Mpendwa 5 - Amazwi Yakwe Leza 2013

Ukuzinga akowele

¹ Yawe anena Mose ati,

² “Pela ilamulo ku ina Izlaeli kuti yazinge umuntu ali wensi mu nsakwe uwalwala tembwe nanti akafumya vimwi vili vyonsi ku vya nzwalo vyakwe, nanti wiyo uwaikowezya ku kukumya ku vyala.

³ Aye umonsi nanti umwanaci, ukumuzingila kunzi ya nsakwe. Pano ndi cisi vivyo, aina Izlaeli yangakowezya insakwe muno nemo natincita wikalo.”

⁴ Fwandi ali vino aina Izlaeli yacisile, iyayazingila kunzi ya nsakwe ndi muno Yawe wakonkomizye Mose.

Ivyakulipa pa kwifya umuntu muzo

⁵ Yawe apeela amazwi yaa autunguluzi kuli Mose,

⁶ kuti anene aina Izlaeli ndi vino umonsi wensi nanti umwanaci ndi waifya iifyo ilyakulenga antu kufutatila kuli Yawe ale wacita mulandu.

⁷ Wene alinzile wailongwela iifyo lino watacita alino na pakulipa alinzile kuwezya cino watatola. Alino alundepo icipande conga pali visano pali cino watalipa. Alino aswilizye vyonsi vii kuli wiya wino aifizye.

⁸ Lelo ndi cakuti wino yafyenzile wafwile alino pasi nu muntu wakwe uwakuti yapeele, lyene ale ivyakulipa vilinzile vilipwe kuli Yawe. Nu wakulya ivintu vivyo ale a simapepo. Na vivyo ale ivyakulunda pali suuku wino simapepo akuomvya pakucita ulutambi lwa kufuta amaifyo.

⁹ Na mawila yauze aiyele yano aina Izlaeli yakaletela Yawe nayo kwene akwe simapepo wino yakapeela.

¹⁰ Cino umuntu wasenda nu kupeela kuli Yawe, cikaya icintu cakwe. Lelo ndi wala wacipela mu makasa yakwe simapepo ala citacili icakwe, casyala icakwe simapepo.

Ivyakucita ku monsi akuzuwila umuci

¹¹ Yawe apeela ilamulo kuli Mose

¹² kuti apeele amazwi yaa autunguluzi ku ina Izlaeli. Monsi ndi cakuti wamanya ukuti umuci ataya ningo, wamuyembukila,

¹³ pano akacita uzelele na onsi yauze mu umfisolo, ale waizewanya umwisikulu, pano kusi angamusinila.

¹⁴ Lelo iya ndi wamutunganya, uvwa nu uzuwa mu mwenzo wakwe, ku muci uwataipupanya mpiti,

¹⁵ umonsi wiyo ali nu kutwala muci kuli simapepo. Alinzile nu kusenda usu wakwe baale kulingana na kilogalamu wenga. Atalinzile kwikapo pa usu nanti cimwi icili wa mafuta nanti ulupiya, pamulandu wakuti wene uwila wa cakulya uwapa kutunganya, uwila wakwiusya umulandu uno wacisile.

¹⁶ Simapepo ali nu kuleta umwanaci wiyo ku kavuwa nu kumwimika inkolelo yakwe Yawe.

¹⁷ Alino ali nu kutapula amanzi yamuzilo mu civiya cimate ni mbulo, nu kutoola ulutukumbu mukasi ki Taalu nu kusumbila mu manzi yao.

¹⁸ Lyene simapepo ali nu kulukulula inyele zya mwanaci wiyo nga amufumbatike uwila wa usu wa ngano. Nawe simapepo ali nu kufumbata mu minwe yakwe amanzi alule, amwavi yano yakaleta icitipu ku muntu uwa mulandu.

¹⁹ Lyene simapepo alinzile anene umwanaci wiyo kuzumila mulapo uu avwange kunoli, ati, “Lapa! Ndi cakuti utacita uzelele, ala lyene vitipu vino amanzi yaa amwavi yakaleta vitamacita cimwi kunuli.

²⁰ Lelo ndi cakuti wala wacita uzelele lino ucitwitwe kuli iya wako nupya wemwisikulu waikowezya apa kumanyana nu monsi muze asi wako,”

²¹ pa pene simapepo alinzile anene umwanaci wiyo kuzumila mulapo uu avwange kunoli ati, “Si Yawe aleke antu yako yakutipe nupya aleke uzewane pakuleka ivyanzwalo vyako vinyaluluke ni ila lya uvyazi wako lifupame, nga ni ndilwa yako ivimbe.

²² Sa manzi yaa yano yakaleta vitipu yingile mu ndilwa yako nu kuleka ivimbe nga ni vyanzwalo vyako vinyaluluke ni ila lya uvyazi wako lifupame.” Lyene umwanaci wiyo alinzile kuzumila ati, “Nazumila. Si Yawe acite vivyo kwene.”

²³ Lyene simapepo alinzile kulemba vitipu vii api pepala nga alitimpike mu manzi alule, amwavi, kuti avifute.

²⁴ Lino atali kuti amwesye umwanaci wiyo amanzi yano yangaleta kuwaya kwipisye kunoli,

²⁵ simapepo alinzile atoole uwila wa usu wa ngano uno uli mu minwe ya mwanaci wiyo, nga akonzolole makasa yakwe, aupaatwile Yawe, nga aupeele pa kavuwa.

²⁶ Alino afokotole ikufi lyonga lya usu uwo uwa wila wa ciusizyo nu kuwoca pa kavuwa. Pacisila cakwe cii, ali pa kumwesya umwanaci wiyo amanzi kwene yaya.

²⁷ Ndi cakuti umwanaci wiyo wala wacita uzelele, ale amanzi yayo yamamuletela kuwaya kwipisye, ni ndilwa yakwe ivimbe, ni vyanzwalo vyakwe vinyale, nga ni ila lya uvyazi wakwe lifupame. Na antu yakwe yalamutipa.

²⁸ Lelo kwene umwanaci wiyo ndi cakuti atacisile uzelele, ale kusi iciipe icingamucitikila nga nu kuvyala angavyala ukunkolelo.

²⁹ Fwandi lilyo ilili sunde lyapa mulandu nu uzuwa ku mwanaci wino wacita uzelele lino acili mu makasa yakwe iya,

³⁰ nanti lino iya wamutunganya ukuti watacita uzelele. Simapepo alinzile amulete ku kavuwa, amwimike inkolelo yakwe Yawe, nga acite lutambi luu ulwi sunde.

³¹ Iya wa mwanaci wiyo asi nu kupelwa mulandu uli onsi. Lelo umwanaci wene ndi wazanwa nu mulandu ale wailetelela.