Nyimbo zya ndosya 2 - Amazwi Yakwe Leza 2013

Yawe wavunuka aina Yelusalemu

¹ Iye mwe vino Yawe ku cipyu cakwe wataponyezya Zioni umu mfinzi. Ucindami wa kwiyulu uno Izlaeli wakwata, Umwene wataonona. Uwanda uno wasosile atasakamile nu kucilyatilo ca ngazo zyakwe.

² Ukwaula nu kuvwa uluse, Yawe wataonona imisumba yonsi yamu mpanga yakwe Yakobo. Cipyu cipyu, wene wataonona amalinga yano yacingililanga impanga. Watalenga nu kuti uteko uzewane kumwi na yakateeka yamwenemo.

³ Uku cipyu cakwe watamala amaka yakwe Izlaeli, ukukana nu kutwazwa lino anisi yatuzanza. Umu kusoka kwakwe, lino asokile swe ana yakwe Yakobo, akulunkuma sile wa moto nu konona akantu akali konsi.

⁴ Akukana ulapwa nu kutusonta ni nceto ungati sweswe anisi yakwe. Watakomola vyonsi vino ilinso lingatemwa ukulola. Watapongolwela icipyu cakwe wa moto, umu mang'anda yakwe swe ina Zioni.

⁵ Yawe wataonona Izlaeli ungati umwanisi wakwe. Wataongolola amasano yakwe yamwene kumwi na malinga aya mwenemo. Wataletela antu amu Yuda ulanda uno utangasila.

⁶ Watalyatola Ng'anda ikulu yakwe Leza muno tukamupepela. Watalenga kuti mu Zioni mutaya amanda amuzilo kumwi na Masabata, Lyene nu ukali wakwe wafulumila yakateeka na yasimapepo kwene.

⁷ Umwene watakana kavuwa kakwe nga watafumya amano ku Ng'anda yakwe ikulu iyamuzilo. Watapela ivikulwa vya masano yakwe umu makasa ya anisi kuti yaviongolole. Lyene umu ng'anda yakwe kwene iya mapepo ali muno anisi yakufyuntwila amazya yakuzevya ucimvyo.

⁸ Icacumi ampiti sana lino Umwene walavile ukuongolola amalinga yakwe Zioni. Wene wavungulwile umwando aya apima nu kupima, apakusininkizya ukuti yonsi yaongololwa. Impungu na malinga lyene avino vituntumile sile imitumba.

⁹ Impongolo zyati zyononeka. Imifikilo nayo yakontoka kumwi ni mikolongelo. Umwene wamuno mpanga kumwi na makombe yakwe yasendwa uzya ku inamasi. Kusi nanti umwi uwakusambilizya amazwi yakwe Leza. Nanti sile a yakasema yakwe kwene yatiyata ukulola ivilolwa ukufuma ku Mwene.

¹⁰ Aikolo amu Yelusalemu lyene yakwikala sile pansi nu kukungumala. Yakuuivusya ivu ku mitwe nu kuzwala ivisamu. Akazyana amu musumba nayo yakukontamika sile imitwe pansi.

¹¹ Amanso yane yatiyatontekana pamulandu nu kulila. Umwenzo wane pasi pakunyongoloka. Amaka yatiyasila pamulandu wakwelenganya vino antu yane yononwa. Ana anono kumwi nu tunya yakufwa ulwezwe mu misolo ya musumba pamulandu nu lusala.

¹² Yene yakulilila yanyina pamulandu wa nzala nu lusala. Nga panono panono yene yakuongokela mu misolo ya musumba kwati ayano yatiyasyala impondo. Ni myenzo yao ikumalilika panono panono lino yene yapakatilwe na yanyina.

¹³ Iye mwe Yelusalemu, we musumba uno natemwisya, uzye namalanda cani? Ningakutekezya ntuli? Kutatala kwaya uwacula ndi vii. Ucuzi wako umakulilangako sile ukwaula impela, nga kusi nu upaalilo.

¹⁴ Yakasema yako kutaya nanti vimwi vino yakakusemela suka sile intumpu zitupu. Inkosolo zyao zyali izyakukusomba sile nupya kusi navyuze vino yakunenanga. Yene yakutumpikanga sile iyaleka uwelenganya nu kuti utalinzile kuzenzuka.

¹⁵ Antu yonsi akupita mu musumba yakukusonta ni minwe, yakufunga na makofi misula misula. Yene yakuvwanga yati, “Uzye uu uli musumba uno yakulumbilizya yati, ‘Nacansonso Citaizipila, luzango wa nsi yonsi?’ ”

¹⁶ Anisi inu yonsi yakumusoweka nu kumutumbila inkansi. Yene yakulumanya incecete ala yakuti, “Ee, lyene twatitumonona! Uli wanda kwene uno twalolelanga! Lyene twasuka twazanwako.”

¹⁷ Umwene lyene wasuka wacita vino walanga wapanga ukucita. Wene watatulovya ukwaula nu luse, ndi mumu kwene muno watunenyile mpiti. Wataleka ukuti anisi itu yatucimvye. Acino lyene nu kuyuvwa yakuyuvwa wakwe cimwi.

¹⁸ We Yelusalemu, lemasya ukulilila ku Mwene. Leka aminsozi yako yakonkoloka wa nguzi kasanya nu usiku. Cisi cakwezya ukuta ukulila. Kusi kuleka aminsozi yatale yume umu manso yako.

¹⁹ Mu nsita ya usiku mwakatuka lili lili nu kulilila uku Mwene. Mwamulilila wakwe cimwi, mwalengela na ana inu uluse, Ana yalya yano yakufwa insansalila umu visyoko vya miseo pamulandu ni nzala!

²⁰ Silola, we Mwene! Uzye apacani cino ukutuvunuka mu musango kwene uu? Uzye anaci yalinzile kulya ivyala vya ana yao yano yatemilwe wakwe cimwi? Uzye antu yalinzile kukomola yasimapepo na yakasema umu Ng'anda yako kwene ikulu?

²¹ Akote na ance ayaya yatuzi mu miseo, yatiyafwa. Anisi yatiyakomola alumendo na akazyana ku malupanga. Awewe wayakomozile ukwaula nu luse, uwanda uno wasosile ukali ukali.

²² Awewe waamile anisi itu apakuti yize yatoofya monsi monsi. Wemo wacisile ungati watuyama uku maliila. Apa wanda uno wasosile kutali nanti wenga wino wapuusile nanti uwasiile, awe. Yene yakomile ana yane, yano nakuzizye nu kuyatemwa.