Mpendwa 29 - Amazwi Yakwe Leza 2013

Uwila wa kupeela pa kuzengela umwaka upya

¹ “Pa wanda wakutandika uwa mwezi uwalenga cinimbali, mulinzile kukongana ku mapepo, nupya mutakaombe umulimo uli onsi. Kunomuli uli wanda wakulizya intandala.

² Muli nu kupeela pa wanda uwo uwila wakoca, uwa mununko usuma ukazanzya Yawe. Vii, vili nu kuya kacipambasi konga, na suuku wenga, nu twana cinimbali utwa mfwele utwa mwaka onga tuno tutakweti ulema nanti umwi.

³ Papela yakwe cila kacipambasi, muce mwalunda penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Alino pali suuku napo amakilogalamu yaili.

⁴ Alino na pali cila wenga pa ana cinimbali ya mfwele, muce mwalunda penepo kilogalamu wenga.

⁵ Kuye kweneko na sawe wenga uwa wila wa kwelela amaifyo kuti mucite ulutambi lwa kufuta amaifyo inu.

⁶ Vii, ali vyakulunda pa wila wakoca uno yakupeela cila wanda pa wanda wakutandika wa cila mwezi ukulunda penepo pa wila wa cakulya nga nu wila wa vyakumwa. Yene amawila akocela Yawe, amununko usuma ukazanzya Yawe.

Amawila yakupeela pa wanda wa kupapatila maifyo

⁷ “Mu wanda uwalenga ikumi uwa mwezi uwalenga cinimbali, muce mwakongana pamwi ku mapepo. Muli nu kuikanya ukulya, alino nu kuntaomba umulimo uli onsi.

⁸ Nupya muli nu kupeela kuli Yawe uwila wakoca, uwa mununko usuma ukazanzya Yawe. Muli nu kupeela kacipambasi konga, alino na suuku wenga, alino nu twana cinimbali utwa mfwele utwa mwaka onga, nupya ututakweti ulema nanti umwi.

⁹ Papela yakwe cila kacipambasi, muce mulunde penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Alino pali suuku napo amakilogalamu yaili.

¹⁰ Alino na pali cila wenga pa ana cinimbali ya mfwele, muce mulunde penepo kilogalamu wenga.

¹¹ Kuye kweneko na sawe wenga uwa wila wa kwelela amaifyo, ukulunda pa wila wa kwelela amaifyo uwa lutambi lwa kufuta amaifyo nga napa wila wakoca uwa cila wanda ukulunda papela ya wila wa cakulya nu wila wa vyakumwa.

Amawila ya kupeela pa wanda ukulu uwa nsakwe

¹² “Umu wanda uwalenga ikumi na yasano, mu mwezi wakwe cinimbali kwene, mulinzile mwakongana ku kupepa, nupya mutalinzile ukuombamo umulimo nanti umwi uno ukaombwa lyonsi. Mulinzile ukuzanganzila kuzevya kuko ukulasenda amanda cinimbali mu kucindika Yawe.

¹³ Muli nu kupeela uwila wakocela Yawe, uwa mununko usuma ukazanzya Yawe. Vili nu kuya tucipambasi ikumi na tutatu, yasuuku yaili nu twana twa mfwele utwa mwaka onga nato ikumi na tuni, ututakweti ulema nanti aumwi.

¹⁴ Papela yakwe cila kacipambasi, muce mwalunda penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Alino pali suuku napo amakilogalamu yaili.

¹⁵ Alino na pali cila wenga pa ana ya mfwele, muce mwalunda penepo kilogalamu wenga.

¹⁶ Kuye kweneko na sawe wenga uwa wila wa kwelela amaifyo. Vii, ali vyakulunda pa wila wakoca wakwe cila wanda pamwi nu wila wa cakulya nu wila wa vyakumwa.

¹⁷ “Pa wanda wakwe ciili, muli nu kupeela tucipambasi ikumi na twiili, yasuuku yaili nu twana twa mfwele utwa mwaka onga nato ikumi na tuni, ututakweti ulema nanti aumwi.

¹⁸ Pamwi na yacipambasi, na yasuuku na ana ya mfwele, muli nu kupeela amawila ya cakulya na mawila ya vyakumwa kulingana ni mpendwa yakwe yacipambasi, yasuuku, na ana ya mfwele.

¹⁹ Kuye kweneko na sawe wenga uwa wila wa kwelela amaifyo. Vivyo ali vyakungilizya pa wila wakoca uwa cila wanda pamwi nu wila wa cakulya nu wa vyakumwa vyao.

²⁰ “Pa wanda uwalenga yatatu, muli nu kupeela ing'ombe, yacipambasi ikumi na wenga, yasuuku yaili, nu twana twa mfwele utwa mwaka onga ikumi na tuni ututakweti ulema nanti aumwi.

²¹ Pamwi na yacipambasi, yasuuku na ana ya mfwele, muli nu kupeela amawila ya cakulya na mawila ya vyakumwa kulingana ni mpendwa yakwe yacipambasi, yasuuku, na ana ya mfwele.

²² Kuye kweneko na sawe wenga uwa wila wa kwelela amaifyo. Vivyo ali vyakungilizya pa wila wakoca uwa cila wanda, nu wa cakulya nu wa vyakumwa vyao.

²³ “Pa wanda wakwe cini muce mwatuula yacipambasi ikumi lyonga, yasuuku yaili, nu twana twa mfwele utwa mwaka onga ikumi na tuni ututakweti ulema nanti aumwi.

²⁴ Pamwi na yacipambasi, yasuuku na ana ya mfwele, muli nu kupeela amawila ya cakulya na mawila ya vyakumwa mu kulondela iceo kulingana ni mpendwa yakwe yacipambasi, yasuuku, na ana ya mfwele.

²⁵ Kuye kweneko na sawe wenga uwa wila wa kwelela amaifyo. Vivyo ali vyakungilizya pa wila wakoca uwa cila wanda, nu wa cakulya nu wa vyakumwa vyao.

²⁶ “Pa wanda uwalenga yasano muce mwatuula yacipambasi fundimbali, yasuuku yaili, nu twana twa mfwele utwa mwaka onga ikumi na tuni ututakweti ulema nanti aumwi.

²⁷ Pamwi na yacipambasi, yasuuku na ana ya mfwele, muli nu kupeela amawila ya cakulya na mawila ya vyakumwa mukulondela iceo, kulingana ni mpendwa yakwe yacipambasi, yasuuku, na ana ya mfwele.

²⁸ Kuye kweneko na sawe wenga uwa wila wa kwelela amaifyo. Vii, ali vyakulunda pa wila wakoca uwa cila wanda, nu wa cakulya nu wa vyakumwa vyao.

²⁹ “Pa wanda uwalenga mutanda muli nu kupeela ing'ombe, yacipambasi cinani, yasuuku yaili, nu twana twa mfwele utwa mwaka onga ikumi na tuni ututakweti ulema nanti aumwi.

³⁰ Pamwi na yacipambasi, yasuuku na ana ya mfwele, muli nu kupeela amawila ya cakulya na mawila ya vyakumwa mukulondela iceo, kulingana ni mpendwa yakwe yacipambasi, yasuuku, na ana ya mfwele.

³¹ Kuye kweneko na sawe wenga uwa wila wa kwelela amaifyo. Vivyo ali vyakungilizya pa wila wakoca uwa cila wanda, nu wa cakulya nu wa vyakumwa vyao.

³² “Pa wanda uwalenga cinimbali muli nu kupeela ing'ombe, yacipambasi cinimbali, yasuuku yaili, nu twana twa mfwele utwa mwaka onga ikumi na tuni ututakweti ulema nanti aumwi.

³³ Pamwi na yacipambasi, yasuuku na ana ya mfwele, muli nu kutuula amawila ya cakulya na mawila ya vyakumwa mukulondela iceo, kulingana ni mpendwa yakwe yacipambasi, yasuuku, na ana ya mfwele.

³⁴ Kuye kweneko na sawe wenga uwa wila wa kwelela amaifyo. Vivyo ali vyakungilizya pa wila wakoca uwa cila wanda, nu wa cakulya nu wa vyakumwa vyao.

³⁵ “Pa wanda uwalenga cinani, mulinzile kukongana ku mapepo nupya kusi ukuombamo umulimo uli onsi uno ukaombwa lyonsi.

³⁶ Muli nu kupeela uwila wakoca, uwa mununko usuma ukazanzya Yawe. Vili nu kuya cipambasi wenga, suuku wenga nu twana twa mfwele utwa mwaka onga nato cinimbali, vyonsi ivyaula ulema nanti umwi.

³⁷ Pamwi na yacipambasi, yasuuku na ana ya mfwele, muli nu kupeela amawila ya cakulya na mawila ya vyakumwa, mukulondela iceo, kulingana ni mpendwa yakwe yacipambasi, yasuuku, na ana ya mfwele.

³⁸ Kuye kweneko na sawe wenga uwa wila wa kwelela amaifyo. Vii, ali vyakulunda pa wila wakoca uwa cila wanda, nu wa cakulya nu wa vyakumya vyao.

³⁹ “Vivyo ali vyeo vino muli nu kulondela pa kupeela amawila kuli Yawe mu manda inu yonsi a vimulo vyakuzevya. Vii, ali vya kulunda pa mawila inu akufikilizya ulayo uwakuzanzya Yawe, alino na pa mawila yakoca pamwi na mawila ya cakulya na a vyakumwa, nga na pa mawila autandano.”

⁴⁰ Acino Mose ali pakunena aina Izlaeli vyonsi kulingana na vino Yawe wamupeezile ilamulo.