Mpendwa 32 - Amazwi Yakwe Leza 2013

Ukwankanya impanga yaku mbalama yakwe Yodani

¹ Amu mutundu wakwe Lubeni na wakwe Gadi yakweti iviteekwa ivivule cuze, ing'ombe ni mfwele. Lyene ilola ukuti impanga zya ina Yazeli na ina Gileadi iziyalinga ukucemelako iviteekwa ivikalamba.

² Acino yaile kuli Mose na Eleaza simapepo nu ku ntunguluzi zyuze zi uvi, iyayanena yati,

³ “Umuputule uu uwa mpanga ino Yawe wataazwilizya aina Izlaeli ukwingila mwenemo, imisumba ya Ataloti, Diboni, Yazeli, Nimula, Hesyiboni, Eleale, Sibamu, Nebo, nga na Beoni,

⁴ twalola ukuti isuma cuze ukucemelako iviteekwa.

⁵ Swemo fwandi twalenga impanga iyo ukuti ili ino mutwankanye. Nupya swemo tusikulonda ukulamba ku mbalama ya Yodani.”

⁶ Mose aasuka ati, “Uzye mukunena ukuti anyonko ndi yaya ku nkondo mwemo mulasyala mutenzi kuno kwene?

⁷ Uzye kuko kusi kuli kutovola auzo apakukana ingila mu mpanga ino Yawe walaya?

⁸ Nupya vivyo kwene avino na yaso yacisile lino nayatumile ku kwendezya impanga, ala tuli ku Kadesyi Banea.

⁹ Pacisila cakutumbela impanga ilya suka iyafika nu ku Cifoloma ca Esyikoli, yalola vino impanga ili, yene yatovwile aina Izlaeli, ukukana ingila mu mpanga ino Yawe wayapile.

¹⁰ Yawe nawe wasosile, nga alapa ati,

¹¹ ‘Nalapa ukuti pamulandu wakuti yatatwalilile ukuya acumi kunondi, kusi nanti wenga uwamu antu yonsi ali ni myaka amakumi yaili nanti ukuluta, yano yafumile mu mpanga ya Eguputo, alalola impanga ino nalavile Abulaamu, Isaki, na Yakobo.’

¹² Umulapo uwo wakumile umuntu wensi ukufumyako sile Kalebu umwana wakwe Yefune umwina Kenizi alino na Yoswa umwana umonsi wakwe Nuni. Yao ali yano yalondile vino Yawe walondanga umucumi.

¹³ Yawe wasokile aina Izlaeli nga aleka yalulumba mu lwanga pa myaka amakumi yani, mpaka inkulo yonsi ino itamuzanzizye ifwa.

¹⁴ Mwalola lyene mwe ntalanganyi mwe! Mwapyanikizya pali yaso. Mwalundapo na pa cipyu cakwe Yawe cino wakwatile aina Izlaeli lili.

¹⁵ Ndi mwala mwatalamila Yawe, nupya kwene wene alatazyela antu ya yonsi mu lwanga, nga mwemwe mulalenga kuti yalowe”.

¹⁶ Lyene nayo iyapalamila Mose iyamunena yati, “Utale fwandi utuzumilizye kukuula amaluwa ya viteekwa vitu ni misumba mwakuti aci itu na ana itu yatundumale.

¹⁷ Lyene alino swemo sweisikulu tulasenda ivyanzo nu kukolelela aina Izlaeli pa nkolelo. Tulayatwala nu ku ncende ino yayasontelile. Ana itu yalasyala yakwikala mu misumba izingulusye na malinga ku mulandu wa kuyacingilila ku ikazi ya mpanga ii.

¹⁸ Tukulaya ukuti tutalatala tuswilile kumwitu suka sile tukasininkizye ukuti cila muntu mu ina Izlaeli wakwata impanga.

¹⁹ Alino swemo tutalakwata impanga ku mbalama yuze ya Yodani, pamulandu wakuti twapelwa mpiti impanga muno mbalama lwaku ufumondaka wakwe Yodani.”

²⁰ Mose apakuvwa vivyo aasuka ati, “Kwene mu cumi ndi cakuti mukulandilila, pa manso yakwe Yawe nani ali cino nkuti icisuma iteyanyini ku ulwi.

²¹ Aonsi yonsi akwinu akalwa ulwi yalinzile kulamba Luzi lwa Yodani na pi lamulo lyakwe Yawe yalinzile kuzanza anisi itu suka Yawe ayacimvye

²² nu kupoka impanga ilya. Pacisila cakwe cico mungawela, pamulandu wakuti ala mwatimufikilizya umulimo winu kuli Yawe nu ku ina Izlaeli asyala. Lyene Yawe angamunena ukuti impanga ii lwaku ufumondaka wa Yodani iyakwinu.

²³ Lelo ndi mwaposiwa ukucita cii, ale mwaifya kuli Yawe nga sininkizini ukuti mulavunukwa pa maifyo inu.

²⁴ Aleni lyene kuulini imisumba umwa kwikala aci inu na ana inu, mukuule ni vitata umwa kusunga imfwele ni mbuzi zinu. Lelo mulinzile kufikilizya vino mwalaya ukucita!”

²⁵ Aina Gadi na amu mutundu wakwe Lubeni iyanena Mose yati, “Musambazi, icumi tulacita wakwe vino watupeela ilamulo.

²⁶ Aci itu pamwi na ana itu pamwi ni ng'ombe ni mfwele yalasyala yakwikala mu misumba ya kuno ku Gileadi.

²⁷ Lelo swensi swemuno tuli ni vyanzo tulalamba mu mbalama ku kulwa inkondo ndi muno Yawe wavwangile.”

²⁸ Lyene Mose pali pakupeela malamulo kuli Eleaza simapepo na Yoswa umwana umonsi wakwe Nuni nga nu ku ntunguluzi zya ng'anda zya mitundu ya ina Izlaeli, ati,

²⁹ “Ndi cakuti aina Gadi na amu mutundu wakwe Lubeni yalamba Luzi lwa Yodani ku kulwa inkondo pamwi namwe, alino mwaya mwacimvya ulwi ku maka yakwe Yawe, lyene muce muyapeele impanga ilya ya Gileadi iye iyakwao.

³⁰ Lelo ndi cakuti yatasenzile ivyanzo vyao, yakana nu kulamba, ale lyene yali nu kwankanyiwa impanga mu Kenani pamwi na ina Izlaeli yauze.”

³¹ Alino aina Gadi na amu mutundu wakwe Lubeni yamunena yati, “Musambazi, tulacita wakwe vino Yawe wapeela ilamulo.

³² Tulalamba imbalama yakwe Yodani pamwi ni vyanzo vitu, wakwe vino Yawe wapeela ilamulo, pakuti yace yatupele impanga itu kuno mbalama ya Yodani.”

³³ Acino Mose aankanya umutundu wakwe Gadi na wakwe Lubeni nga na citika wa mutundu wakwe Manase umwana wakwe Yosefu, impanga yonsi yakwe Siooni umwene wa ina Amoli, na yakwe Ogi umwene wa ina Basyani, ukuminkanya kumwi ni misumba yonsi ni mpanga iyayazinguluka.

³⁴ Aina Gadi iyakuululula imisumba izingulusye amalinga iya Diboni, Ataloti, Aloeli,

³⁵ Atiloti Syofani, Yazeli, Yogobeya,

³⁶ Beti Nimula, nga na Beti Halani, nga yakuula ni vitata vya mfwele ni mbuzi zyao.

³⁷ Aina Lubeni nayo iyakuululula imisumba ya Hesyiboni, Eleale, Kilyataimu,

³⁸ Nebo, Baali Meoni (amazina yaa yasenulwa), na Sibima. Lino yizile iyakuululula imisumba iyo, iyaitemela amazina yauze.

³⁹ Amu mupanda wakwe Makili umwana wakwe Manase yaile ku Gileadi, iyapoka impanga nu kuzinga aina Amoli aikala mwenemo.

⁴⁰ Acino Mose apeela Gileadi ku aluko lwakwe Makili, amu mupanda wakwe Manase, nga nayo muli muno yikala.

⁴¹ Yaili, uwamu mupanda wakwe Manase, nawe aya apoka imizi ya kweneko nga aitemela amazina ati, “Imizi yakwe Havoti Yaili.”

⁴² Noba nawe aya azanza nu kupoka umusumba wa Kenati kumwi ni mizi ya mumbali, nga autemela ni zina lyakwe, lya Noba.