Neemiya 2 - Amazwi Yakwe Leza 2013

Umwene Alitakisesi watuma Neemiya uku Yelusalemu.

¹ Umu mwezi wakwe Nisani, umwaka uwalenga amakumi yaili akuteeka kwa mwene Alitakisesi, natoozile waini nu kupeela umwene. Wene atatazile alole vino nkuloleka umu undalile.

² Acino umwene anguzya ati, “Uzye pacani cino ukulolekela umu undalile? Ukulwala kwene utalwile, cimwi cifwile ukuti cikucuzya umwenzo wako.” Nemo nuvwile intete sana.

³ Lelo nanenyile umwene inti, “Si kalukuwala uku mwene! Uzye kwene musambazi ningakana uli uku undalila nemuno umusumba wa vikolwe vyane, muno umwaya namalindi yao, watiusyala amatongwa nga ni mpongolo zyonsi nazyo zyati zipya nu moto?”

⁴ Umwene ali pakunguzya ati, “Icani fwandi cino wemo ukulonda?” Lyene intala impepa kuli Leza wa kwiyulu,

⁵ nga naasuka inti, “Ndi cakuti cingazipila umusambazi ukunjela amizu, angaleka inje umu mpanga yakwe Yuda, umu musumba muno mwalala ivikolwe vyane, kuti nkaukuule cipya cipya.”

⁶ Umwene papa pano atenzi nu muci apipi nawe anguzya ati, “Uzye ulwendo lwako lungakusumbila amanda yanga? Uzye kuwela ungaca ukawele lilaci?” Umusambazi ali pakunzumilizya. Acino nani inika insita ya kupita.

⁷ Lyene nalunzile na mazwi akuti, mwene, nkulenga mumpeele amakalata apa lwendo akuya langizya alasi aku mbalama ya luzi lwa Yufulate, pakuti yanganzumilizya ukupita ulumi umu mpanga ilya, ince insuke inkafike umu mpanga yakwe Yuda.

⁸ Alino na kalata wakuyapeela Asafu, kasunga wa mutengo wa mwene apakuti ace aka mpeele imiti iyakulepula imbao izya kuti ince mpangile impongolo zya Ng'anda ikulu yakwe Leza, ni zi linga lya musumba alino ni zya ng'anda yane kwene. Fwandi vyonsi vivyo umwene wanzumilizye apakuzana ukuti uluse lwakwe Leza lwali nani.

⁹ Acino naile ku alasi aku mbalama ya luzi lwa Yufulate, awe injapeela makalata yano nafumile nayo uku mwene. Umwene wampile ni vita vimwi vimwi ivya kunsukilila ivyali pa mfwalasi.

¹⁰ Lino Sanibalati umwina Holoni na Tobiya umwina Amoni yuvwa umulandu uu, yene yasoka apakulola ukuti kwiza umuntu umwi uwa kuzifya uwikazi wa ina Izlaeli.

Neemiya waceceta amalinga ya musumba wa Yelusalemu

¹¹ Walanga nafika uku Yelusalemu, ntala nikala amanda yatatu

¹² nga alino nakatwike usiku, ala tuli na antu yamwi. Intayanenyile vino Yawe Leza wane aisile umu mwenzo wane, ivya kucitila Yelusalemu. Ntakweti citeekwa nanti conga suka sile punda wino nakwezilepo.

¹³ Lino caya usiku impita apa Mpongolo ya Cifoloma indungama ku Mpongolo ya Citumba. Nceceta muno ilinga lya Yelusalemu lyaongoloka na vino impongolo zyapya uku moto.

¹⁴ Lyene imfutuka, inja uku Mpongolo ya Kafukoka nu ku Cifula ca Mwene, lelo kutali inzila yakuti punda wino nakwezilepo apite mwenemo.

¹⁵ Acino usiku intentemukila mu Cifoloma ca Kiduloni, ala inkuceceta ilinga. Lyene inswilila mumu kwene muno nali mpisile nu kwingila nupya umu musumba ukupitila apa Mpongolo ya Cifoloma.

¹⁶ Kusi nanti wenga pali yamusika uwa manyile vino nkucita. Nupya ukufika na pa nsita kwene iya, walanga ntacili nene nanti umwi apa ya Yuda, pali ya simapepo, apa asambazi, pa ntunguluzi nanti yauze asyala yano tungati umulimo uu wakumile.

¹⁷ Lelo nayanenyile inti, “Mwe yayame, silolini intazi ino tukweti pamulandu wakuti musumba wa Yelusalemu usile amatongwa. Impongolo zyakweo zyonsi nazyo izyononeke! Silekini tumane akapi, tukuule cipya cipya ilinga lya mawe, nga tumasisya umuzewanya pakasi kitu.”

¹⁸ Alino njanena navino umwene Leza uku luse lwakwe watangazwa nu kuyalandila amazwi yano umwene Alitakisesi wanenyile. Nayo iyatandika papo kwene ukupunda, iyati, “Katutandike ukukuula.” Nao yaasuka yati, “Lekini tutandike uku kuula cipya cipya.” Acino yaiteyanya ukutandika umulimo uu usuma.

¹⁹ Lelo lino Sanibalati umwina Holoni, Tobiya intunguluzi ya ina Amoni na Alabu wino yamanga Gesyemu, lino yuvwa umulandu uu iyiza kunotuli, iyatandika kututumfya yati, “Mukucita cani kuno? Simanye mukulonda musangukile umwene Alitakisesi?”

²⁰ Lyene nemo njaasuka inti, “Leza wa mwiyulu alasuka atupeele icituku. Ala swemo, swe aomvi yakwe twasya tutandike uku kuula cipya cipya. Lelo mwemo papo pano muli, mutakweti icipande nanti cimwi muno umu Yelusalemu. Nupya mutakweti insambu nanti imwi. Nanti icimanyililo icakuti yace yamwiusizyako mutakweti.”