Naumi 2 - Amazwi Yakwe Leza 2013

Ukuwa kwakwe Ninive

¹ Mwe ina Ninive, azanzi yatiyiza ku kumonona. Ikini ivita vinu pa malinga! Mwalinda imiseo! Iteyanyini ku kulwa inkondo!

² Yawe ali pipi nu kuwezezya ululumbi ku mpanga ya Izlaeli, wakwe lulu luno yakweti lino anisi yatali kuti yaizanze.

³ Ivita vya anisi vikasenda ivisyangu viyenzu, nupya vikazwala ivyakuzwala viyenzu ivya ulwi. Vikuiteyanya ukuya ku kuzanza! Ivyela vya maceleta yao vikukaoka wa moto. Imfwalasi zyao zikulinduka.

⁴ Amaceleta yao yakaleluka umu miseo. Yakapita ulwilo yala yakuya inkolelo nga ni cundansizi umu misolo. Yene yakaengesa wa lukozyo nu kumyantula wa nkuwa.

⁵ Wene akwaama yamusika yakwe avita, yakuwela ala yatiyacisika. Yakuutukila ukwi linga lya musumba, nu kuikuulila iciumba cakuitasizya kweneko.

⁶ Nu kuyula impongolo yaku vifula vya manzi, kwi sano lya mwene kwazula intete.

⁷ Namwene wene wasendwa uku uzya. Aomvi yakwe yakulila wa vipeele, nu kuyumola apa visao.

⁸ Antu amu Ninive yali wa ciziya, icati cipongoka na manzi yakweco yakwikilila. Antu yamwi yakupunda yati, “Imililini! Imililini!” Lelo kutali uwakuswilila mwenemo.

⁹ Sampini siluva! Sampini zaabu! Icuma cao cavula sana. Cene icamutengo ukulu wakwe cimwi

¹⁰ Umusumba wa Ninive ononeka, wasanguka waya itongwa ilyaula antu. Imyenzo yaluluka uku ntete, na makokola yakuzakaza. Umu nteo monsi mwamyalala, ni vinso vyapona uku masakamiko.

¹¹ Uzye lyene umusumba ulya uli kwi? Wene wakoline wa ninga yakwe yacisama, muno yalisyanga ana yao. Mumo muno yacisama kumwi na ana yao yayanga ukwaula ukoopa cimwi.

¹² Cisama uwakalume ndi walema inyama yene iyakulya uwakaci na ana yakwe. Ndi waikakola nga aisalanganya umu ninga yakwe yacisama kuti yailyokezye.

¹³ Yawe Wamaka yonsi akunena aikazi aku Ninive ati, “Nemo indi wa mwanisi winu. Ndoca maceleta inu. Ivita vinu vilakomwa ku lupanga, vivyo ivikoline na yacisama. Nemo ndamupokolola ivisampwe vinu vyonsi. Inkombe zinu zitalalolola izwi nanti limwi ilinguvwika.”