Naumi 1 - Amazwi Yakwe Leza 2013

Ukali wakwe Yawe wafulumila aina Ninive

¹ Yaa amazwi yakwe Yawe asowilwe pamulandu nu musumba wa Ninive. Naumi uwaku Elikosyi walemvile ivintu vino waweni mu cilolwa.

² Yawe a Leza wa uzuwa nupya akacita icilanduzi. Yawe akacita cilanduzi nupya wakalipa. Yawe akavunuka yao amusangukila, nupya akacita cilanduzi pa anisi yakwe.

³ Yawe asisoka zuwa, lelo uwamaka wakwe cimwi nupya asipanya umuntu uwa mulandu. Pano Yawe akupita, pakakatuka nkungulupya ni cipunga icikome. Amakumbi ali lukungu luno ingazo zyakwe zikakatusya.

⁴ Wene akapeela yemba ilamulo, nga nawe apwa! Wene akakamya inguzi. Ni vimelwa vyamu vyalo vyaku Basyani nu ku Kalimeli avyumika. Na maluwa aku Lebanoni yafooka.

⁵ Imyamba ikatenkana pa manso yakwe, nu tulundu nato tukasunguluka. Insi ikasunkana lino Yawe waloleka, kuli kuti insi yonsi kumwi na antu aikala mwenemo yazakaza.

⁶ Lino wene wasoka, uzye aweni angimilila pa manso yakwe Yawe? Aweni angaposya ukali wakwe uwakofya? Ukali wakwe ukafuluma kwati icimbilimbili ca moto, na mawe iyavungoka pa manso yakwe.

⁷ Yawe umusuma, wene akacingilila antu yakwe mu nsita ya ntazi. Aliwe akawaka yao amutaila.

⁸ Lelo wakwe mulamba uwa mukuku, Yawe akalovya anisi yakwe. Na yao akamusangukila wene akayazingila ku mfwa.

⁹ Uzye icani cino mukumilanila akapi kuti mucitile Yawe? Wene alamonona! Kusi umwi angamusangukila ukuluta pi iila lyonga.

¹⁰ Wa myunga ipombane nupya wa vipelele, mwe antu akolesi mulociwa nu moto!

¹¹ Munuli we Ninive, mwafuma umuntu umwi uwakwata amapange aipe, wino akapangila kusangukila Yawe.

¹² Yawe wavwanga ku antu yakwe aina lzlaeli wati, “Nanti angala aina Asilya akome nupya yavula wakwe cimwi, yene yalononwa mpaka yalowe. Lelo mwe antu yane, nanti namuponyezya amacuzi, ntalatala ncite cico nupya.

¹³ Ndakai namalenga aina Asilya yataya na maka pano muli, nu kuputola iminyololo ino mwanyepelwako.”

¹⁴ Yawe wapeela ilamulo lyapali mwemwe, mwe ina Ninive, ati, “Mutalakwata amu mupanda akuti yatwalilile ukwimika umupanda winu. Nupya ndonona utuluwi twinu utuwaze nu twakwengulula utwaya mu ng'anda ikulu yakwe tuleza twinu. Nkumuteyanyizizya ilindi umwakuti ince muziike, pano mutalinzile kuya nu umi!”

¹⁵ Lolini, uku mwamba kuku, kukwiza umuntu umwi wino asenzile ilandwe lisuma, ilya mutende pa kucimviwa kwa ina Asilya! Mwe antu amu Yuda, si mule muzevye ivimulo vinu, nu kufikilizya imilapo inu kuli Yawe. Antu ya ukakasi yatalatala yazanze impanga inu nupya. Yene yatiyononwa pyu.