Mpendwa 9 - Amazwi Yakwe Leza 2013

Cimulo ca Ucilo cakwe ciili

¹ Umu mwezi wakutandika, uwa mwaka wakwe ciili pano aina Izlaeli yafumile mu mpanga ya Eguputo, Yawe wavwanzile kuli Mose mu Lwanga lwa Sinai, amunena ati,

² “Ukaleke aina Izlaeli yace yaiusya ukuzevya Cimulo ca Ucilo pa nsita iyasontwa nga vino cilinzile ukuya.

³ Uwanda uwalenga ikumi na yani, uwa mwezi uu, lino ilanzi lyatemba ali nsita ino aina Izlaeli yalinzile kuzevya Cimulo ca Ucilo kulingana ni vipope nga na malamulo yakweco.”

⁴ Acino Mose anena aina Izlaeli ukuzevya Cimulo ca Ucilo,

⁵ nga pa wanda uwalenga yani mu mwezi wakutandika, lino ilanzi lyatemba, nayo yacita vivyo kwene mu Lwanga lwa Sinai. Ali vino aina Izlaeli yacisile vyonsi wakwe vino Yawe wapeezile ilamulo kuli Mose.

⁶ Lelo kwali aonsi yamwi yao yano yakweyowizye pamulandu wa kukumya icala, nga yaposiwe kukumako ku kuzevya kwa Cimulo ca Ucilo, mu wanda kwene uwa. Ali pakwiza kuli Mose na Aloni.

⁷ Nga yamunena yati, “Sweswe yakowele pamulandu wa kukumya ku cala, lelo pacani cino tutangazumiliziwa kwizapeela amawila itu apali ponga na anji aina Izlaeli pa nsita iyazumiliziwa?”

⁸ Mose nawe ali pa kuyasuuka ati, “Lolelini mutale muleke nuzye Yawe kuti nuvwe vino amanena pamulandu namwe.”

⁹ Awe nacendi Yawe anena Mose

¹⁰ kuti anene aina Izlaeli ati, “Umuntu wensi ndi wakowela pamulandu wa kukumya icala nanti lino ali ukutali pa lwendo lelo acili akulondesya kuzevya Cimulo ca Ucilo,

¹¹ wene wazumiliziwa kuzevya cimulo cicyo mu mwezi wakwe ciili, pa wanda uwalenga ikumi na yani, lino ilanzi lyatemba. Yalinzile kulya umwana wa mfwele pamwi nu mukate usi na citutumusi alino ni nkwila.

¹² Yene yatalinzile kusya nanti cimwi pali vii ukufika na katondo. Nupya yatakezye kukontola nanti ukukokota ifupa. Ali vino yali nu kuzevya Cimulo ca Ucilo mu kulondela amalamulo yonsi.

¹³ Lelo ndi kwazanwa umuntu umwi pali yao asi akowele ukulingana ni ntambi nanti asi pa lwendo, nga wakana sile kuzevya Cimulo ca Ucilo, umuntu wiyo alinzile kusukulwa mu antu yao pamulandu wakuti atapile uwila wakwe kuli nene pa nsita ino yasontwa. Umuntu wiyo ali nu kulipa pi ifyo lyakwe.”

¹⁴ “Ainamasi yano yakaikala namwe ndi yakasi kuzevya Cimulo ca Ucilo, yalinzile yazevye kulingana ni vipope nga na malamulo yonsi. Ilamulo ilili lyonga kwene likumile umuntu wensi, cisi mulandu ndi wene umwinamasi nanti mukaya.”

Ikumbi lya cilinkwa ca moto

¹⁵ Uwanda kwene uno yasimfile Itaalu lya Ukongano, ikumbi lizile livimbilizya Itaalu. Ukutandika sile amanguzi lino ilanzi lyatemba mpaka kufika na katondo, ikumbi lyali papa kwene papeela ala likuloleka wa moto.

¹⁶ Ali vino ikumbi lilyo lyakonkinye ukuloleka cila wanda, ala usiku likuloleka wa moto.

¹⁷ Lyonsi lino ikumbi ndi lyakatuka, aina Izlaeli iyatenuka, nga pano lyaya limilila apapela ya cifulo apano nayo iyakuula insakwe zyao.

¹⁸ Api lamulo lyakwe Yawe aina Izlaeli iyatenuka, nupya api lamulo lyakwe yakuulanga insakwe. Alino ni nsakwe nazyo zyasyalanga zimilile pa nsita yonsi lino ikumbi lili papela yi Taalu lya Ukongano.

¹⁹ Ndi cakuti ikumbi lyasyala insita ntali apapela yi Taalu, aina Izlaeli yayela ilamulo lyakwe Yawe ukwaula kuti yatenuke.

²⁰ Nsita zimwi ikumbi likalanga sile amanda yanono apapela yi Taalu. Api lamulo lyakwe Yawe aina Izlaeli yakuulanga insakwe zyao, nupya api lamulo lyakwe iyatenuka.

²¹ Nsita zimwi ikumbi likalanga sile ukufuma lino ilanzi lyatemba mpaka kufika na katondo, nga katondo lino lyakatuka, nayo kwene iyatenuka. Lili lyonsi lino ikumbi lyakatuka, nayo kwene iyatenuka.

²² Usi mulandu cingaya pacisila ca manda yaili, nanti umwezi, nanti umwaka, nanti nsita ntali, aina Izlaeli yalinzile kusyala mu nsakwe zyao ukwaula ukutenuka. Lelo lino lilatenuka nayo kwene yalinzile kutenuka.

²³ Aina Izlaeli yakuulanga nu kupangulula insakwe zyao apakuyela ilamulo lino Yawe wapeezile Mose.