Mpendwa 26 - Amazwi Yakwe Leza 2013

Yaswilizya ukupenda iila lyakwe ciili

¹ Pacisila ca mpungo Yawe anena Mose na Eleaza umwana wakwe Aloni, ati,

² “Pendini aina Izlaeli yonsi ukupitila muli cila lupwa lwao. Mupende aonsi yonsi yano yali ni myaka amakumi yaili nanti ukuluta, yonsi angalinga pa musinku wa kulwa inkondo.”

³ Mose na Eleaza ali pa kulanda kunoyali, ale yali mu manyika aku Moabu, mu pipi na Yodani ulunga na Yeliko, yayanena yati,

⁴ “Pendini aonsi yonsi ali ni myaka ukutandikila pa makumi yaili nu kuya apapela, ukulingana namuno Yawe wapeezile ilamulo kuli Mose.” Yaa ali ina Izlaeli yano yafumile mu mpanga ya Eguputo:

⁵ Amu mupanda wakwe Lubeni, umwana iyeli lyakwe Izlaeli, aeya: Hanoki nu luko lwakwe lwa ina Hanoki, Palu nu luko lwakwe lwa ina Palu,

⁶ Heziloni nu luko lwakwe lwa ina Heziloni, Kalimi nu luko lwakwe lwa ina Kalimi.

⁷ Zizyo zili nko zya amu mutundu wakwe Lubeni. Yayapenzile aonsi yatupu ukufika 43,700.

⁸ Mwana wakwe Palu umonsi wali a Eliabu,

⁹ nga ana yakwe Eliabu aonsi yali a Nemueli, na Datani na Abilamu. (Yakwene, Datani na Abilamu ali yamwi kwene, intunguluzi zya mwi uvi, akatukile Mose na Aloni. Nupya yali mwi umba lyakwe Kola lino yasangukile Yawe.

¹⁰ Impanga nayo yasiime akanwa nu kuyamila. Kola nawe kwene walovile kumwi ni umba lyakwe lyonsi. Cali pa nsita ilya lino umoto wosile antu yaya, ali 250. Yao tungati yali sile wa cilangililo cakusoka antu.

¹¹ Ukuya kwene ana yakwe Kola yatafwile foo.)

¹² Ana yakwe Simeoni aonsi mu nko zyao a Nemueli nu luko lwakwe lwa ina Nemueli, Yamini nu luko lwakwe lwa ina Yamini, Yakini nu luko lwakwe lwa ina Yakini,

¹³ Zela nu luko lwakwe lwa ina Zela, nga na Syauli nu luko lwakwe lwa ina Syauli.

¹⁴ Zizyo zili nko zya ina Simeoni. Yapenzilwe aonsi yatupu ukulingana 22,200.

¹⁵ Ana yakwe Gadi aonsi mu nko zyao a Zefoni nu luko lwakwe lwa ina Zefoni, Hagi nu luko lwakwe lwa ina Hagi, Syuni nu luko lwakwe lwa ina Syuni,

¹⁶ Ozini nu luko lwakwe lwa ina Ozini, Ele nu luko lwakwe lwa ina Ele,

¹⁷ Alodi nu luko lwakwe lwa ina Alodi, na Aleli nu luko lwakwe lwa ina Aleli.

¹⁸ Zizyo zili nko zya ana yakwe Gadi. Yapenzilwe aonsi yatupu ukulingana 40,500.

¹⁹ Ana yakwe Yuda aonsi a Eli na Onani, lelo yafwilile mu mpanga ya Kenani.

²⁰ Ana yakwe Yuda aonsi mu nko zyao a Syela nu luko lwakwe lwa ina Syela, Pelezi nu luko lwakwe lwa ina Pelezi, Zela nu luko lwakwe lwa ina Zela.

²¹ Ana yakwe Pelezi a Heziloni nu luko lwakwe lwa ina Heziloni, Hamuli nu luko lwakwe lwa ina Hamuli.

²² Zizyo zili nko zya ina Yuda. Yapenzilwe mwenemo aonsi yatupu ni mpendwa yao yali 76,500.

²³ Ana yakwe Isakali mu nko zyao aeya: Toola nu luko lwakwe lwa ina tola, Puwa nu luko lwakwe lwa ina Puwa,

²⁴ Yasyubu nu luko lwakwe lwa ina Yasyubu, Syimuloni nu luko lwakwe lwa ina Syimuloni.

²⁵ Amu mutundu wakwe Isakali yapenzilwe mwenemo aonsi yatupu ni mpendwa yao yali 64,300.

²⁶ Ana yakwe Zebuluni mu nko zyao aeya: Seledi nu luko lwakwe lwa ina Seledi, Eloni nu luko lwakwe lwa ina Eloni, Yaleeli nu luko lwakwe lwa ina Yaleeli.

²⁷ Yapenzilwe mwenemo aonsi yatupu ni mpendwa yao yali 60,500.

²⁸ Ana yakwe Yosefu mu nko zyao ukupitila muli Manase na Efulemu aeya:

²⁹ Makili umwana wakwe Manase nu luko lwakwe lwa ina Makili (Makili wali a isi wakwe Gileadi).

³⁰ Ana yakwe Gileadi mu nko zyao aeya: Iezeli nu luko lwakwe lwa ina Iezeli, Heleki nu luko lwakwe lwa ina Heleki,

³¹ Asilieli nu luko lwakwe lwa ina Asilieli, Syekemu nu luko lwakwe lwa ina Syekemu,

³² Syemida nu luko lwakwe lwa ina Syemida, na Hefeli nu luko lwakwe lwa ina Hefeli.

³³ Zelofeadi umwana wakwe Hefeli atakweti ana aonsi, lelo wakweti sile ana anaci, na mazina yao a Maala, Nowa, Hogila, Milika, na Tiliza.

³⁴ Yapenzilwe mwenemo aonsi yatupu ni mpendwa yao yali 52,700

³⁵ Ana yakwe Efulemu mu nko zyao aeya: Syutela nu luko lwakwe lwa ina Syutela, Bekeli nu luko lwakwe lwa ina Bekeli, na Taani nu luko lwakwe lwa ina Taani.

³⁶ Uluko lwakwe Elani ulwa mu mupanda wakwe Syutela.

³⁷ Inko zii zyapenzilwe mwenemo aonsi yatupu ni mpendwa yao yali 32,500. Yaa yali amu mupanda wakwe Efulemu.

³⁸ Ana yakwe Benjamini mu nko zyao aeya: Bela nu luko lwakwe lwa ina Bela, Asyibeli nu luko lwakwe lwa ina Asyibeli, Aiilamu nu luko lwakwe lwa ina Aiilamu

³⁹ Syefufamu nu luko lwakwe lwa ina Syefufamu, na Hufamu nu luko lwakwe lwa ina Hufamu.

⁴⁰ Ana yakwe Bela ukupitila muli Alidi na Naamani aeya: Alidi nu luko lwakwe lwa ina Alidi, na Naamani nu luko lwakwe lwa ina Namani.

⁴¹ Yapenzilwe mwenemo aonsi yatupu ni mpendwa yao yali 45, 600.

⁴² Ana yakwe Dani mu nko zyao aeya: Syuamu nu luko lwakwe lwa ina Syuamu,

⁴³ Antu apenzilwe mu luko lwakwe Syuamu aonsi yatupu impendwa yao yali 64,400.

⁴⁴ Ana yakwe Asyeli mu nko zyao aeya: Imuna nu luko lwakwe lwa ina Imuna, Isyivi nu luko lwakwe lwa ina Isyivi, na Beliya nu luko lwakwe lwa ina Beliya.

⁴⁵ Ana yakwe Beliya a Hebeli nu luko lwakwe lwa ina Hebeli, na Malikieli nu luko lwakwe lwa ina Malikieli.

⁴⁶ (Asyeli wakweti umwana umwanaci ni zina lyakwe a Selaa.)

⁴⁷ Amu luko lwakwe Asyeli Yapenzilwe mwenemo aonsi yatupu ni mpendwa yao yali 53,400.

⁴⁸ Ana yakwe Nafutali mu nko zyao aeya: Yazeeli nu luko lwakwe lwa ina Yazeeli, Guni nu luko lwakwe lwa ina Guni,

⁴⁹ Yezeli nu luko lwakwe lwa ina Yezeli, na Syilemu nu luko lwakwe lwa ina Syilemu.

⁵⁰ Zizyo zili nko zyakwe Nafutali, muno inko zyao zyaela. Nalino yapenzile aonsi, impendwa yao yali 45, 400.

⁵¹ Fwandi aina Izlaeli aonsi yonsi yano yapenzile yali 601,730.

⁵² Alino Yawe anena Mose ati,

⁵³ “Yakwene yaa, ali yano uce wankanye impanga kulingana ni mpendwa yati lembwa pakuti ice iye icuma cao.

⁵⁴ Uluko ululi ni mpendwa ikulu, uce ulupeele nu musonso ukulu. Na yano yali ni mpendwa inono, nayo uce uyapeele impanga inono. Umuntu wensi ace apelwe impanga ukulingana ni mpendwa ya antu yakwe.

⁵⁵ Lelo kwene pa kuyankanya yace yapendola pakuti iyalola pano cimaponela. Yali nu kupeela impanga ukulingana ni mpendwa ya mazina yao amu mitundu ya vikolwe vyao.

⁵⁶ Lino cafikila api zina lya mutundu, napo kwene yalinzile yapendola, nupya wensi apelwe ukulingana nu ukulu wa mpendwa yao, ndi iikulu nanti inono.”

Aina Levi nayo yapendwa

⁵⁷ Aina Levi yano yapenzilwe ukulingana nu mwayelile inko zyao aeya: Gelisyoni nu luko lwakwe lwa ina Gelisyoni, Koati nu luko lwakwe lwa ina Koati, na Melali nu luko lwakwe lwa ina Melali.

⁵⁸ Inko zya ina Levi nazyuze kwene aezi: uluko lwa ina Libini, uluko lwa ina Hebuloni, uluko lwa ina Maali, uluko lwa ina Musyi, nu luko lwa ina Kola. Koati wali a isi wakwe Amulamu.

⁵⁹ Umuci wakwe Amulamu wali a Yokebedi, wino wavyalilwe mu Eguputo nupya wali uwamu mupanda wakwe Levi. Wene wamuvyalile ana aonsi yaili, Aaloni na Mose, nga nu mwana umwanaci, Milyamu.

⁶⁰ Aaloni wali a isi wakwe Nadabu, Abiu, Eleaza, na Itamali.

⁶¹ Lelo Nadabu na Abiu yafwile lino yatwazile impolelwa kumwi nu moto uno yayinda pa manso yakwe Yawe.

⁶² Aina Levi aonsi yonsi yano yapenzile yano yali nu mwezi onga nu kuluta yali 23,000. Yene yatapendilwe pamwi na ina Izlaeli yauze, pano yatapezilwe nanti cimwi caupyanyi.

⁶³ Fwandi yaa ali yano yapenzilwe kuli Mose na kuli simapepo Eleaza. Yapenzile aina Izlaeli ala yali ku manyika aku Moabu, mu pipi na Yodani ulunga na Yeliko.

⁶⁴ Muli yao, mutali nanti awenga uwa muli yaya yano Mose na simapepo Aaloni yapenzile, lino yapenzilwe mu Lwanga lwa Sinai.

⁶⁵ Pasi pano Yawe wayanenyile ukuti yonsi kwene yalafwila mu lwanga, nupya kutasiile nanti wenga, suka sile Kalebu umwana wakwe Yefune na Yoswa umwana umonsi wakwe Nuni.