Neemiya 6 - Amazwi Yakwe Leza 2013

Yumana akapi ukuletela Neemiya icimvulunganya

¹ Sanibalati, Tobiya, Gesyemu umu Alabu pamwi na anisi yauze, lino yuvwa ukuti natinkuululula ilinga, nu kuti kutasiile iciposi nanti conga, ala kusile sile ukwika imilyango umu mpongolo.

² Sanibalati na Gesyemu yatuma amazwi yati, “Katuka kuko twize tukomenkane swensi umu muzi umwi uwamu lunyika lwa Ono.” Lelo kwene yalondesyanga sile ukundya kanyama kisi.

³ Acino nani intuma inkombe na mazwi akuti, “Indi nu mulimo umwi kuno ukome sana. Naposiwa ukutentemukila kuko. Ndi cakuti cingankumba sile nize kuko, awe cumi, ale umulimo kuno ungalala.”

⁴ Antu yaya nayo yalondenkanya uku ntumila amazwi amwata uli umwi kwene amaila yani. Nani ala inkuyawezezya uwasuko uwa mazwi ali yonga kwene.

⁵ Lyene iila lyakwe cisano, Sanibalati antumila umuomvi wakwe na kalata uku minwe umuyulwe.

⁶ Mwalemvilwe amazwi yaa: “Umu mitundu yonsi mwatimusalangana amazwi yakwe Gesyemu akuti wewe pamwi na Ayuda mwatimupanga ukunsangukila. Ali cino watukuululula ilinga apakuti nawe uce uye umwene.

⁷ Watukatusya na yakasema akuti yasansante ilyasi pali wewe umu Yelusalemu, ilyakuti ‘Ayuda nayo yaikwatila umwene.’ Ilyasi lya musango uu lyasya lifike uku mwene. Ali cino fwandi wemo katuka sile uwize kuno tuvwane pamwi.”

⁸ Nani intuma intumi apa kumwasuka inti, “Ala swemo tutalatala tucite icintu nanti cimwi cikoline na cino walanda. Watucelenganya sile wenga umu mwenzo wako.”

⁹ Yene yezyanga ukutoofya, yelenganya yati, “Amakasa yao yalatonta sile, yatalatala yamale uku kuula.” Lelo nemo impepa inti, “We Leza, ule unkomye.”

¹⁰ Uwanda umwi naile kwakwe Syemaya umwana wakwe Delaya, umwizikulu wakwe Meetabeli, wiyo uwaiyalile umu ng'anda. Alino wene avwanga ati, “Katwingile umu Ng'anda ikulu yakwe Leza, umukasi kasi ka Muputule wa Muzilo, amuno tuiyalile, tufunge ningo imilyango. Pasi pano yiza kukoma ilelo usiku pakasi.”

¹¹ Lelo nemo namwaswike inti, “Uzye icumi umuntu uwaya wakwe nene, nawe angapuuka? Uzye umu cumi umuntu wa milimo ino nakwata angapuukila uli umu Ng'anda ikulu yakwe Leza kuti apusuke? Awe, cakana nemo nsyakuya mwenemo.”

¹² Nemo nilwike ukuti asa a Yawe awino amutumile. Wene wasema pali nene ivya musango uu, pano Tobiya na Sanibalati yamupile amafukakanwa kuti acite cico.

¹³ Yamulipile impiya kuti angofye apakuti aleke nifye apakucita cii, nga pacisila inzewane nu kunseka yanseke.

¹⁴ Nga nemo pali pakupepa inti, “We Leza wane, iusya Tobiya na Sanibalati apa vintu vino yacisile, alino na kasema umwanaci Noadiya pamwi na yakasema yauze yano yezizye ukungofya.”

Yamala ukukuula ilinga

¹⁵ Avino yamazile uku kuula ilinga apa wanda uwalenga amakumi yaili na yasano, lilyo ilyasenzile amanda amakumi yasano na yaili, umu mwezi wakwe Eluli.

¹⁶ Lino anisi itu yonsi aikalanga mu mpanga izyazingulwike yuvwa ukuti twamalila uku kuula, nu kulola yailolela, yazunguka wakwe cimwi nu kutovoka, pamulandu wakuti yilwike ukuti Leza witu uwazwilizyanga kuti umulimo uu uombwe.

¹⁷ Nga umu manda kwene yaya asambazi amu mpanga ya Ayuda yatumilanga Tobiya amakalata avule, nga nawe watwalilile ukuyaasuka.

¹⁸ Alino nu kuya aingi yavukilanga uku lusansa lwakwe apamulandu wakuti wali a sivyala Syekaniya umwana wakwe Ala, nga Yeonani umwana wakwe uwatwite umwana wakwe Mesyulamu, umwana wakwe Belekiya.

¹⁹ Ukulunda pali cii, yatasyanga ni vicitwa vyakwe ivisuma apa manso yane nu kumulandila amazwi yane. Tobiya nawe wantumilanga yakalata akungofya.