Mpendwa 28 - Amazwi Yakwe Leza 2013

Amalamulo ya pamulandu na mawila

¹ Yawe apeela ilamulo kuli Mose ati,

² “Peela ilamulo lii ku ina Izlaeli uyanene uti, ‘Mulinzile ukusakamala ukutwalila Yawe amawila yakwe pa nsita ilinzile, uwila wa vyakulya uwakoca, uwa mununko usuma ukazanzya Yawe.’

³ “Uyanene ukuti yaa ali mawila ya cakulya yano mulinzile ukupeela kuli Yawe: apakupeela uwila wakoca cila wanda, yalinzile ukupeela yasuuku yaili ali nu mwaka onga nupya asi nu ulema uli onsi.

⁴ Imfwele, suuku wenga, ali mpolelwa yakungocela akatondo, nga muze nawe amanguzi.

⁵ Mwapeela impolelwa zii pamwi na kilogalamu wenga uwa usu utonyoleke ningo uwa wila wa cakulya uno yatikinkanya na mafuta yakwenga angalingana na lita wenga.

⁶ Ukwene uli wila wakoca pee, uno inkolelo wapezilwe pa Mwamba wa Sinai uwa mununko usuma ukazanzya Yawe. Ukwene uli wila wakocela Yawe.

⁷ Ivyakumwa vino yali nu kulunda penepo, vili nu kuya amawotolo yaili yakwe waini pali cila mfwele yonga. Ni vyakulya vivyo ivyakupeela kuli Yawe, yali nu kuviitila mu Ncende Yamuzilo.

⁸ Imfwele yakwe ciili, suuku, uli nu kumupeela wa mpolelwa yakoca amanguzi apali pamwi nu wila wa vyakulya ni vyakumwa ndi muno cimayelanga mu katondo. Uu, uli wila uwakocela Yawe, uwa mununko usuma ukazanzya Yawe.

Uwila wakupeela api Sabata

⁹ “Pa wanda wi Sabata muce mwapeela imfwele, yasuuku yaili a mwaka onga, izyaula ulema nanti umwi. Nu kulunda penepo uwila wakwe waini nu wila wa cakulya uwa makilogalamu yaili ya usu utonyoleke, uno yatikinkanya na mafuta ya miolivi.

¹⁰ Fwandi uwila uwo uwakoca, uwakulundapo pa Sabata ku wila wakoca cila wanda pamwi ni vyakumwa kwene vyakweo.

Uwila wakupeela pa Ndoleko ya Mwezi

¹¹ “Pa wanda wakutandika umwezi, muce mwafyulila Yawe inyama zya wila wakoca, yacipambasi yaili, suuku wenga, utwana cinimbali utwa mfwele utwa mwaka onga nupya ututakweti ulema nanti umwi.

¹² Papela yakwe cila cipambasi, muce mwalunda penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Na papela yakwe cila mfwele, suuku, muce mwalunda penepo amakilogalamu yaili ya wila wa cakulya uwa usu utonyoleke utikinkanye na mafuta ya miolivi.

¹³ Papela yakwe cila mwana wa mfwele, muce mwalunda penepo kilogalamu wenga uwa wila wa cakulya uwa usu utonyoleke uno yatikinkanya na mafuta ya miolivi. Uwo uli wila wakoca, uwa mununko usuma ukazanzya Yawe. Ukwene uli wila wakocela Yawe.

¹⁴ Papela yakwe cila cipambasi, muce mwalunda penepo uwila wa vyakumwa ukulingana icipimo ca malita yasano, pali suuku nawe amalita yatatu, alino pali cila kana ka mfwele napo amalita yaili. Fwandi uwo nayo uli wila wakwe cila mwezi uwakoca nu kupeela pali cila ndoleko ya mwezi mu mwaka.

¹⁵ Alino ukulunda penepo pa wila wakoca nu wila wa vyakumwa uwa cila wanda yali nu kufyulila Yawe sawe wenga wa wila wa kwelela amaifyo.

Uwila wa kupeela pa wanda wakulya ivyakulya ivyaula citutumusi

¹⁶ “Pa wanda uwalenga ikumi na yani uwa mwezi wakutandika, palinzile paya ukucindika uwanda wa Cimulo ca Ucilo.

¹⁷ Nupya pa wanda uwa mwezi kwene uwo uwalenga ikumi na yasano (15), yali nu kutandika kuzanganzila kuzevya kuko ukulasenda amanda cinimbali. Pa manda cinimbali yali nu kulya imikate isi na citutumusi.

¹⁸ Pa wanda wakutandika kuzanganzila kuzevya kuko, yalinzile kukongana ku kupepa, nupya yatalinzile ukuombamo umulimo nanti umwi uno ukaombwa lyonsi.

¹⁹ Yapele kuli Yawe uwila wakoca. Yapele tucipambasi twiili, suuku wenga nu twana cinimbali utwa mfwele, utwa mwaka onga nupya utusi nu ulema nanti umwi.

²⁰ Papela yakwe cila cipambasi, muce mwalunda penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Alino pali suuku napo amakilogalamu yaili.

²¹ Alino na pali cila wenga pa ana cinimbali ya mfwele, muce mwalunda penepo kilogalamu wenga.

²² Kuye kweneko na sawe wenga uwa wila wa kwelela amaifyo kuti yacite ulutambi lwa kufuta amaifyo inu.

²³ Vii, vili vyakulunda pa wila wakoca uno yakapeela akatondo, amanda pe.

²⁴ Mu musango kwene uu ali vino muli nu kupeela uwila wa usu uwakocela Yawe cila wanda pa manda cinimbali, uwa mununko usuma ukazanzya Yawe. Mwapeela vivyo mu kulunda penepo pa wila wakoca wakwe cila wanda pamwi nu wila wakwe waini.

²⁵ Pa wanda uwalenga cinimbali muce mwalongana ku kupepa, nupya mutaezya ukuombamo umulimo uli onsi uno ukaombwa lyonsi.

Amawila yakupeela pa wanda ukulu wa uzombozi

²⁶ “Pa wanda wankolelo uwakuzevya Cimulo ca Uzombozi, lino mukapeela iviseekwa vyankolelo kuli Yawe, muce mwakongana pamwi ku kupepa, nupya mutakezye ukuombamo umulimo uli onsi uno ukaombwa lyonsi.

²⁷ Uwila wakoca wene muli nu kupeela kuli Yawe, uwa mununko usuma ukazanzya Yawe. Pakupeela, mupeele tucipambasi twiili, na suuku wenga, nu twana cinimbali utwa mfwele utwa mwaka onga, tuno tutakweti ulema nanti umwi. Uwila uu uwa mununko usuma ukazanzya Yawe.

²⁸ Papela yakwe cila cipambasi wa ng'ombe, muce mwalunda penepo amakilogalamu yatatu ya wila wa cakulya uwa usu utonyoleke utikinkanye na mafuta ya miolivi. Alino pali suuku napo amakilogalamu yaili. Uwila uu uwa mununko usuma ukazanzya Yawe.

²⁹ Alino na pali cila wenga pa ana cinimbali ya mfwele, muce mwalunda penepo kilogalamu wenga.

³⁰ Kuye kweneko na sawe wenga uwa lutambi lwa kufuta amaifyo inu.

³¹ Vivyo vili vyakulunda penepo pa wila wakoca uwa kupeela cila wanda, na pa wila wa cakulya cico cino yakapeela penepo, nga nu wila wa vyakumwa. Inyama zii zyonsi zilinzile kuya izyaula ulema.