga yaluvwa ni nsonyi apamulandu wa mpolelwa zyao zya inamasi.