Oseya 10 - Amazwi Yakwe Leza 2013

Kasema walanda pali Izlaeli

¹ Aina Izlaeli yakoline wa mutingi utambilile uno ukaseeka iviseekwa ivivule. Lino cuma cao casanduluka, nayo yakuula utuvuwa natuze. Lino impanga yao yaya nu longo, nayo yalundulula ukuyemvya vipilala vyao vya kupepelapo.

² Myenzo yao iyausomvi. Ndakai yalinzile kuvunukwa pamulandu wa maifyo yao. Yawe alawisya utuvuwa twao nu konona vipilala vyao vya kupepelapo.

³ Alino lyene yalavwanga yati, “Swemo tutakweti umwene pamulandu wakuti tutakweti icoopo kuli Yawe. Lelo nanti angala twakweti umwene uzye wene angatucitila cani?”

⁴ Yamwene yayo yakalaya amaila aingi, nu kucita imilapo yaufi nu kupangana vipangano vyasilesile. Caleka ulungi wati usanguka ulufyengo lulo luno lukukula kwati ivikona iviipisye mu calo.

⁵ Antu aikala mu musumba wa Samaliya yaluvwa intete, nga yalalosya ukononwa kwa unkolanya wa mwana wa ng'ombe, waku Beti Aveni. Yene apali pamwi na yasimapepo yakweo yaya yalalosya leza wao wiyo, pamulandu wakuti ucindami wakwe onsi wasendwa.

⁶ Endi, unkolanya uo ulasendwa ku Asilya, kuti ukapelwe uwila ku mwene mukulu wakweneko. Aluko lwakwe Efulemu yalazewana. Aina Izlaeli yaluvwa insonyi pamulandu wa kulondela umpandamano wauko uwaufi.

⁷ Aina Samaliya kumwi nu mwene wao yalasendwa kuku ukutali ungati akamuti kano kakwelela apa manzi.

⁸ Ncende zyakupepelapo tuleza twaufi, utwalenga kuti aina Izlaeli yifye, zilononwa. Imyunga na yakasokopyo vilamela nu kukula apa tuvuwa twao. Antu yalanena imyamba iyo yati, “Tufisini!” Yalanena utulundu yati, “Tufupilizini!”

⁹ Yawe akuti, “Aina Izlaeli yatali yate ukwifya kunondi, ukutandikila sile mu manda yano yifizye uku Gibeya. Ali cino inkondo ilayazana uku Gibeya kwene kuko.

¹⁰ Lino nkasi ukuvunuka antu aipe yaa, ndawela nu kwiza yavunuka. Antu amu mitundu yuze yalumana akapi nu kuyakatukila, nga nayo yalavunukwa apa uyi wao.

¹¹ Uku mpiti aluko lwakwe Efulemu yali wa ndama ino yatonsya ningo iyakulimila, nupya ino yatemwa ukupuula ingano. Acino ndakai namaizwika iyoko umu nsingo yakweyo iyembe, kuti iombe umulimo ukome. Nkasi kuti Yuda atucike, Yakobo nawe aume amazela.

¹² Muitandile uololoke, nga mulazombola upolelelo uwa kutemwa kwane ukwa muntaputuka. Umini mazela mwi sala linu pano insita yakulondalonda Yawe yatifika. Mwalukulonda Yawe mpaka ace awele ku kwiza mupongolwela upolelelo.

¹³ Lelo mwemo mwakomile ukakasi, nu kuzombola inkota. Mwalya iviseekwa ukufuma mu ntumpu zinu. Pamulandu wakuti mwasintilile mu maka inu, nu mu wingi wa vita vinu,

¹⁴ anisi inu yalamukatusizya inkondo. Amalinga inu yonsi yalononwa ndi vino cali apa wanda wa nkondo lino umwene Syalamani ononyile umusumba wa Beti Alibele. Wene walenzile ukuti yamangu kumwi na ana yao yalyatolwe.

¹⁵ Mu musango uli umwi kwene avino vilamucitikila mwe ina Betele, pamulandu wa ukakasi winu ukulu. Lilyo kwene lino inkondo ilatandika, umwene waku Izlaeli nawe alakomwa.”