Neemiya 11 - Amazwi Yakwe Leza 2013

Aikazi aku Yelusalemu

¹ Pa nsita kwene iyo intunguluzi zya antu alanga ziikala mu Yelusalemu, nga na antu asyala yapendola kuti yasolole wenga mu antu ikumi pali cila kupenda, kuti aize aikala mu Yelusalemu, musumba wamuzilo. Lelo antu fundimbali asyala yene yaikala mu misumba yao.

² Alino antu yataizye antu auze yonsi aipeelisye ukuti yane yakaikala mu Yelusalemu.

³ Umu misumba yuze yasyala umwatenzi cele wensi wasyala wa ina Izlaeli, yasimapepo, aina Levi, aomvi yaku Ng'anda ikulu yakwe Leza, nga na amu mupanda wa yaomvi yakwe Solomoni, cila wensi apa caupyanyi cakwe mu misumba yao. Uu, uli utantiko wa ntunguluzi zya ikazi amu muputule wa mpanga yaku Yuda atenzi mu Yelusalemu.

⁴ Yamwi amu mutundu wakwe Yuda aeya: Ataya umwana umonsi wakwe Uziya, umwana umonsi wakwe Zakaliya, umwana umonsi wakwe Amaliya, umwana umonsi wakwe Syefatiya, umwana umonsi wakwe Maalaleli, yonsi yaa yali amu mupanda wakwe Pelezi.

⁵ Nga pali na Maaseya umwana umonsi wakwe Baluki, umwana umonsi wakwe Kolioze, umwana umonsi wakwe Hazaya, umwana umonsi wakwe Adaya, umwana umonsi wakwe Yoyalibu, umwana umonsi wakwe Zakaliya, uwamu mupanda wakwe Syela.

⁶ Amu mupanda wakwe Pelezi yayo atenzi mu Yelusalemu yonsi pamwi yali ivita 468.

⁷ Amu mupanda wakwe Benjamini nayo yali ndi vii: Saluu umwana umonsi wakwe Mesyulamu, umwana umonsi wakwe Yoedi, umwana umonsi wakwe Pedaiya, umwana umonsi wakwe Kolaiya, umwana umonsi wakwe Maaseya, umwana umonsi wakwe Itieli, umwana umonsi wakwe Yesyaya.

⁸ Akazi kakwe yali a Gabai na Salaai. Aina Benjamini yonsi pamwi yali 928 aikalanga mu Yelusalemu.

⁹ Yowelo umwana umonsi wakwe Zikili uwali kapitao wakwe conga. Alino Yuda umwana umonsi wakwe Hasenua uwali kapitao wakwe ciili mu musumba ulya.

¹⁰ Yasimapepo nayo yali ndi vii: Yedaya umwana umonsi wakwe Yoyalibu, nga na Yakini.

¹¹ Selaya umwana umonsi wakwe Hilikiya, umwana umonsi wakwe Mesyulamu, umwana umonsi wakwe Zadoki, umwana umonsi wakwe Melaiyoti, umwana umonsi wakwe Aitubi, uwali a Simapepo Mukulu waku Ng'anda ikulu yakwe Leza,

¹² nga na akazi kao yano yatumikilanga mu Ng'anda ikulu iyo. Yonsi pamwi yali 822. Pali na Adaya, umwana umonsi wakwe Yeloamu, umwana umonsi wakwe Pelaliya, umwana umonsi wakwe Amizi, umwana umonsi wakwe Zakaliya, umwana umonsi wakwe Pasyuli, umwana umonsi wakwe Malikiya,

¹³ nga na aomvi yauze, yao ali intunguluzi zya nko zyao yali ndi vii: Amasyisai umwana umonsi wakwe Azaleli, umwana umonsi wakwe Azai, umwana umonsi wakwe Mesyilemoti, umwana umonsi wakwe Imeli. Yonsi pamwi yali 242.

¹⁴ Alino na akazi kao ali asilika aposye. Yonsi pamwi yali 128, alino kapitao wao wali a Zabidieli umwana umonsi wakwe Hagedolimu.

¹⁵ Aina Levi nayo yali ndi vii: Syemaya umwana umonsi wakwe Hasyubu, umwana umonsi wakwe Azilikamu, umwana umonsi wakwe Hasyabiya, umwana umonsi wakwe Buni.

¹⁶ Syabetai na Yozabadi, intunguluzi ziili zya ina Levi yakweti umulimo wakwangalila ukunzi ya Ng'anda ikulu yakwe Leza.

¹⁷ Mataniya umwana umonsi wakwe Mika, umwana umonsi wakwe Zabidi, umwana umonsi wakwe Asafu, uwatungululanga mapepo ya kutaizya mu Ng'anda ikulu yakwe Leza. Alino na Bakibukiya uwali wakwe ciili pakasi ka aomvi yauze. Alino Abida umwana umonsi wakwe Syamua, umwana umonsi wakwe Galali, umwana umonsi wakwe Yedutuni.

¹⁸ Aina Levi yonsi aikalanga mu Yelusalemu umusumba wamuzilo yonsi pamwi yali 284.

¹⁹ Yakalinda yapa mpongolo ya Ng'anda ikulu yakwe Leza yali ndi vii: Akubu, Talimoni alino na aomvi yauze yonsi pamwi yali 172.

²⁰ Aina Izlaeli yamwi na yasimapepo na ina Levi asile mu misumba yaku Yuda na ali wensi yikalanga mu ncende yao yaupyanyi.

²¹ Lelo antu atumikilanga mu Ng'anda ikulu yakwe Leza yikalanga ku kamba ka Ofeli, mu Yelusalemu, nupya Ziaa na Gisyipa ali yakangalila yao.

²² Kapitao wa ina Levi ku Yelusalemu wali a Uzi umwana umonsi wakwe Bani, umwana umonsi wakwe Hasyabiya, umwana umonsi wakwe Mataniya, umwana umonsi wakwe Mika. Wene wali a wenga uwamu mupanda wakwe Asafu, uwali a kiimba wa nyimbo zino yimbanga mu Ng'anda ikulu yakwe Leza.

²³ Pano umwene wapiile ilamulo lyakuti yakiimba yonsi yalinzile ukuzanwa pakutungulula inyimbo zyamu Ng'anda ikulu yakwe Leza.

²⁴ Lyene Petaya umwana umonsi wakwe Mesyezabeli, wenga uwamu mupanda wakwe Zela uwamu mutundu wakwe Yuda, uwimililanga aina Izlaeli kwi sano lya mwene uwaku Pesya.

Antu aikalanga mu misumba nu mu mizi yuze

²⁵ Antu yamwi amu mutundu wakwe Yuda yikalanga uku Kilyati Aliba ni mizi yakweo, uku Diboni ni mizi yakweo, ku Yekabuzeeli ni mizi yakweo.

²⁶ Yauze yikalanga ku Yesyua, ku Molada, nu ku Beti Peleti,

²⁷ ku Hazali Syuali, ku Belisyeba ni mizi yakweo.

²⁸ Yauze yikalanga ku Zikilagi, nu ku Mekona ni mizi yakweo,

²⁹ ku Eni Limoni, ku Zola, ku Yalamuti,

³⁰ ku Zanowa, nu ku Adulamu ni mizi yakweo. Yikalanga nu ku Lakisyi nu ku vyalo vyakweo, nu ku Azeka ni mizi yakweo. Kuli kuti, yikalanga mu misumba yonsi ukutandikila ku Belisyeba mpaka ukufika nu ku Cifoloma ca Hinomu.

³¹ Antu amu mutundu wakwe Benjamini nayo kwene yikalanga ukutandikila ku Geba mpaka ukuyapuzya ku Mikimasyi, Aiya, Betele ni mizi yakweo,

³² Anatoti, Nobu, Ananiya,

³³ Hazoli, Lama, Gitaimu,

³⁴ Hadidi, Zeboimu, Nebalati,

³⁵ Lodi, Ono, nga nu ku Cifoloma cakwe Yafundi.

³⁶ Impuka zimwi zya ina Levi aikalanga mu mpanga yakwe Yuda yaile yikala ku mpanga yakwe Benjamini.