Neemiya 8 - Amazwi Yakwe Leza 2013

Ezila wawelengela antu amasunde

¹ Umu mwezi uwalenga cinimbali aina Izlaeli yonsi pyu iyakongana pamwi kwati akwe nyina wenga, apa nkolelo ya mpongolo iyamwangwa ukuti Mpongolo ya Manzi, uku Yelusalemu. Nga alino iyuzya Ezila nga kalemba na simapepo, kuti alete ulupapulo lwa masunde yakwe Mose yano Yawe wapile aina Izlaeli.

² Acino Ezila nawe ali pakuleta ulupapulo lwa masunde kuno iuvi lyakongine. Kwali kweneko aonsi, anaci kumwi na ance ali na mano akuuvwa. Cali apa wanda wakutandika umu mwezi wakwe cinimbali.

³ Papa kwene apa nkolelo ya Mpongolo ya Manzi, apano watankamala, watandika nu kuwelengela iuvi mu Lupapulo lwa Masunde, ukutandika sile uku macaca, suka lino ilanzi lyafika umutwe apakasi. Na yonsi ale yali cele nu kuvwikisya sana.

⁴ Ezila wimilile apa cipango ca mbao cino yateinye apamulandu kwene uu, uwakuwelengela antu Lupapulo lwa Masunde. Apa mbali nawe ukwilunji lyakwe paimi Matitiya, Syema, Anaya, Uliya, Hilikiya, na Maaseya. Nga ukwimani lyakwe paimi Pedaiya, Misyaeli, Malikiya, Hasyumu, Hasyibadana, Zakaliya na Mesyulamu.

⁵ Ezila ali pakukupula ulupapulo apa manso yi uvi lyonsi. Wimilile apatumpuke wakwe cimwi. Lino wakupula, antu yonsi iyimilila.

⁶ Lyene Ezila alumbanya Yawe, Leza mukulu. Antu yonsi nayo yatumpula amakasa yao nga yavwanga yati, “Kaciye vivyo kwene! Kaciye vivyo kwene!” Ali pakwinamika ni mitwe yao, yafukama nga yalumbanya Leza.

⁷ Lyene aina Levi yaa: Yesyua, Bani, Syelebiya, Yamini, Akubu, Syabetai, Hodiya, Maaseya, Kelita, Azaliya, Yozabadi, Hanani na Pelaya, iyalondolwela antu isunde. Lilyo ala antu imilile papa.

⁸ Aina Levi yayo yawelengela nu kulondolwela antu Lupapulo lwa Masunde yakwe Leza, apakuti yanguvwa muno lwalola.

⁹ Alino lyene umulasi Neemiya, Ezila simapepo na kalemba, nga na ina Levi nayo ale yakulondolwela antu yonsi. Iyayanena iyati, “Uwanda wilelo upolelelwe, upaatwilwe kuli Yawe, Leza winu. Cisi cakwezya kuti muuzikwe nanti ukulukusya aminsozi.” Pano antu yonsi yalilanga aminsozi lino yuvwa amazwi ya Masunde yayo. Ali cino yavwangile vivyo.

¹⁰ Neemiya ayanena ati, “Pitangini muye mukalye inyama izinone. Mukamwe ni vyakumwa ivilyompe. Wiyo atakweti ivyakuteyanya nawe mumutumile kweneko, pano uwanda uu, uwanda umwi upaatwilwe Yawe Leza witu. Mutaezya mwateeza nanti ukukungumala, pano uluzango luno Yawe amamupeela lumamukomelezyanga.”

¹¹ Aina Levi apa kumyalalika antu nayo yavwanzile yati, “Myalalini, pano uwanda uu uwa muzilo. Mutateza nanti cimwi.”

¹² Caleka antu yonsi iyapita kumwao ku kulya nu kumwa. Iyatumila nauze tumwi tumwi nu kusansamuka wakwe cimwi, apamulandu wakuti yuvwikisye muno ivintu vino vyawelenzilwe vyalola.

Uwanda ukulu uwa nsakwe wacindikwa.

¹³ Apa wanda wakwe ciili uwa mwezi ulya, aikolo amu nko zyao zyonsi, kumwi na yasimapepo na ina Levi, ali pakukongana kuli kalemba Ezila uku kuya sundwa amazwi amu Mpapulo zyakwe Mose.

¹⁴ Umu vyalembwa umu Mpapulo zyakwe Mose vino umwene Leza wavwanzile ukupitila muli Mose, ali muno yazana ndi vino aina Izlaeli yali nu kwikala umu nsakwe apa manda ya kwiusya Cimulo ca Nsakwe.

¹⁵ Acino apakuvwa vivyo, nayo ali pakucincizya antu nu kusalanganya impwelo apamulandu kwene uo umu misumba yao yonsi nu mu Yelusalemu yati, “Pitini umu twamba monsi mukalonde misambo ya mafwa, ya vikambalala, ya miolivi, imilemo, utuncindu pamwi ni misambo ya miti yuze, apakuti mwize mupange insakwe wakwe vino calembwa.”

¹⁶ Caleka antu nayo yasalangana umu mpanga. Yaweluluka ni misambo ya mafwa yasakilizya insakwe, cila muntu apipaala lyakwe, pa musolo wakwe, pa musolo wakulilizya Ng'anda ikulu yakwe Leza, apa mulyango wa Mpongolo ya Manzi nga alino napa wingililo wa mpongolo yakwe Efulemu.

¹⁷ Antu yonsi pyu pali yao awelulwike ukufuma ku Babiloni ku uzya, yakuula insakwe amuno yikala. Icintu cii cili cino aina Izlaeli yatatazile yaciombe ukutandikila sile pali Yoswa umwana umonsi wakwe Nuni ukufika na pa wanda uwa kwene. Fwandi yali nu luzango wakwe cimwi.

¹⁸ Cila wanda ukutandikila apa wanda uno yatandikile ukongano wa nsakwe, ukufika napa wanda uwakusyalikizya, Ezila wawelengelanga antu amazwi amu lupapulo lwa Masunde yakwe Leza. Yacindike icintu cii, apa manda cinimbali. Umu wanda wakwe cinani ali muno yacisile ukongano ukalamba uwamuzilo, ndi vino calembwa mu Mpapulo zyakwe Mose.