Mpendwa 23 - Amazwi Yakwe Leza 2013

Mazwi ankolelo yakwe Balamu

¹ Alino Balamu anena Balaki ati, “Unkuulile tuvuwa cinimbali, nga unteyanyizizye ni ng'ombe, yacipambasi cinimbali alino na yasuuku cinimbali.”

² Awe Balaki ali vino acita ndi muno Balamu wamunenyile, nga aliwe pamwi na Balamu yapeela impolelwa zyakoca, cipambasi wenga na suuku wenga pali cila kavuwa.

³ Lyene Balamu anena Balaki ati, “Imilila pipi ni mpolelwa zyako zyakoca, lino nemo inkufuma penepo kuti nkalole ndi Yawe angaleka inkomenkane na aliwe. Nga caya vivyo ndiza nkunene vyonsi vino amansokolwela.” Alino Balamu atandika nu kupita alungama na pa mwamba papela, pano patamelanga icintu nanti cimwi.

⁴ Lyene Leza akomenkana nawe, nga Balamu amunena ati, “Ninkuula utuvuwa cinimbali, nga apano ni mpela impolelwa zyakoca, cipambasi wenga na suuku wenga pali cila kavuwa.”

⁵ Alino Yawe anena Balamu ivyakuti akanene Balaki nga amuswilizya na mazwi kwene yayo.

⁶ Acino Balamu aswilila kuli Balaki aya amuzana acimilile pano wamusile pipi ni mpolelwa zyakwe zyakoca, ala yali pamwi ni ntunguluzi zyaku Moabu.

⁷ Balamu wasema usemo wakwe uwakuti, “Balaki umwene waku Moabu wamfumizye ku Alamu, ku myamba yaku ufumondaka. Wavwanzile ati, ‘Iza untipwilile Yakobo.’ ‘Iza uvwange amazwi ya misindicila ku ina Izlaeli.’

⁸ Nga fwandi namatipwila uli wino Leza umwisikulu atatipwizile. Nanti kuvwanga amazwi ya misindicila kuli yayo yano Yawe atavwanzile vivyo kunoyali?

⁹ Kwene nga nafindamila mu lwema ulutali nkuyalola. Nkuyalola ukufuma pa myamba papela. Yene uluko luno lwikala longa ntalwentalwe. Yene yamanyile vino yapolelelwa ukuluta inko zyuze izyasyala.

¹⁰ Aina Izlaeli yavulisya wa lukungu, Yene yavulisya cuze cakuti yatanga pendwa. Si leka impela yane iye wa mpela yakwe wenga uwamu antu yakwe Leza. Si leka imfwe mu mutende wakwe vino yayo akacita ivyawololoke yakafwa.”

¹¹ Alino Balaki anena Balamu ati, “Uzye icani cino watuncitila? Nakulesile kuno pakuti wize utipwile anisi yane, lelo wemo wayapolelela.”

¹² Balamu nawe amwaasuka ati, “Uzye fwandi nemo insi nu kuvwanga sile amazwi yano Yawe wanena ukuvwanga?”

Usemo wakwe ciili wakwe Balamu

¹³ Alino Balaki anena Balamu ati, “Twende fwandi ku ncende yuze kuno ungalola sile akapukutu ka ina Izlaeli, lelo asi yonsi. Lyene kuku uye uyantipwilile.”

¹⁴ Acino amusenda ku calo caku Zofimu pa Mwamba wa Pisiga papela. Ali kuno akuula nu tuvuwa cinimbali nga apeela impolelwa zyakoca, cipambasi wenga nga na suuku wenga pali cila kavuwa.

¹⁵ Balamu ali pa kunena Balaki ati, “Imilila pa pipi ni mpolelwa zyako zyakoca, pa nsita ino nani namaya ku kukomenkanya Leza kuku.”

¹⁶ Alino Yawe akomenkanya Balamu, amunena ivyakuti avwange nga amuswilizya kuli Balaki ku kumunena amazwi yakwe.

¹⁷ Acino Balamu waswilile kuli Balaki, nu kumuzana ala acili aimilile pipi ni mpolelwa yakwe yakoca, ala yali pamwi ni nkombe zyakwe izyaku Moabu. Alino Balaki amuuzya ati, “Uzye Yawe wakunena vyani?”

¹⁸ Alino Balamu atandika kusema wakwe vii: “Katuka, Balaki we mwana wakwe Zipoli, Nga uuvwe vino namavwanga.

¹⁹ Leza asi umuntu uwakuti angatumpoka Nanti umwana wakwe Adamu uwakuti afutuke muli cino watataka. Wene akavwanga nu kufikilizya cino watavwanga.

²⁰ Yanenyile ukupolelela Nga lino Leza wapolelela, nemo ntange nkaule upolelelo.

²¹ Ntazanyile iciipe muli Yakobo, Ntaweni intazi muli Izlaeli. Yawe Leza wao ali nayo. Umwakwe muvwika utupundu twakuzangila umwene.

²² Leza uwayafumizye mu Eguputo. Wene akayalwisizya wa mbo.

²³ Pano pataya insapolo, nanti ulozi, uno ungaleta mupamba pa luko lwa Izlaeli. Lyene antu yalalanda pali Izlaeli yati, ‘Si lolini vino Leza watacita!’

²⁴ Ala umutundu uu wala wakatuka wakwe cisama wa kaci. Wene akaposiwa nu kulala mpaka sile atale alye cino watalema, Nu kupwila uwazi wakwe vino alemile.”

²⁵ Lyene Balaki anena Balamu ati, “Wakana ukutipa aina Izlaeli, lelo fwandi cizipe utayapolelela!”

²⁶ Lelo Balamu amwaasuka ati, “Uzye ntakunenyile ukuti nemo namacita sile cico cino Yawe wanena?”

Usemo wakwe citatu wakwe Balamu

²⁷ Nupya Balaki anena Balamu ati, “Twende, nkutwale kuze. Nalimwi kwene ali kuno Leza angatemwa kuti uyatipwile.”

²⁸ Fwandi Balaki ali pa kutwala Balamu pa Mwamba wa Peoli apapela, papo pano ulwanga lukaloleka ningo umwisika.

²⁹ Balamu anena Balaki ati, “Nkuulile kuno utuvuwa cinimbali. Alino unteyanyizizye na yacipambasi ya ng'ombe nayo cinimbali. Na yasuuku nayo yaye cinimbali.”

³⁰ Balaki nawe acita vino Balamu amunenyile. Apela pali cila kavuwa cipambasi wenga na suuku wenga apapela.