Oseya 13 - Amazwi Yakwe Leza 2013

Kupingulwa kwakwe Izlaeli kwakusyalikizya

¹ Uku mpiti lino aluko lwakwe Efulemu yavwanzile, imitundu yuze ya ina Izlaeli yuvwile intete. Yene yacindike aluko lwakwe Efulemu. Lelo antu yifizye apa kupepa Baali, nga yavunwikwe pa kucita cico.

² Na ndakai kwene yacili yakutwalilila ukwifya. Yakaipangila utuluwi twakwe siluva, amaunkolanya ya vyela yano yapangwa ningo, yano antu yetetwile nu kupanga na makasa yao. Lyene yavwanga yati, “Pelini impolelwa kunoyali, tonsolini utuluwi tuu utwaya mu musango wakwe yacipambasi.”

³ Acino antu yaa yalakolana na kungwi, wino akasalangana umu katondo, yalakolana nu lumi ulukakuntika katondotondo.

⁴ Yawe wavwanga wati, “Nene indi Yawe Leza winu wiyo uwamutungulwile ukufuma mu Eguputo. Mutaya na Leza muze suka sile nene. Nene ndi Katuula winu, nenga mpo.

⁵ Namusunzile mu mpanga iyumalale, umu lwanga mu cipuki.

⁶ Lelo lino mwingile umu mpanga ilya isuma, mutuliilwe cimwi nupya mwikwite, nga lyene muya ni cilumba munjilila.

⁷ Acino ndamuzanza wakwe cisama. Ndamuteyamila umu mbali ya nzila ndi vino inangu ikacita.

⁸ Ndamuzanza ndi vino iculi cikacita, cico icaticiponzya ana yakweco. Nupya ndamulepola. Ndamulya papo kwene, ndi vino cisama akacita, nu kumusantola mu tupimfya ndi vino cilyanyi camu mpanga cikacita.

⁹ “Ndonona mwe ina Izlaeli! Uzye lyene aweni angamwazwa?

¹⁰ Mwalenzile ukupelwa umwene ni ntunguluzi, lelo yene yangatuula uli uluko?

¹¹ Mu ukali wane namupiile yamwene, nu mu cipyu cane imupoka nu kuyasenda.

¹² Iifyo nu mulandu wa ina Izlaeli vyalembwa mu lupapulo, nga ulupapulo lulo lwasungwa ningo.

¹³ Wene akunyunguluka wa mwanaci wino ali pipi nu kulela. Izlaeli wapelwa insita nayuze yakuya umumi. Lelo wene iciwelewele sana, cakuti aposiwa nu kumanya cico, wa mwana akanya akali pipi nu kuloleka. Lelo lino insita yakako yakuvyalwa yapalama, kene katakasi ukufuma mu ndilwa.

¹⁴ “Ntalatuula antu yaa ukufuma kuzimo, nanti ku maka ya mfwa. We mfwa, uzye vilumbelo vyako vili kwi? We lindi, uzye uononesi wako uli kwi? Ntalaya ni nkunkunsi pa antu yaa.

¹⁵ Nanti angala aina Izlaeli yakukula ningo wa vikona, ndatuma umuza ukaye waku kayeya, uno ulafuma mu lwanga nu kwiza kamya utufukoka kumwi ni vifula vya manzi. Anisi yalonona icuma cakwe ca mutengo ukome.

¹⁶ Samaliya alinzile kuvunukwa, pamulandu wakuti yasangukila Leza wao. Aikazi ya mwenemo yalasendwa umu nkondo, ana yanono yalapololwa apa musili, na anaci asenda indilwa yalatumbulwa.”