Mpendwa 35 - Amazwi Yakwe Leza 2013

Imizi ya ina Levi

¹ Yawe anena Mose, ala yali mu manyika aku Moabu, umupipi na Yodani, ulunga na Yeliko, ati,

² “Nena aina Izlaeli ukuti yalinzile ukupeela aina Levi ku mpanga yao, imisumba iya kwikala mwenemo alino ni mpanga yamulemvwe iyakucemela mwenemo ino izingulwike imisumba iyo. Misumba iyo ilaya ivifulo vyao ivyakwikala mwenemo.

³ Yene yalakwata imisumba yakwikala mwenemo nga ni mpanga yamulemvwe iyakucemela mwenemo iviteekwa vyao ivili wa ng'ombe, imbuzi, imfwele, yapunda, ni viteekwa vyuze ivyasyala.

⁴ Impanga yamulemvwe iyakucemela mwenemo umuli nu kupeela ku ina Levi ili nu kutandikila pa cimpinda ca musumba. Ili nu kutalimpa amamita ukuzinguluka.

⁵ Ukunzi ya musumba mukapime nako amamita 900, ku lusansa lwaku ufumondaka amamita 900, ku lusansa lwaku kaeya amamita 900, ku lusansa lwaku uwondaka amamita 900, alino nu ku katutu nako kwene amamita 900, nu musumba ula uli pakasi. Cifulo cii ili mpanga yao yamulemvwe iya kucemela mwenemo iya misumba iyo.”

Misumba iyapilwe ku ina Levi

⁶ “Misumba mutanda pali ino mumapeela aina Levi, ilinzile yaya iyakuzina mwenemo. Ni misumba iyo ilinzile yaya iyakuti umwi ndi watala umulandu uwakukoma umuntu, ali kuno angaya akazine. Nupya muyalundilepo imisumba nayuze amakumi yani na yaili.

⁷ Ali cino fwandi imisumba yao yonsi pamwi ilinzile ukuya 48, apali pamwi ni mpanga yamulemvwe iyakucemela mwenemo.

⁸ Misumba ino mukupeela aina Levi mulinzile mwaipenda ku mpanga ya ina Izlaeli. Wiyo uwakwata impanga ikulu ali wino mungafumya kweneko imisumba ivuleko. Na wino wakwata impanga icepe, nawe mungafumya kweneko imisumba icepelileko. Cila wensi ali nu kucekulako kamwi aka kupeela ku ina Levi, pa misumba ino wakwata, ukulingana ni mpanga ino wapilwe.”

Misumba iyakuzina mwenemo ndi wacita umulandu

⁹ Yawe apeela ilamulo kuli Mose

¹⁰ kuti anene aina Izlaeli ati, “Lino mulalamba Luzi lwa Yodani nu kwingila mu mpanga ya Kenani,

¹¹ muce musolole imisumba iyakuzina mwenemo, kuko kuno umwi uwakoma umuze ukwaula umufulo angutukila.

¹² Misumba iyo ilinzile yaya iyakuzina mwenemo apa kuutuka yakalandula ya wazi. Nu wakoma atanga afwe suka yatala yamupingula api umba.

¹³ Ni misumba iyo ili nu kuya mutanda, ili misumba yakupuukila kweneko ku kuzina.

¹⁴ Misumba itatu muipele ku mbalama yakwe Yodani, alino nayuze itatu nayo ku Kenani, pakuti konsikonsi kuye imisumba yakupuukila kweneko ku kuzina.

¹⁵ Aina Izlaeli yonsi nga na inamasi kwene yano yiiza yikala kunomuli, ndi umwi wakoma umuntu umwi ukusi ku mufulo, wene angapuukila ku muzi onga pa mizi iyo mutanda ku kuzina.”

¹⁶ Lelo kwene ndi cakuti umwi wakoma umuntu ku canzo ca cela, wiyo wene ale inkomi sile. Ni nkomi nayo kwene ilinzile ukukomwa.

¹⁷ Ndi cali cakuti wamupola ni we lino alemile mu minwe, nu muntu wiyo wafwa, ale wene inkomi nga nawe kwene alinzile wakomwa.

¹⁸ Nanti wamulimula ni cimuti cino alemile, nga umuntu wiyo wafwa nu kufwa, ale wene inkomi. Ni nkomi nayo kwene ilinzile ukukomwa.

¹⁹ Kalandula wa wazi ali wino alinzile ukukoma umuntu uwakomile umuntu muze ku mufulo. Ndi wamukomenkanya sile ukumukoma.

²⁰ Ndi cakuti umuntu umwi uwazunya umuze wamukoma, ukumulandu nu lupato, nanti wamupola na cimwi nu kufwa wafwa,

²¹ nanti sile wamuma ni kofi wafwa, ale uwamumile ali nu mulandu, nga nawe kwene alinzile ukukomwa. Nupya kalandula wa wazi ndi wamukomenkanya, ali nu kumukoma.

²² Lelo ndi cakuti wene wamukomile ukwaula ulupato, ale caya sile nsula ali wamukoma wafwa, pa kumusunka nanti kumutama na cimwi.

²³ Nanti limwi atamuweni, alino wamuponyezya iwe, nu kufwa wafwa, umucifulo cakuti atamupata nanti panono,

²⁴ ale iumba lyonsi lili nu kuputula umulandu umukulondela amalamulo aya penepo pa muntu uwakoma umuze na kalandula wa wazi.

²⁵ Iuvi lilinzile kutaasya umuntu wino yapeela umulandu wa utazi wa katwe kuli kalandula wa wazi. Nupya yalinzile kumuswilizya ku musumba wa kuzina kuno wapuukile. Kuli kuno ali nu kutala aikala, suka sile lino Simapepo Mukulu uwapakwa amafuta yamuzilo ace afwe.

²⁶ Uwakomile umuntu ndi cala camukumba wafuma mu musumba uno wapuukilako ku kuzina,

²⁷ alino na kalandula wa wazi wamukomenkanya, ukunzi ya mpanga ya musumba wa kuzina, ale lyene kalandula wa wazi ali nu kumukoma nupya atange apelwe umulandu uwa kukoma.

²⁸ Pano isunde ilya penepo ilyakuti, uwakoma umuntu ali nu kusyala mu musumba wa kuzina mpaka Simapepo Mukulu ace afwe alino lyene angaswilila ku musumba wakwe kuno wafumile.

²⁹ Amasunde yao, yali nu kusyala kuli mwemwe nu kuya ainu amanda pe. Ali masunde akuwakisya konsi kuno mulikala.

³⁰ “Umwi ndi wakoma umuze wafwa, wene atanga apingulwe ukufwa ukwaula yakambone akumusinila. Nupya yatange yamupingule ukufwa pa umboni wa muntu wenga sile.

³¹ Mutakezye ukutoola ulupiya lwa mafukakanwa pa kutuula umuntu ku mulandu wa kukoma umuntu muze. Nawe kwene alinzile ukukomwa.

³² Mutakezye ukuzumila ulupiya ulwa muntu uwakoma umuze, pakuti aswilile ku musumba wakwe ukufuma zuwa mu musumba wa kuzina lino Simapepo Mukulu atacili afwe.

³³ Mutakowezya impanga ino mukaikala mwenemo. Utazi wa katwe ukakowezya impanga. Nupya kutangaya kucitila impanga ulutambi lwa kufuta amaifyo pa kuzwisya uwazi, suka sile wiyo kwene uwazwisizye uwazi wa muntu ali wino angalipa uwazi wakwe pa kuuzwisya pa mpanga iyo.

³⁴ Mutakowezya impanga ino mukaikala mwenemo nupya muno nani kwene nkaikala mwenemo, pasi pano ne Yawe nkaikala pakasi ka ina Izlaeli.”