Mpendwa 6 - Amazwi Yakwe Leza 2013

Ulayo wa ina Nazili

¹ Nupya Yawe apeela ilamulo kuli Mose

² kuti apeele amazwi yaa autunguluzi ku ina Izlaeli ayanene vino umonsi nanti umwanaci ali wensi ndi walaya icilayo icakulanga ukuti wene umwina Nazili kololo, nu kuipaatula umwisikulu ukuya uwakwe Yawe,

³ lyene alinzile atelelele kumwa waini nu wengwa. Nupya atalinzile kumwa waini musasalume nanti vyonsi visasalume vino yakafena ku matingi, nanti kulya matingi acice nanti aume.

⁴ Ukutandika sile pa wanda uno walaya mpaka ni nsita yonsi ya umi wakwe, wene asi nu kuikumika ku kulya vyonsi vino vikafuma mu calo ca matingi. Ukutandikila ku mpece zya viseekwa ukufika nu ku vipapa kwene.

⁵ Mu nsita zyonsi zya cilayo cakwe cisi cakwezya kupisya ulwembe ku mutwe wakwe. Alinzile wasyala muziliziwe mu umi wakwe onsi. Inyele zyakwe zili nu kusyala vivyo kwene, pano kuli kulanga ukuti wapaatwilwa kuli Yawe

⁶ Nu mu nsita zyonsi zya kupaatwilwa kwakwe kuli Yawe, asi nu kupalama ku vyala.

⁷ Nanti umwi pa akwasi yakwe wafwa, ciye nanti aumwi pa ina yakwe, asi nu kuikowezya pa kuikumika ku ntambi zya ndosya zyao, pamulandu wakuti inyele izili pa mutwe wakwe cili cimanyililo cakuti wene wapaatwilwa kuli Yawe.

⁸ Fwandi insita yonsi ino umuntu walaya ukuya umwina Nazili, ale watapaatwilwa kuli nene ne Yawe.

⁹ Ndi cakuti umuntu wafwa mu kupumikizya, pa nsita ino umwina Nazili ali papo kwene, ale inyele zya mwina Nazili zyakowela. Acino wene alinzile kupela inyele zizyo pa wanda wa kusangululwa, uwanda uwalenga cinimbali.

¹⁰ Alino pa wanda walondelelapo, uwalenga cinani, alinzile watwalila simapepo ivipeele viili nanti ana ya nkunda yaili pa mulyango wi Itaalu lya Ukongano.

¹¹ Lyene simapepo ali nu kupeela kuli Leza, inkunda yonga wa wila wa kwelela amaifyo nayuze ya wila wakoca kuti acitile umuntu wiyo ulutambi lwa kufuta amaifyo kwi iifyo lino akowile pamulandu wa kupalama ku cala. Na pa wanda kwene uwo umuntu ala wapaatwila cipya cipya umutwe wakwe kuli Yawe.

¹² Alinzile kuipeela wensi pyu mu umi wakwe kuli Yawe wa mwina Nazili. Ali cino fwandi ali nu kuleta imfwele, suuku wa mwaka onga, wino alaya uwila wa cizumila mulandu. Amanda akucisila yasikupendelwako ukuti wali mupaatulwe, pano wene wakowizye inyele zyakwe.

¹³ Lyene lii, ilili sunde lya kulondela pa wanda uno umwina Nazili wamalila amanda akupaatwilwa kwakwe. Yalinzile yamutwale ku mulyango wa kwingilila kwi Taalu lya Ukongano.

¹⁴ Kuko akuno atwale amawila yakwe kuli Yawe ali wa mfwele, suuku wa mwaka onga uwaula ulema, aye uwila wakoca, nga ni mfwele yakaci iyaula ulema, iye uwila wa utandano. Alino apeele na suuku uwaula ulema, aye uwila wa kwelela amaifyo,

¹⁵ pamwi na mawila ya cakulya na mawila ya vyakumwa, nga ni cimponda ca mukate usi na citutumusi, imikate itikame iyapangwa nu usu utonyoleke utikinkanye na mafuta, ni mikate ya mpanda ipapatale ipakwe mafuta.

¹⁶ Simapepo alinzile kwiza pela vyonsi vii pa kavuwa kuli Yawe, nga apeele uwila wa kwelela amaifyo nga nu wila wakoca.

¹⁷ Wene alinzile kutoola cimponda ca mukate usi na citutumusi pamwi na suuku nga avipele kuli Yawe, ukuya uwila wa utandano. Alinzile avipelele pamwi na mawila ya cakulya na mawila ya vyakumwa.

¹⁸ Lyene pa mulyango wi Taalu lya Ukongano, umwina Nazili alinzile apele inyele zyakwe nga azisumbile mu moto uno iyocela uwila wa utandano.

¹⁹ Lino umwina Nazili wamala kupela inyele zyakwe, simapepo atoole icikwapa cakwe suuku iceleke, na kapande ka mukate akali mu civiya pamwi na kakeke, vyoili ivisi na citutumusi.

²⁰ Alino simapepo aviswelule pa manso yakwe Yawe wa wila wakuswelula. Vyene ivyamuzilo ivyapeelwa kuli simapepo, ukwikapo ni nganga pamwi nu mwendo. Pacisila cakwe vii, umwina Nazili angamwa waini.

²¹ Yaa, ali masunde ya mwina Nazili, uwalaya ukupeela uwila kuli Yawe ukulingana na masunde ya kupaatulwa kwakwe, kulunda pali consi cino angapeela pa kufikilizya ulayo uno wacita.

Vino yasimapepo yalinzile kupolelela aina Izlaeli

²² Yawe apeela ilamulo kuli Mose

²³ kuti anene Aaloni na ana yakwe ukuomvya amazwi yaa pa kupolelela aina Izlaeli, yala yakuti,

²⁴ “Si Yawe angamupolelela nu kumusunga.

²⁵ Si Yawe angaya nu luse ni cikuku kunomuli.

²⁶ Si Yawe amulange impumi yakwe amupeele nu mutende.”

²⁷ Alino Yawe avwanga ati, “Ndi yataka izina lyane ukuya upolelelo pa ina Izlaeli, indayapolelela.”