Oseya 12 - Amazwi Yakwe Leza 2013

¹ Vyonsi vino Aluko lwakwe Efulemu yakacita ukutandikila akatondo mpaka usiku ivyasilesile, nupya vikaonona. Ucenjezi ni vicitwa vya usomvi vikusanduluka pakasi kao. Yene yakapangana na ina Asilya nu kucita uculuzi na ina Eguputo.

² Yawe akweti umulandu wakupeela aluko lwakwe Yuda. Wene alavunuka amu mutundu wakwe Yakobo pamulandu wa miyele yao, alayalambula ukulingana ni milimo yao iipe.

³ Walanga acili mu ndilwa yakwe nyina, Yakobo wapilikisyinye nu mwina, nga lino wakuzile alwisyanya na Leza.

⁴ Yakobo walwisyanyizye nu mungeli nga amucimvya. Walizile nu kulenga uwazwilizyo kunoli. Leza wamukomenkinye ku Betele, nga alandana nawe kuku kwene.

⁵ Wikwene ali Yawe, Leza Wamaka yonsi. Izina lyakwe lya kumupepelamo a Yawe.

⁶ Lelo mwe amu mupanda wakwe Yakobo, sintililini muli Leza nu kuwela kunoli. Mwatemwana nu kucita vya ulungi, muye acumi kunoli nu kuteeka imyenzo insita zyonsi.

Ukulanda navyuze vya uputuzi

⁷ Yawe akuti, “Aina Izlaeli yakoline na aculuzi aucenjezi yano yakaomvya inteko zya ucenjezi. Yene yatemwa ukuliila antu mu umfisolo.

⁸ Aluko lwakwe Efulemu yakaitutumula yati, ‘Endi, sweswe yakama, twatitukwata icuma civule, kusi umwi wino angatupeela umulandu wakukwila icuma mu ucenjezi.’

⁹ Lelo nemo nene indi Yawe Leza winu, wiyo uwamufumizye mu Eguputo. Ndalenga kuti mwikale mu mataalu, ndi vino cali mu manda ya kuzevya vimulo vinu.

¹⁰ Navwanzile kuli yakasema, njapela ni vilolwa ivingi nu kuyanena imilumbe kupitila muno vili.

¹¹ “Lelo antu yakupepa utuluwi ku Gileadi. Yayo akapepa utuluwi tuto yalafwa. Yene yakapela impolelwa uku Giligali, lelo utuvuwa twao kuku tulaongololwa tuye wa mutumba wa mawe umu musonso.

¹² Yakobo utukile ku mpanga ya Alamu. Izlaeli waile alembwa incito kuko kwene kuti asake. Wacemanga imfwele kuti atwale mangu wiyo.

¹³ Apa kufumya aina Izlaeli mu Eguputo Yawe waomvizye kasema. Nga wayasunganga kupitila muli kasema kwene wiyo.

¹⁴ Lelo aluko lwakwe Efulemu yalenzile kuti ukali wakwe Yawe ufulume, acino yalinzile ukufwa pamulandu wa kwifya kwao. Umwene wao alayavunuka pa vicitwa vyao vyamulenzile insonyi.”