Mpendwa 24 - Amazwi Yakwe Leza 2013

¹ Balamu alola ukuti Yawe akulonda ukupolelela aina Izlaeli. Ali cino lyene iila lii, citamupamvizye kuti alondelezye vino cingaya, wakwe vino wacisile inkolelo. Lelo wene alolekesya sile amanso yakwe mu lwanga.

² Lino Balamu akwiza akwinula amanso, alola aina Izlaeli papa pano yakuuzile insakwe zyao, ala yali muli cila mutundu mutundu. Alino lyene Mupasi wakwe Leza iwikila panoli,

³ atandika nu kuma imbila iya usemo wakwe, ati, “Usemo wakwe Balamu umwana wakwe Beoli, Usemo wa muntu wino utwinso twakwe twatonoka.

⁴ Usemo kuli wiyo akauvwa amazwi yakwe Leza. Akalola cino Leza Wamaka yonsi wamulanga. Wino akakunkula, nga na manso yakwe yayulika.

⁵ Iye mwe! Avino amataalu yako yazipa we Yakobo, ni ncende zyako usuma we Izlaeli!

⁶ Zyaya wa manyika ukusalala, Kwati imiyanda mumbali ya luzi, Kwati amaluwa yano Yawe walema, imikelide ino Yawe walema mumbali ya luzi.

⁷ Amanzi yalafuma mu mbeketi zyao, cakuti ni mbezu zyao zilakontelelwa na manzi avulisye. Umwene wao alacindama ukucila Agagi, Nu wene wakwe ulaya ukatame.

⁸ Leza wayafumizye mu Eguputo, Yaya na maka ya mbo. Yakakandola utumitundu twa anisi yao, Nu kukontola utumafupa twao, ku vyanzo vyao.

⁹ Yene yakateyamila wakwe cisama wakalume nanti wakaci. Nga aweni angezya ukumuvulumula? Ali cino fwandi amakupolelelanga, apolelelwe nawe kwene, Na wensi amakutipwilanga, atipwilwe nawe kwene.”

¹⁰ Awe lyene Balaki asi pakusokela Balamu. Atandika nu kufundika amakofi, nga anena Balamu ati, “Nakwamile ku kwiza tipwila anisi yane, lelo wemo wiza yapolelela, nupya amaila yatatu.

¹¹ Cooka fwandi! Ucincile zuwazuwa ukuya ukwako. Nakulavile inti ndakucindika wakwe cimwi. Lyene walola Yawe wakwima ucindami uwo.”

¹² Balamu apakuvwa vivyo aasuka Balaki ati, “Uzye ntanenyile intumi zino watumile inti

¹³ nanti angala Balaki angampeela isano lyakwe umuzile siluva na zaabu, intange impule mu mapa yakwe Yawe? Intange injitandike nemwisikulu ukucita icili consi. Ciye icisuma nanti iciipe, cino Yawe alanena ali cino ndalanda.

Amazwi yakusyalikizya yakwe Balamu

¹⁴ “Fwandi ndakai naswilila ku antu yane. Lelo tale ndanga intale nkusopesye vino umutundu uu uli nu kucitila antu yako mu manda ali nu kwiza.”

¹⁵ Alino auma imbila ya usemo wakwe ati, “Usemo wakwe Balamu umwana wakwe Beoli, Usemo wa muntu wino utwinso twakwe twatonoka.

¹⁶ Usemo kuli wiyo akauvwa amazwi yakwe Leza Wino akweti ukumanya ku kafuma kuli wiyo Uwapapela pela. Akalola cino Leza Wamaka yonsi wamulanga. Wino akakunkula, nga na manso yakwe yayulika.

¹⁷ Inkumulola, nga lelo asi pa nsita ikwene. Nkumulolekesya, nga lelo asi apipi. Umwene, akoline wa lutanda, alafuma mu luko lulu. Intuwa ya wene yakatuka yafuma mwakwe Izlaeli. Wene wapola Moabu mu nzekete yi kutwi Na ana yakwe Seti yonsi aonsi ku lupanga.

¹⁸ Alacimvya aina Edomu Nu kupoka impanga ya ina Seili. Izlaeli ali nu kutwalilila ukucimvya.

¹⁹ Uluko lwa Izlaeli lulayalyatola Nu kulovya anisi asile kweneko.”

²⁰ Alino mu cilolwa Balamu alola aina Amaleke nga asema usemo uu: “Amaleke wali uluko lwa maka ukuluta inko zyonsi, Lelo ukumpelelekezyo alononeka.”

²¹ Nupya mu cilolwa cakwe Balamu alola aina Kenite, nga asema usemo uu: “Uwikalo winu mwe ina Kenite uwa mpomvu cuze, Nupya ni cizi cinu cili apiwe ilikunuke.

²² Nga lelo kwene mwe ina Kenite mulononwa, apa nsita ino aina Asyuli yalamusenda umu uzya.”

²³ Alino nupya Balamu asema usemo uu: “Owe! Uzye aweni angapusuka lino Leza wacita camusango uu?

²⁴ Amato yalafuma ku nkumba zyakwe Kitimu. Yene yalacimvya Asyuli na Ebeli, Lelo nayo kwene yalononeka.”

²⁵ Lyene Balamu akatuka nga aswilila nu kumwao. Balaki nawe ali pa kuswilila ukwakwe.