Mpendwa 27 - Amazwi Yakwe Leza 2013

Ana anaci yakwe Zelofeadi

¹ Alino lyene ikwiza ana anaci yakwe Zelofeadi, umwana wakwe Hefeli, umwana wakwe Gileadi, umwana wakwe Makili, umwana wakwe Manase, umwana wakwe Yosefu. Amazina ya ana yaya anaci a Maala, Nowa, Hogila, Milika na Tiliza.

² Awe mukwai yiiza ku nkolelo yakwe Mose, simapepo Eleaza, intunguluzi, nga ni uvi lyonsi pa mulyango wi Taalu lya Ukongano nga yati,

³ “Swemo tata wafwilile mu lwanga ukwaula ukusya umwana umonsi nanti wenga. Nupya atali pi umba lyakwe Kola ilyatalamile Yawe. Wene waifwilile sile ukwi iifyo lyakwe iliiyele.

⁴ Fwandi pacani cino izina lyakwe tata lingalowa mu mutundu wakwe? Mutupeele impanga naswe mukasi ka ina itu yonsi.”

⁵ Awe mukwai Mose atuula mulandu uwo kuli Yawe.

⁶ Yawe nawe avwanga kunoli ati,

⁷ “Ana yakwe Zelofeadi yatiyavwanga icampomvu cuze. Fwandi icansambu kuti muyapeele impanga wa cipande cakwe isi cino wali nu kupelwa pa ina.

⁸ Nupya ulondolwele na ina Izlaeli ukuti umuntu umwi ndi wafwa, ukwaula kusya umwana umonsi, muce mwapeela impanga ku mwana umwanaci ndi ali penepo.

⁹ Ndi wene atakweti ana anaci, mukapeele impanga iyo ku ina aonsi.

¹⁰ Ndi wene atakweti aina aonsi, mukapeele impanga iyo ku akazi kakwe isi aonsi.

¹¹ Isi nawe ndi atakweti aina aonsi, ali lino lyene mungapeela impanga iyo ku muntu ali wensi uwapalamisya ku akazi kakwe nupya uwamu luko lwakwe, kuti iye iyakwakwe. Cintu cii cice ciye isunde ku ina Izlaeli, wakwe vino Yawe wapeezile ilamulo kuli Mose.”

Yoswa Yamusolola kutoola amalo yakwe Mose

¹² Alino Yawe anena Mose ati, “Kwela umwamba uwamu myamba ya Abalimu pakuti ulole impanga ino namapeela aina Izlaeli.

¹³ Amala sile wailola, alino umafwa, wakwe vino munyonko Aaloni wafwile,

¹⁴ pamulandu wakuti mweili kwene mutayezile ilamulo lyane mu Lwanga lwa Zini. Lino iuvi lyonsi lyailizyanyizye ku Meliba, mwemo mwakanyile ukutaka amaka yane amuzilo pa manso yao.” (Meliba a kafukoka ka manzi ku Kadesyi mu Lwanga lwa Zini.)

¹⁵ Alino Mose anena Yawe ati,

¹⁶ “Si angala Yawe Leza, kapeela wa umi ku antu yonsi, asontele iuvi lii intunguluzi

¹⁷ iyakuyakolelela pa nkolelo, ino ingayafumya nu kuingizya. Pano ndi cisi vivyo, iuvi lii lingaya wa mfwele izyaula mucemi.”

¹⁸ Caleka Yawe anena Mose ati, “Tola Yoswa umwana umonsi wakwe Nuni, wiyo ali nu mupasi, umwikepo amakasa.

¹⁹ Alino mutwale nu kumwimika ku nkolelo yakwe simapepo Eleaza nga ni iuvi lyonsi, nga lyene pa manso yakwe onsi ulande ukuti aliwe amatola amalo yako.

²⁰ Umupeleko na maka yako yamwi pakuti aina Izlaeli yonsi yamuyela.

²¹ Nga Lelo ali nu kulaiza kuli simapepo Eleaza. Aliwe alaamuzizya nu kumanya ukulonda kwane ukupitila mukuomvya Ulimu na Tumimu. Umu nzila kwene ii, Eleaza alaatungulula Yoswa nga na aina Izlaeli yonsi muli vyonsi vino viyapazi.”

²² Mose fwandi ali pa kucita muno Yawe wamunenyile. Atoola Yoswa nu kumwimika pa manso yakwe Eleaza nga ni uvi lyonsi.

²³ Alino amwikapo amakasa nu kumupeela ivyeo ivya kumulasika, wakwe muno Yawe wanenyile Mose.