Nyimbo zya ndosya 3 - Amazwi Yakwe Leza 2013

Kuvunukwa, kuzenzuka, nu upaalilo

¹ Anene namanya vino ukuvunukwa na Leza kwaya.

² Wansunkilizye nu kundenga mpite mu mfizi ikome.

³ Alino atandika ukuntimbola lili lili ukwaula nu kuntezela foo.

⁴ Ali pakwizansya amafupa yatupu, ala watankontola amafupa.

⁵ Wene wanjalile umu ng'anda yaminyololo, mumo umwaya amalanda nu kulilizika.

⁶ Wampatikizye ukwikala mumu kwene umu mfinzi ungati lyene umuntu wilya uwafwile mpiti.

⁷ Wene wanzingulwisye ilinga lilyo ilyakuti nemo naposiwe ukufuma mwenemo, ala watanyepelela ni minyololo.

⁸ Nga nalino napunda ntulwe, Leza wene kusi kusumba kweneko na mano.

⁹ Nkupempezyoka na pakupita, amawe yakwi linga yatiyancilikila inzila.

¹⁰ Wene watanteyamila wa cilyanyi cinsekete, wamvwangatila wakwe cisama.

¹¹ Watanzinganya nu kumfumizya ukunzi mu museo, waya wansanyola nga ansya na vivyo kwene pambiliwili.

¹² Wene waliwakana ulapwa wakwe nga ansonta ni nceto kuti nje candamali.

¹³ Watandasa inceto umu mwili wane, zino walakufumya mu nyambi yakwe.

¹⁴ Natinsanguka icintu cakuseka ku muntu ali wensi, nene mpundililwa akasanya konsi ku mitundu yonsi.

¹⁵ Watantunkizya ivinkolwankolwa nu kumwesya ivilule.

¹⁶ Watansimpika usyu wane pansi nu kunkululula amino apa nsakalawe.

¹⁷ Ntange niusye nu usuma wa mutende vino waya, nanti vino ukwikala ku matwi cele kwaya kumwi ni nsansa.

¹⁸ Ali cino nemo nkuvwangila inti, “Awe cumi nemo lwatilusila. Nanti sile ukutaila muli Leza, nemo kwatikusila.”

¹⁹ Akula nelenganya vino nkucula na pali vino nkuzeuluka, awe cumi nu ku mwenzo kuleta umuselu cakuti nalonda nu kuluka.

²⁰ Nkaelenganya icintu cico lyonsi, nga naco cikantembola.

²¹ Lelo akula niusya icintu cii conga cene icindetela upaalilo:

²² Ulukundo lwakwe Yawe lusisila. Amizu yakwe amuntaputuka.

²³ Muno amanda yala yacela wene akalanga cipya cipya ulukundo na mizu, pano wene uwacumi insita zyonsi.

²⁴ Yawe ali cuma sile cino nakwata. Acino nemo namapaalilanga munoli.

²⁵ Yawe umusuma kuli yonsi yano yamutaila.

²⁶ Fwandi cazipa wakwe cimwi ukuteeka imyenzo lino tukulolela, lilyo lino tukulolela kuti Yawe aliwe atutuule.

²⁷ Ala icisuma wakwe cimwi ukuteeka imyenzo ukutandikila sile uku wance witu.

²⁸ Lino Yawe watuletela ucuzi umwi, twatala itwikala swenga nu kukutumalilapo pamulandu wa kuteeka umwenzo.

²⁹ Tutailizyanya foo pano limwi ukwinamika umutwe pansi kungaleta utailo.

³⁰ Nanti tungapumwa uli tutukwe ni ntusi, tulinzile twavipokelela sile.

³¹ Pano kwene Yawe wakwatisya uluse nupya atalatala atukanole lyonsi foo.

³² Nanti angala limwi atukalipile, wene akatutezela pano watukwatila uluse, nalo pasi paukulu.

³³ Pano asi umweneco uwatandika ukutucuzya, nanti ukutuletela amalanda, awe.

³⁴ Wene asisansamukila nanti panono umu kwilikizya umuntu mu ng'anda ya minyololo. Leza Wapapelapela asilonda vivyo.

³⁵ Ukukanapela insambu ku muntu zino Leza Wapapelapela wamupeela, nako kwene asilonda.

³⁶ Ukufyenga umuntu umu cilye ca milandu, nako kwene asilonda, awe.

³⁷ Uzye aweni angalandapo cimwi nu kucitika cicitike, ndi cakuti Umwene aliwe atakasi?

³⁸ Uzye asi api lamulo lyakwe Leza Wapapelapela pano ivisuma ni viipe vikacitika?

³⁹ Uzye apacani cino tungailizyanyizizya lino yatuvunuka apa kwifya kwitu, lino tucili apuma?

⁴⁰ Ala lekini twaelenganya apa miyele itu, apakuti twaweluluka ku Mwene.

⁴¹ Katwalozya imyenzo itu ukwiyulu kuli Leza, twapapata kunoli, twati,

⁴² “We Mwene, ala twifya kunuli nupya twakusangukila, nga nawe utatuyelu luse, awe.

⁴³ “Nawe wiza watuzinganya cipyu cipyu. Watukomola ukwaula nu luse.

⁴⁴ Wemo waifupilizya ni kumbi ilifitisye, muno amapepo itu yatange yapuzye.

⁴⁵ Ee, kwene twatitusanguka icitumba, mumo muno antu amitundu yakusumbilamo ivikona.

⁴⁶ “Anisi itu yakututukola intusi nu kutupundilila.

⁴⁷ Icoopo ni vyakutufwanta pansi vyativitutangalila, pamwi nu ononesi ni lovyo kwene.

⁴⁸ Mu manso yane mukukonkoloka sile aminsozi kwati amanzi, pamulandu wa ononesi wa antu yane.

⁴⁹ “Mu manso yane mutakutala mute ukulukuta aminsozi nga nu kuta yasikutala yate foo,

⁵⁰ mpaka sile lino Mwene alasungamila ukufuma ukwiyulu nu kutulolekesya penepo.

⁵¹ Vino nkulola vikumbaisya umwenzo pamulandu wa anaci yonsi amu musumba wane.

⁵² “Natindemwa wa cunyi ku antu yaa ampata ukwaula nu mulandu.

⁵³ Yene yatiyansumbila umupuma umwi lindi nu kukupikila penepo ni ciliwe.

⁵⁴ Amanzi nayo yiza yafika nu ku mutwe, nga lyene nelenganya ukuti imfwa yampalamila.

⁵⁵ “Umwi lindi kwene ilizike wakwe cimwi, indaizya nu kupunda kunuli we Mwene.

⁵⁶ Nawe uvwile kunondi lino napapasile kuti uvwe impooma yane.

⁵⁷ Wemo wangaswike nga unena uti, ‘Utuvwa intete.’

⁵⁸ “We Yawe, wemo wangazwilizye nu kukulula umi wane.

⁵⁹ We Yawe, wamanya vino nemo yamfyenga. Fwandi wewe umputwile umulandu.

⁶⁰ We Yawe, wailolela vino yancitila, na vyonsi vino yampangila.

⁶¹ “We Yawe, watuyuvwila wenga intusi zino yakuntuka nga na mapange yao kwene.

⁶² Akasanya konsi anene yakulanda penepo, yakupunda ni vyakuncitila.

⁶³ Ukutandikila sile akatondo ukufika nu usiku, yene yakunsoweka umu nyimbo zyao.

⁶⁴ “We Yawe, ule uyapezye ndi vino caticiyalinga ule uyavunuke pali vino yacita.

⁶⁵ Si leka sile imyenzo yao ikome ndi, uyatipwile nu kuyatipwila!

⁶⁶ Si ale uyazinganye cipyu cipyu nu kuyalovya muno nsi!”