Mpendwa 31 - Amazwi Yakwe Leza 2013

Inkondo Yamuzilo yakulwisya aina Midyani

¹ Yawe anena Mose ati,

² “Landwila aina Izlaeli cilanduzi cakwe vino aina Midyani yayacitile. Pacisila cakuyalandwila, lyene ungafwa.”

³ Acino Mose anena antu ati, “Yamwi muli mwemwe kayatole ivyanzo pakuti tuye ku kulwisya aina Midyani nu kulandula pali vino yacisile ku ina Izlaeli.

⁴ Muli cila mutundu wa ina Izlaeli mutume asilika izimbi lyonga ankondo.”

⁵ Acino iyaama aonsi amu nko zya ina Izlaeli, izimbi lyonga ukufuma muli cila mutundu. Yonsi pamwi yali ukulingana na mazimbi ikumi na yaili, yao aiteinye ku ulwi.

⁶ Mose pali pakuyatuma ku nkondo. Ayapeela Pineasi umwana wakwe Eleaza simapepo, uwawakanga iviya vyamuzilo alino ni ntandala zyakulizya pa kuyasopa.

⁷ Ali vino yaile yalwisya aina Midyani, wakwe vino Yawe wapeezile Mose ilamulo. Iyakoma aonsi yonsi.

⁸ Iyasalipa na yamwene yasano ya ina Midyani, ali wakwe Evi, Lekemu, Zuli, Huli na Leba. Iyakomola kumwi na Balamu umwana wakwe Beoli.

⁹ Aina Izlaeli iyasenda anaci aina Midyani kumwi na ana yao kuno yikalanga. Iyapokolola ni viteekwa vyao ivili wa ng'ombe kumwi ni vyuma vyao.

¹⁰ Iyasya yatumula nu moto nu koca imisumba yao muno yikalanga, kumwi ni nsakwe zyao.

¹¹ Alino lyene iyakusa vyonsi vino yasenzile kumwi na antu kwene ni viteekwa,

¹² iyavitwala kuli Mose na Eleaza simapepo alino nu kwi uvi lyonsi lya ina Izlaeli, yao akongine ku nsakwe yaku manyika aku Moabu, mu pipi na Yodani ulunga na Yeliko.

Yakomola anaci nu kusangulula vino yasenzile

¹³ Mose, Eleaza simapepo nga ni ntunguluzi zyonsi zi uvi iyafuma mu nsakwenu kuya komenkaya ivita.

¹⁴ Mose pasi pakusokela intunguluzi zya vita vyonsi, yamusika akalamba ampuka ya vita cila izimbi lyonga, alino na yamusika akalamba ya vita umwanda onga awezile ku nkondo.

¹⁵ Alino ayuzya ati, “Uzye pacani cino mwaleka anaci yayo yonsi yasyale apuma?

¹⁶ Uzye mutamanyile ukuti yakwene ali yano apakulondela umpandamano wakwe Balamu yalenzile kuti aina Izlaeli yafutuke nu kusangukila Yawe mu mulandu wa pa Peoli, cakuti impungo yizile ipona pa ina Izlaeli.

¹⁷ Aleni ndakai komini ana aonsi yonsi, mukome nu mwanaci wensi wiyo uwala watala wamanyana nu monsi.

¹⁸ Lelo musye akazyana yonsi yano yasunga ivisungu vyao. Yene akwinu, mungayaomvya.

¹⁹ Lyene mwensi mwemuno mwakoma umuntu ali wensi nanti mwakumizye ku cala mulinzile ukwikala kunzi ya nsakwe pa manda cinimbali. Pa wanda uwalenga yatatu nga na pa wanda uwalenga cinimbali mulinzile mwaisangulula mweisikulu kumwi na anaci yano mwasenzile mu nkondo.

²⁰ Mulinzile ukufula insalu zinu zyonsi, na vyonsi ivyapangwa ku mpapa, na vyonsi ivyapikulwa na uulu wa mavumbu ya mbuzi, na vyonsi ivyapangwa ni mbao.”

²¹ Alino Eleaza simapepo nawe anena asilika yano yawezile ku nkondo ati, “Icipope conga pa masunde yano Yawe wanenyile Mose aeci cakuti,

²² zaabu, siluva, umukuwa, ivyela, ivikopo nu mutovwe,

²³ nga ni cili consi icitangapya mu moto, muce mucizimwile mu moto, ali lino lyene cingaya icisangulule. Nga lelo kwene cili nu kusangululwa mu manzi akufumya amakombela. Nupya consi, cico icingapya mu moto naco kwene icakupisya mu manzi.

²⁴ Pa wanda uwalenga cinimbali muce mukafule ivyakuzwala vinu. Ali lino lyene mulaya asangululwe nga lyene mungazumiliziwa kuswilila mu nsakwe.”

Yankana ivisampwe

²⁵ Yawe anena Mose ati,

²⁶ “Wewe na Eleaza simapepo, pamwi ni ntunguluzi zyuze izi uvi, mulinzile kupenda ivisampwe vyonsi vino mwasenzile kumwi na antu ni nyama kwene.

²⁷ Alino uwankanye ivisampwe apakasi. Citika wakwe vivyo upeele antu aile ku kulwa inkondo. Alino citika muze upeele ku antu yonsi asyala.

²⁸ Ku cipande ca vita, ivyalwile inkondo ufumye kweneko uwila wakwe Yawe. Icintu conga pa myanda isano muli cila vintu, ciye mu viteekwa, mu antu, muli yapunda nanti mu viteekwa vinono.

²⁹ Uwatola icipande conga icakupeela simapepo Eleaza, wa wila ucindamisye wakwe Yawe.

³⁰ Ku cipande ca ina Izlaeli, uwafumya kweneko icintu conga pa makumi yasano. Ciye mu antu, mu viteekwa vikalamba, muli yapunda, mu viteekwa vinono nu mu nyama zyonsi, uwapeela aina Levi akaomba umulimo mwi Taalu lya Ukongano”

³¹ Acino Mose na Eleaza simapepo yacisile wakwe vino Yawe wapeezile ilamulo kuli Mose.

³² Fwandi ivisampwe vyonsi vino vyasile pali vino aile ku nkondo yaile yasampa vyali ndi vii: imbuzi ni mfwele zyali 675,000,

³³ ing'ombe zyali 72,000,

³⁴ yapunda yali 61,000,

³⁵ nga na anaci atatazile yamanye umonsi yali 32,000.

³⁶ Icipande cuze, ca visampwe cino yapile ivita ivyaile ku nkondo, cali wakwe vii mu kulondolola: imfwele ni mbuzi zyali 337,500,

³⁷ nga muli zizyo, 675 uli wila uno yapaatwilile Yawe,

³⁸ ing'ombe zyali 36,000, nga muli zizyo, 72 uli wila uno yapaatwilile Yawe,

³⁹ yapunda 30,500, nga muli yayo, 61 uli wila uno yapaatwilile Yawe,

⁴⁰ antu yali 16,000, nga muli yayo, 32 uli wila uno yapaatwilile Yawe.

⁴¹ Acino Mose wapeezile uwila kuli Eleaza simapepo wa wila ucindamisye uno wapelwa kuli Yawe, wakwe vino Yawe wapeezile ilamulo kuli Mose.

⁴² Icipande cino iuvi lya ina Izlaeli lyapilwe, cali icili conga na cino aile ku nkondo yapilwe.

⁴³ Icipande cii uvi, imfwele ni mbuzi vyali 337, 500,

⁴⁴ Ing'ombe zyali 36,000,

⁴⁵ yapunda yali 30,500,

⁴⁶ na antu 16,000.

⁴⁷ Ukufuma mu cipande cii cino iuvi lya ina Izlaeli lyapilwe, Mose watozile conga pa makumi yasano ya azya ni vinyama wakwe vino Yawe wapeezile ilamulo. Alino avipela ku ina Levi aombanga incito ya mwi Taalu lya Ukongano.

⁴⁸ Alino yamusika ampuka ya vita cila izimbi lyonga, na yamusika ampuka ya vita umwanda onga, iyaya kuli Mose

⁴⁹ iyamunena yati, “Musambazi, aomvi yako yatiyapenda antu yano yasenzile ku nkondo, iyazana ukuti pasi nanti wenga wino yaponzizye.

⁵⁰ Ali cino cila muntu muno tuyelile twaleta utuntu tumwi tuno twalombwile utwapangwa kuli zaabu. Twati katuvipeele kuli Yawe kuti yatucitile ulutambi lwa kufuta amaifyo. Ni vintu vivyo vili wakwe tunekelesi, utuwangili, amakoza aku makasa, imbalaminwe, amaelena ni viyembelo vyuze.”

⁵¹ Mose nawe pamwi na Eleaza simapepo, iyatola zaabu pamwi nu tuyembelo tonsi kunoyali.

⁵² Uwila wakwe zaabu onsi uno yamusika akalamba ya vita yapezile kuli Yawe wanyomile amakilogalamu angapalama ku myanda iili.

⁵³ Yao asilika atali yamusika ya vita, yene yaisungile ivintu vino yasamfile aisikulu.

⁵⁴ Acino Mose pamwi na Eleaza simapepo, iyatola zaabu kuli yamusika akalamba ya vita umwanda onga, na yamusika ya vita izimbi, iyatwala ukwi Taalu lya Ukongano pakuti Yawe acingilile antu yakwe.