Neemiya 13 - Amazwi Yakwe Leza 2013

Neemiya wazifya ivintu

¹ Pa wanda kwene ulya Lupapulo lwakwe Mose lwawelenzilwe ala antu yonsi yakuuvwa. Ali pakuzana pano calembwa ndi vino umwina Amoni nu mwina Moabu ali wensi atalatala aezye ukwingila mwi uvi lya antu yakwe Leza.

² Icintu cico catandike pamulandu wakuti yene yakanyile ukupeela aina Izlaeli amanzi ni vyakulya lino yali apa lwendo lwakuya ku Eguputo. Yene yatozile ulupiya yalipila nu kuonga Balamu apakuti atipwile aina Izlaeli. Lelo Leza wasenwile intipu zyakwe Balamu iziya upolelelo.

³ Walanga lino antu yuvwa cico umu malembelo yano yayawelengile mu Masunde yakwe Mose, nayo zuwazuwa ali pakuzinga ainamasi yonsi umwi uvi lya ina Izlaeli.

Neemiya watumwa nupya ku kulungamika ivintu

⁴ Lino vintu vyonsi vitatala vyacitika, simapepo Elyasyibu uwangalilanga miputule yakusungilamo cuma mu Ng'anda ikulu yakwe Leza witu. Wene waelezyanyizye na Tobiya,

⁵ nupya wazumilizye Tobiya kuti angaomvya umuputule ukalamba uno mpiti yasungilanga mwenemo ubani, uwila wa usu, icikumi ca ngano, waini na mafuta. Kuli kuti vyamusangulo vino yapaatwilanga aina Levi, yakiimba ya nyimbo, yakalinda ya mpongolo, na yasimapepo.

⁶ Lino vyonsi vii vikucitika ku Yelusalemu ala nemo insiko, pano walanga naya kuli Alitakisesi umwene waku Pesya. Cali mu mwaka walenga amakumi yatatu na iili wa kuteeka kwakwe. Lino papita amanda yamwi indenga ulusa ku mwene

⁷ nga nswilila ku Yelusalemu. Kuku naile nzunguka apakuzana ukuti Elyasyibu wapeela Tobiya umuputule ukalamba waku Ng'anda ikulu yakwe Leza.

⁸ Lyene nsoka wakwe cimwi nga nsumbila apanzi utuviya tonsi tuno Tobiya waisile mu muputule ulya.

⁹ Alino impela ilamulo lyakuti yaswefye imiputule ilya nga nswilizyamo iviya vyonsi vyamu Ng'anda ikulu yakwe Leza kumwi na mawila ya mbezu nu ubani kwene.

¹⁰ Nga nzana ukuti aina Levi yatapelwa ivipande vyao vino yali nu kupelwa. Lyene apamulandu wakwe cii, cila muntu walanga waswilila ku kulima calo cakwe.

¹¹ Caleka inkalipila intunguluzi zizi inti, “Pacani cino mwatazyela Ng'anda ikulu yakwe Leza mu musango uu?” Lyene nkonganika antu yalya nu kuyaswilizya pa milimo yao.

¹² Lino nacita vii, Ayuda yatandika ukwiza na mawila ya cikumi ca ngano, waini, na mafuta, kuti yapeela ku miputule yakusungilamo cuma.

¹³ Alino nsolola yaa kuti yaye akasunga ya cuma: simapepo Syelemiya, kalemba Zadoki nga na Pedaiya, wenga uwamu ina Levi, ukwikapo na kazwilizya wao Hanani, umwana umonsi wakwe Zakuli, uwamu mupanda wakwe Mataniya, pano namanyile ukuti antu yaa atailwe. Yapilwe umulimo wakwankanya vyamusangulo ku yaomvi yauze.

¹⁴ We Leza wane, sungala unjiusye pali vii vyacitika. Iusyini milimo yane isuma ino nacitila Ng'anda ikulu yakwe Leza wane pakulondesya ukumutumikila.

¹⁵ Pa nsita kwene ilya nga ndola antu mu mpanga yakwe Yuda yakuponda nu kufena amatingi pa Sabata. Nga na yamwi ala yakukolonganika nu kutulika ingano mu mitumba ala yakuomvya yapunda. Yamwi nayo ala yakusenda waini, matingi, misamvu, alino ni viya vya misango misango, ala yakuleta ku Yelusalemu pa wanda wi Sabata kwene. Alino njakalipila kuti yataezya kukazya vyakulya pa Sabata.

¹⁶ Na antu yamwi aku Tuli aikalanga mu Yelusalemu yaleta inswi zya misango na misango zyakukazya pa wanda wi Sabata. Yakazyanga ku ikazi amu mpanga yakwe Yuda na amu Yelusalemu.

¹⁷ Papo kwene nkalipila intunguluzi zya Ayuda nga nzyuzya inti, “Silolini lukota luu luno mukucita! Pacani cino mukukowezya Sabata?

¹⁸ Ivikolwe vinu ivyatandike ukucita cii cakuti Leza witu wasosile ayavunuka nu kuleta uononesi apa musumba uu. Lelo namwe kwene mukulonda ukusosya Yawe wakwe Izlaeli apa kukowezya Sabata mu musango kwene uu.”

¹⁹ Uli mulandu uno napiile ilamulo kuti lino ilanzi lyatilyawa, apa nsita ino Sabata litatala lyatandika, yayala mpongolo zyamu Yelusalemu mpaka kukusila kwi Sabata. Alino nika yakalinda apa mpongolo akulesya ukwingizya nu kufumya vya uculuzi vyonsi api Sabata.

²⁰ Cii calenzile ukuti aculuzi akazyanga vya uculuzi vya misango na misango yalala ukunzi ya musumba wa Yelusalemu uwanda onga nanti amanda yaili.

²¹ Lelo nayakalipile nu kuyuzya inti, “Uzye pacani cino mukulalila apipi ni linga? Ndi mulacita cii nupya, ndamufulula.” Kutandikila papo kwene mpaka nu mu manda ankolelo aculuzi yalya yatatazile yaweluluke pa Sabata.

²² Lyene mpela ilamulo ku ina Levi kuti yaiswefye nu kwiza tandika kulinda mpongolo kuti wanda wi Sabata uziliziwe. We Leza wane, unjiusye nu kunsunga pamulandu wakutemwa kwako kukulu.

²³ Pa nsita kwene iyo nga ndola aikazi yaku Yuda yayo atwite anaci aku Asyidodi, nu ku Amoni nga nu ku Moabu.

²⁴ Pano citika wa ana yao yavwanganga icilimi caku Asyidodi, yaposiwanga ukuvwanga icilimi citu. Lelo yavwanganga icilimi ca mitundu yuze.

²⁵ Lyene mpazyanya nayo nu kuyatiipa nga numa yamwi nu kuyanyunkula inyele. Nga njanena kuti yacite umulapo mwi zina lyakwe Leza inti, “Mutakezye ukutwalizya ana inu anaci ku onsi ainamasi, nga ana inu aonsi kumwi namwe kwene mutakezye kutwala anaci ainamasi.

²⁶ Uzye asi pamulandu wa anaci kwene yalya acino Solomoni umwene waku Izlaeli wifizye? Kutali umwene nanti wenga uwamu nko zya pano nsi uwalingine na aliwe. Leza wamutemilwe cuze nga amulasika uwene wa ina Izlaeli yonsi. Lelo anaci yalya ainamasi yalenzile kuti aifye.

²⁷ Uzye naswe tumalondelanga vicitwa vinu nu kuntayela Leza apa kutwalana nu kutwalizyanya ku inamasi?”

²⁸ Wenga uwamu ana aonsi yakwe Yeoyada, umwana umonsi wakwe Elyasyibu Simapepo Mukulu wilya, walanga watwala umwana wakwe Sanibalati waku Holoni. Acino namuzinzile nu kumufumya mu Yelusalemu.

²⁹ We Leza wane, wiusye antu yayo, apa kukowezya usimapepo wao nu kusausya upangano uno mwacisile na ina Levi.

³⁰ Avino nasangulwile yasimapepo yaa na ina Levi ku vintu vyonsi vya inamasi. Alino nswilizya yasimapepo na ina Levi pa milimo yao apakuti cila muntu amanye nu kuomba ningo umulimo wakwe.

³¹ Nga mpela ilamulo lyakuti yaleta inkwi ni vizao vyankolelo apa nsita iyasontwa. We Leza wane, si ule wiusye vyonsi nu kunjela amizu.