Oseya 2 - Amazwi Yakwe Leza 2013

¹ Pamulandu kwene uu unene aina Izlaeli uti, “Mwemwe antu yakwe Yawe,” nupya uyanene uti, “Yawe wamutemwa,”

Aina Izlaeli yakoline nu mwanaci asi mutailwe

² “Kalipila nyoko, si ule umukalipile, pano wene asi umuci wane, nga nani insi iya. Mu mupapate kuti ate uzelele, nga nu kuntatailwa.

³ Ndi cakuti atacisile cico, ale lyene ndamuzula, pakuti aikale tupu ndi vino wali lino wavilwe. Ndaleka aye wa lwanga, nupya alaya wa musili uumalale, nga ndamukoma ku lusala.

⁴ Ntalaya na mizu ku ana yakwe, pamulandu wakuti yene ana amu uzelele.

⁵ Nyina nawe acizelele asi na nsonyi. Wene wayaviile mu kucita vyansonyi. Wavwanzile ati, ‘Ndalondelela akambwe yane yayo akampeela icakulya na manzi, na pamba, ni nsalu itelepelele, na mafuta ya miolivi nga na waini.’ ”

⁶ Caleka nemo ndasaka inzila yakwe ni myunga. Nupya ndamukuulilila icimpinda, kuti nupya atakapite umu nzila zyakwe kwene.

⁷ Wene alasimwilila akambwe yakwe, lelo atalayazana. Afuma akuyalondalonda, lelo ukwaula kuyazana. Lyene alavwanga ati, “Ndaswilila ku wane wilya ndi vino nacisile ilyankolelo, pano apa nsita ilya natenzi ningo lino nali na aliwe, ukuluta vino ntenzi pali ndakai.

⁸ Wene atamanyile ukuti anene nkamupeela ingano, waini umupya nga na mafuta. Wene atamanyile ukuti anene nkamupeela siluva na zaabu umuvule wakwe cimwi, vivyo vino antu yayo yakapangila amaunkolanya yakwe Baali.

⁹ Caleka ndamupoka ingano zyane apa nsita ya uzombozi nga na waini wane apa nsita yakufena amatingi. Ndamupoka pamba wane nga ni nsalu itelepelele vivyo vino wali nu kuzwala.

¹⁰ Caleka ndakai namamusya tupu pa manso ya akambwe yakwe. Kusi umuntu nanti wenga alamufumya mu makasa yane.

¹¹ Namalesyanya ukuzevya kwakwe konsi pyu, ukwa vimulo vya cila mwaka, nu kwa ndoleko ya mwezi.

¹² Ndonona imiti yakwe ya miolivi ni misamvu kwene iyo ino wene wavwanzile ukuti, ali malipilo yano akambwe yakwe yamulipa. Ndaisenula iye imisitu, nga inyama zya mpanga zilailya kuku kwene.

¹³ Ndamuvunuka pamulandu wakuti wene ocile ubani kuli Tubaali mu manda kwene yalya auzevyo. Wene waiyemvizye ni mbalaminwe nga ni viyembelo vya mutengo ukulu cuze, nga alondelela akambwe yakwe. Lelo nemo atanjiwisye, awe. Avino Yawe wavwanga.

¹⁴ Caleka, namalyombeleka umwanaci wiyo, namapita nawe ku lwanga nu kulanda nawe mu mazwi amutembo.

¹⁵ Kuku kwene akuno ndamuwezezya vyalo vyakwe vya matingi. Ndasenula Cifoloma ca Ntazi kuti ciye impongolo ya upaalilo. Nga kuku kwene akuno wene alazumila kunondi ndi vino wazumile lilya lino wali umwance, lino wene wafumile mu Eguputo.

¹⁶ Mu wanda ulya apakungama ulangama uti, ‘Wane.’ Utalatala ungame uti, ‘Baali wane.’ Kuu kuli kulanda kwakwe Yawe.

¹⁷ Ndamulesya kuti atakatale aezye ukulumbula amazina yakwe Tubaali nupya. Endi, antu yatalatala yame apa mazina yayo.

¹⁸ Mu wanda ulya ndacita upangano ni nyama zya mpanga, ni vyunyi vyamu lwelele, nga ni viumbwa ivikasela pansi, kuti vitakacitile antu yane iviipe. Nupya ndasisya ulapwa, lupanga, kumwi ni vyanzo vyuze vyonsi vya nkondo, nga nu kuvisisya umu mpanga iyo, kuti yene yikale umi wa mutende.

¹⁹ We Izlaeli ndakutaisya kuti uce uye umuci wane mpaka umuyayaya. Ndakutaisya mu ulungami, mu wololoke, nu mu lukundo nga nu luse.

²⁰ Ndakutaisya muli ucumi, nga nawe ulamanya ukuti nene indi Yawe.”

²¹ Yawe wavwanga wati, “Mu wanda ulya ndaasuka amapepo ya antu yane aina Izlaeli, ni mvula ilatonya pa mpanga ya pano pansi.

²² Umusili nao ulapela uzombozi wa ngano, waini mupya na mafuta, amatingi nga ni miolivi.

²³ Nemwisikulu ndiika antu yane aina Izlaeli mu mpanga ilya kuti yaye akwane. Ndalanga ulukundo kuli wiyo akaamwa ukuti ‘Asi mukundwe wane.’ Antu yano yakaamwa ukuti ‘Yasi antu yane,’ ndayanena inti, ‘Mwemwe antu yane.’ ”