Naumi 3 - Amazwi Yakwe Leza 2013

¹ Kalanda ku musumba uno ukazwisya uwazi wa antu avule, umusumba wantumpu nupya umwazula ivisampwe, umusyaulwa yayo atiyazanzwa.

² Si uvwini ukulila kwa mikota, nu kukolokonsya kwa mipeto, nu mutinti wa mfwalasi izikusimula nga ni cilulumo ca maceleta.

³ Asilika apa mfwalasi yene yakusimula, amalupanga yakumyantula, amasumo nayo yakucata. Antu avule yafwa ni vyala vyao ivivule ivitangapendwa, na antu aingi yakupumika pa vyala vivyo.

⁴ Vyonsi vivyo vyacitika pamulandu wa vicitwa vyawinyi ivivule vyamu Ninive. Umwanaci cizelele wilya, akaongola antu ku usuma wakwe. Akatumpoka antu ni vicitwa vyakwe vyawinyi. Wene akalyongofya inko ni vincilincili vyakwe.

⁵ Yawe Wamaka yonsi wavwanga wati, “Nemo indi wa mwanisi winu. Ndakuzula nu kukuzewanya. Antu amu mitundu yonsi yalakutambila, alino uluvwa insonyi pakasi ka mawene yonsi.

⁶ Ndakwitila ivyawinyi, nu kukusausya, nga ndaleka antu yonsi yakulole nu kuzunguka,

⁷ Lyene antu yonsi yano yalakulola yalakuutuka, yati, ‘Ninive wataya itongwa, uzye lyene aweni amamulosya?’ Uzye ndamufumya kwi uwakuti akutekezya?”

⁸ Uzye tumati we Ninive ulusile Teebesi? Uzye usi uli musumba uwali umu mbali ya luzi lwa Nailo, uno amanzi yalizizizye? Amanzi ayano yaucingilile, nupya yali wi linga.

⁹ Umusumba wa Teebesi uwateekanga Kusyi na Eguputo. Amaka yakweo yatakweti umupaka, awe. Aina Puti na ina Libya ali yano yali yacuza yakweo.

¹⁰ Lelo kwene antu amu Teebesi yalemilwe nga yasendwa mu uzya. Ana yao yonsi kwene yasyunozilwe pansi mu miseo yonsi yamu musumba uwo. Anisi yapendozile apa kwankana antu acindame yano yaya mwenemo, kumwi ni ntunguluzi zyakweo iyazinyepa mu minyololo.

¹¹ Nawe kwene we Ninive ulaya kwati watukoleka, nu mutwe wako ulavulungana. Nawe kwene ulalondalonda ukwakuutukila nu kuzina.

¹² Amalinga yako yalakolana wa misamvu ino iviseekwa vyakweyo vyacitandika ukuca. Lino antu yaipukunya, amasamvu yaponela mu mulomo wakwe wiyo akasi ukuyalya.

¹³ Silolini ivita vinu, vyonsi kwene visi na maka wa anaci! Imikolongelo yapa mpongolo yako ilayulila anisi yako, nga nu moto ulonona imikolongelo kwene iyo.

¹⁴ Caleka musembele calimwi amanzi, akupondela ivu lya kukomya malinga inu. Tolini ivikombole alino mutame injelwa!

¹⁵ Lelo nanti mutukute vivyo, umoto ulamulovya mwensi pyu, nu lupanga lulamucentola wa vimuti, nupya muluuluka wakwe makanta, nu kupululuka wa vizao ivyaliwa ni vikwe, pano mwavuzile wa vikwe kwene vivyo.

¹⁶ Mwavuzya aculuzi ukuluta intanda zya mwiyulu! Lelo manyini ukuti yonsi yayo yalasalangana, wakwe makanta akuuluka.

¹⁷ Ivilolo vinu vyavulisya wakwe makanta. Intunguluzi zinu zyavulisya wa vikwe, vivyo ivikatuulila pa viumba ndi kwazuka. Lelo lino ilanzi lyawala, ivipapuka, ukwaula kuti umwi amanye nakuno viile.

¹⁸ We mwene wa ina Asilya, silola vino alasi yako yalowa. Ivilolo vyako vyalala utulo twa pe. Na antu yako yasalanganila mu myamba, nupya pasi nanti wenga uwakuyakonganika.

¹⁹ Icilonda cako citalatala cilole umulembo, nupya impofya yako itangapoziwa, awe. Wensi wino uvwa ilyasi lyapali wewe, alakomela amakufi apakuzangila ukuwa kwako. Uzye kuli umwi wino walewike uzunyo wako ukakate?