Oseya 14 - Amazwi Yakwe Leza 2013

Oseya wapapatila aina Izlaeli

¹ Mwe ina Izlaeli welini kuli Yawe, Leza winu, pano mwemo mwapona apamulandu wa maifyo inu.

² Welini kuli Yawe, nu kumulenga muti, “Utwelele amaifyo itu yonsi. Uuvwe ni ipepo litu nga naswe tumakulumbanyanga.

³ Aina Asilya yatangatutuula, ni mfwalasi zya nkondo zitangatucingilila. Vino twapanga uku makasa itu tutalatala twame tuti, ‘Leza witu,’ pano wewe waya na mizu ku ana asyale.”

Yawe walaya umi upya ku ina Izlaeli

⁴ Yawe akuti, “Ndawezya antu yane kunondi, ndayatemwa nu mwenzo wane onsi, pano natinta ukuyasokela.

⁵ Ndaya wa mutonsi ku antu yane aina Izlaeli. Yene yalawalula wa maluwa. Yene yaliika imisisi apa zike wa mukelide waku Lebanoni.

⁶ Imisambo yao iteku ilavunguluka, Yalayemba wa miti ya miolivi, Yalanunkila wa mukelide waku Lebanoni.

⁷ Nupya kwene aina Izlaeli yalazina munondi. Yene yalakula ningo wa mbezu zya ngano, Yalawalula nu kuseeka wa mutingi. Yalalumbuka wakwe waini waku Lebanoni.

⁸ Uzye nupya aina Izlaeli yalacita cani nu tuluwi? Anene ndaasuka amapepo yao nu kuyasakamala. Nemo indi wa mulemo umu paini uulembe lyonsi. Nene ndi ntulo ya upolelelo wao onsi.”

Amazwi akumalila

⁹ Wiyo wino akweti amano auvwikisye ivintu vii. Wiyo wino angiluka, amanyikisye. Pano inzila zyakwe Yawe izya ololoke, nupya mukapita yayo akacita vyaololoke, lelo yacisanguka yakapumeka mwenemo.