Neemiya 3 - Amazwi Yakwe Leza 2013

Ikuule lyatandika

¹ Simapepo Mukulu, Elyasyibu pamwi na yasimapepo yauze yakatuka iyatandika nu kukula cipya cipya Impongolo ya Mfwele. Apacisila cakuipolelela iyapanga fulemu wa pa mulyango alino iyikapo ni cisasa. Lyene iyapanga ni mifikilo ningo nga alino iyatwalilila ukukuula ukufika ku Mpongolo ya Mwanda suka iyaya iyafika uku Lupungu lwa Hananeli.

² Antu yaku Yeliko iyakuula ukufika pano yasimapepo yapelezile, alino Zakuli umwana umonsi wakwe Imuli nawe alondela penepo.

³ Amu mupanda wakwe Hasena nayo iyakuula Impongolo ya Nswi. Iyapangilila penepo ni nsondo nu kwika umulyango wakuyalila nga alino ni mifikilo ya vyela.

⁴ Melemoti, umwana umonsi wakwe Uliya, mwizikulu Hakozi, nawe azifya imbali yuze iyalondelelapo. Mesyulamu umwana umonsi wakwe Belekiya, umwizikuli wakwe Mesyezabeli, nawe azifya imbali yuze iyalondelelapo. Zadoki, umwana umonsi wakwe Baana, nawe azifya imbali yuze iyalondelelapo.

⁵ Aina Tekoa nayo yazifya imbali yuze iyalondelelapo. Lelo asambazi yao yakanyile ukuomba kweneko imilimo ino yakangalila yao yayapile.

⁶ Yoiyada umwana umonsi wakwe Paseya na Mesyulamu umwana umonsi wakwe Besodeiya nayo yazifizye impongolo iyamwangwa ukuti Yesyana yapangila penepo myalo, visasa ni mifikilo ya vyela.

⁷ Yano yazifizye imbali yuze iyalondelilepo a Melatiya umwina Gibyoni na Yadoni umwina Melonoti, nga na ina Gibyoni na Mizipa. Yazifizye mpaka ukufika uku ng'anda ya mulasi wa muputule wa mpanga uku mbalama ya luzi lwa Yufulate.

⁸ Uzieli, umwana umonsi wakwe Haliaya, uwa mwiumba lyakwe yakasula ya vyela vyakwe zaabu, nawe azifya imbali yuze iyalondelelapo. Hananiya, kenga wa mafuta acinunu cisuma, nawe azifya imbali yuze iyalondelelapo. Yene yazifizye mpaka ukwi Linga Lisalale.

⁹ Lefaya, umwana umonsi wakwe Huli, uwateekanga umusumba wa Yelusalemu, nawe azifya imbali yuze iyalondelelapo.

¹⁰ Yedaya umwana umonsi wakwe Halumafi, nawe azifya imbali yuze iyalondelelapo ulunga ni ng'anda yakwe. Hatusyi, umwana umonsi wakwe Hasyabineya, nawe azifya imbali yuze iyalondelelapo.

¹¹ Malikiya umwana umonsi wakwe Halimu na Hasyubu umwana umonsi wakwe Paati Moabu, nayo yazifizye imbali yuze iyalondelelapo nga nu Lupungu lwa Vitofu.

¹² Syalumu umwana umonsi wakwe Haloesyi, uwateekanga citika muze wa musumba wa Yelusalemu, nawe azifya imbali yuze iyalondelelapo. Ana yakwe anaci yamwazwilizye kuzifya imbali kwene ii.

¹³ Hanuni pali pamwi na yafundi aku Zanowa azifizye Mpongolo ya Cifoloma. Yene yaikuululula nu kwika visasa ni mifikilo yakweyo. Yazifya ni linga ukulingana amamita imyanda iini mpaka ukufika uku Mpongolo ya Citumba.

¹⁴ Malikiya umwana umonsi wakwe Lekabu uwateekanga citungu ca Beti Hakelemu, nawe uwazifizye Mpongolo ya Citumba. Akuululula nu kwikako visasa ni mifikilo yakweyo.

¹⁵ Syaluni umwana umonsi wakwe Kolioze, uwateekanga citungu ca Mizipa, uwakuuzile Mpongolo ya Kafukoka. Aikuululula nga aikapo ni paala, ni visasa alino ni mifikilo yaviko. Akuula ni linga ukufika nu ku Ciziya ca Siloamu apipi ni calo ca mwene, ukufuma uku utampilo mpaka ukufika nu ku mpela ya musumba wakwe Davidi.

¹⁶ Wino yemine nawe, a Neemiya umwana umonsi wakwe Azibuki, uwateekanga citika wa citungu ca Beti Zuli. Wene uwazifizye imbali yuze ukufuma uku ncende iyalungatana ni lindi lyakwe Davidi, ukuyafika uku ciziya ciimbe uku pipi na kamba ka asilika.

Aina Levi akuuzile ilinga

¹⁷ Alondelile penepo, aina Levi akuululwile imbali yuze. Intunguluzi yao wali a Leumu umwana umonsi wakwe Bani. Alino palondelela Hasyabiya uwateekanga citika wa citungu ca Keila, nawe azifya imbali yuze.

¹⁸ Alondelile penepo, akumwao azifizye imbali yuze. Intunguluzi yao wali a Bavai umwana umonsi wakwe Henadadi, uwateekanga citika wa citungu cuze ca Keila.

¹⁹ Uwalondelile penepo, a Ezeli umwana umonsi wakwe Yesyua, uwateekanga uku Mizipa. Wene uwazifizye imbali yuze iyalungatine nu mulundu wa ng'anda ya vyanzo, ukusendana ni ca kwi tungi li linga.

²⁰ Uwalondelile penepo, a Baluki umwana umonsi wakwe Zabai. Wene uwazifizye imbali yuze, ukutandikila pi tungi, ukufika nu ku mulyango wa ng'anda yakwe Elyasyibu Simapepo Mukulu.

²¹ Uwalondelile penepo, a Melemoti umwana umonsi wakwe Uliya, umwana umonsi wakwe Hakozi. Wene uwazifizye imbali yuze ukutandikila pa mulyango wa ng'anda yakwe simapepo mukulu Elyasyibu, mpaka sile nu ku mpelelekezyo.

²² Yano yalondelile Melomoti yali a yasimapepo amu mpanga iyazingulwike. Yene yazifizye imbali yuze.

²³ Yano yalondelile penepo yali a Benjamini na Hasyubu. Yene yazifizye imbali yuze ulunga na mang'anda yao. Alino palondelela Azaliya, umwana umonsi wakwe Maaseya, umwana umonsi wakwe Ananiya. Wene uwazifizye imbali yuze apipi ni ng'anda yakwe.

²⁴ Uwalondelile penepo a Binui umwana umonsi wakwe Henadadi. Wene uwazifizye imbali yuze, ukutandikila ku ng'anda yakwe Azaliya mpaka ukufika na pa mulyango wi tungi.

²⁵ Nga palondelela Palali, umwana umonsi wakwe Uzai. Wene uwazifizye imbali yuze ukutandikila pi tungi lya lupungu lwakwi sano lya papela, umu pipi nu musolo wakwe yakalinda. Uwalondelile penepo, a Pedaiya umwana umonsi wakwe Palosyi.

²⁶ Ukwika penepo na aomvi aku Ng'anda ikulu yakwe Leza, aikalanga pa mwamba wa Ofeli. Yene yazifizye imbali yuze mpaka uku ncende iyali ulunga ni Mpongolo ya Manzi, ukuya lwaku ufumondaka mpaka nu ku lupungu lutali cuze.

²⁷ Alondelile pali Pedaiya na auze, a Tekoa, uwazifizye imbali yuze ulunga nu lupungu lutali, mpaka ukufika ukwi linga lya Ofeli.

²⁸ Ukutandikila sile apa Mpongolo yakwe Yamfwalasi, yasimapepo yauze yakuululwile, cila wenga apankolelo ya ng'anda yakwe.

²⁹ Uwalondelile penepo, a Zadoki umwana umonsi wakwe Imeli. Wene uwazifizye imbali yuze apankolelo ya ng'anda yakwe. Yapalamine na Syemaya umwana umonsi wakwe Syekaniya, kalinda wa Mpongolo yaku Ufumondaka. Nawe azifya imbali yuze iyalondelilepo.

³⁰ Uwalondelile penepo, a Hananiya umwana umonsi wakwe Syelemiya na Hanuni umwana umonsi wakwe Zalafi, wakwe mutanda apa yonsi. Nawe azifya imbali yuze. Uwali umu pipi nawe, a Mesyulamu umwana umonsi wakwe Belekiya. Wene wazifizye imbali yuze umu pipi ni ng'anda yakwe.

³¹ Uwalondelile penepo, a Malikiya, kasula wa vyela vyakwe zaabu. Wene wazifizye imbali yuze mpaka ukufika uku ng'anda ya aomvi aku Ng'anda ikulu yakwe Yawe nu ku ng'anda ya aculuzi, ulunga ni Mpongolo yakwe Yakalinda, ukufika napa muputule wa papela yi tungi.

³² Alino ukufuma sile papo kwene apa muputule wa papela uwali api tungi, ukwizafika apa Mpongolo ya Mfwele, apa zifizye yakasula ya vyela vyakwe zaabu na aculuzi.