Mpendwa 22 - Amazwi Yakwe Leza 2013

Balaki umwene wa ina Moabu watuma akuya ama Balamu

¹ Aina Izlaeli nupya yatwalilila ukufuntuka iyaya yakuula insakwe mu manyika aku Moabu, ku ufumondaka wakwe Yodani, ulunga na Yeliko.

² Lyene Balaki, umwene waku Moabu nupya umwana wakwe Zipoli auvwa vyonsi vino aina Izlaeli yacisile ku ina Amoli.

³ Nga Moabu pamwi na antu yakwe yonsi iyuvwa intete cuze pamulandu wakuti kuku kwali aina Izlaeli aingi wakwe cimwi. Cumi kwene, aina Moabu yali ni ntete wakwe cimwi pamulandu wakulola aina Izlaeli.

⁴ Aina Moabu iyanena intunguluzi zyamu Midyani, yati, “Mwe! Kasapati wa antu akulu kulya vyonsi mu mbali mbali itu wakwe vino masaye akavwenyola isote lyamu calo.” Acino Balaki, uwali umwene waku Moabu pa nsita ilya, nupya umwana wakwe Zipoli,

⁵ atuma inkombe zyakuya ama Balamu umwana wakwe Beoli, wino wali ku Petoli, pipi nu Luzi lwa Yufulate mu mpanga ya kumwao, ya Amawu. Amutumila ati, “Umutundu uno wafuma ku Eguputo watiulimba impanga nupya watiwiza iunteyamila.

⁶ Yene yakweti amaka kutuluta. Si ndanga fwandi wize uyatipwile. Limwi lyene tungaya na maka akuyacimvya, tuyazinge muno mpanga, pasi pano namanya ukuti wino wala umila ulutembo lwa kumuzipila ala cimaomba na wino watipwila, mpaka akawe nalyo.”

⁷ Ali vino intunguluzi zyaku Moabu ni zyaku Midyani izikatuka nu kusenda icisapula ntangala. Lyene iyaya yazana Balamu, nga iyamunena na mazwi yakwe Balaki.

⁸ Balamu nawe ayanena ati, “Lalini kukwene. Nga mutondo ndamwasuka vino Yawe amandandila.” Acino intunguluzi zya ina Moabu zyalinzile kwakwe Balamu.

⁹ Ali vino Yawe waile kuli Balamu nu kumuuzya ati, “Uzye antu yayo akulinda ukwako aaweni?”

¹⁰ Balamu nawe aasuka ati, “Balaki umwana wakwe Zipoli, nupya umwene waku Moabu uwatayatuma ku kwiza nena yati,

¹¹ ‘Antu yano yafuma ku Eguputo yatiyalimba impanga. Sindanga fwandi wize uyatipwile. Limwi lyene tungaya na maka akuyacimvya, tuyazinge.’”

¹² Lelo Leza anena Balamu ati, “Utezya ukuya nayo kweneko, nupya utezya ukuyatipwila pano yene antu yamwi apolelelwe.”

¹³ Akatondo uwanda uwalondelilepo Balamu aya ku nkombe zyakwe Balaki, nga azinena ati, “Swilila ukumwinu, pano Yawe watakana kuti ningapita nawe.”

¹⁴ Acino iyaswilila kuli Balaki nga yamunena ukuti Balamu watakana ukwiza nayo.

¹⁵ Ali vino lyene Balaki watumile inkombe zyuze, izyacizile pali zizi izyankolelo, nupya izicindamisye ukuluta.

¹⁶ Ali pakuya kuli Balamu nu kuya munena iziti, “Vii, ivyalanda Balaki umwana wakwe Zipoli nupya akukupapata akuti utezya uleke cimwi cikulesye ukwiza kunoli!

¹⁷ Pasi pano ulalambulwa icilambu cacipezya mano. Wemo fwandi vwanga sile icili consi. Ndanga fwandi wize untipwilile antu yaa.”

¹⁸ Lelo Balamu nawe aasuka ati, “Nanti angala Balaki angampeela isano lyakwe umuzile siluva na zaabu, intangacita icintu icili consi icikulu nanti icicepe. Ntangenezye ukukana yela ilamulo lyakwe Yawe Leza wane nanti mu cintu cinono kwene.

¹⁹ Lelo icisuma, namupapata namwe kwene lindini wakwe vino auzo yacisile, pakuti nezye ukulondelezya cuze cino Yawe anganena pali cico.”

²⁰ Usiku uwo, Leza aya kuli Balamu nu kumunena ati, “Fwandi vino antu yaa yizile ku kukwama, katuka upite nayo. Lelo ulinzile wacita sile vino nakunena.”

²¹ Acino uwanda uwalondelilepo akatondo Balamu akatuka avinyepa, akwela pali punda wakwe, nga apita pamwi ni nkombe zizi izyaku Moabu.

Balamu yamusunda kuli punda wakwe

²² Lelo Leza asoka pa kulola ukuti Balamu wapita. Nga lino Balamu ali pali punda wakwe, ala acili akupita pamwi na aomvi yakwe yaili, mungeli wakwe Yawe aiza aimilila mu museo pakasi kuti amulesye ukupita.

²³ Lyene lino punda walola mungeli wakwe Yawe aimi mu museo ala alemile ulupanga lwakwe mu minwe, apambata apita mu mpanga. Alino Balamu amuma nu kumuswilizya mu museo.

²⁴ Lyene mungeli wakwe Yawe aya aimilila pano museo wafyenenkine, pakasi ka vyalo vya matingi viili. Pali ni ciimbili ci we ku mbali yonga, ni cuze ku mbali yuze.

²⁵ Lino punda walola mungeli wakwe Yawe, aikuza ku ciimbili nu kufenenkezya ulwazo lwakwe Balamu kweneko. Awe Balamu aswilizya ukutimbola punda.

²⁶ Nupya kwene mungeli wakwe Yawe asungutila pa nkolelo aya aimilila pa ncende ifyenenkane pano patasile nanti incende imwi pa kupambata ku mbali zyoili kwene.

²⁷ Lino punda walola mungeli wakwe Yawe, alala pansi mu ntangalala yakwe Balamu. Nawe Balamu asoka nga atandika ukuma punda ni ntuwa yakwe.

²⁸ Lyene Yawe apeela punda amaka akuvwanga, nga nawe anena Balamu ati, “Uzye icani cino ninkucita pakuti ungume musango kwene uu amaila yatatu?”

²⁹ Balamu nawe amwaasuka ati, “Pamulandu wakuti wancita kwati nene cipuwa! Inkwata ulupanga mwi kasa lyane, ngano nakukoma likwene sile.”

³⁰ Nawe punda avwanga ati, “Uzye asi nene punda wako, wino ukakwela ukutandika ku wance wako ukufika na pilelo kwene? Uzye natala nakucitila icintu camusango ndi uu?” Balamu nawe aasuka ati, “Awe.”

³¹ Lyene Yawe ali pakuleka Balamu alole mungeli aimilile papa kwene ala atazunzula ulupanga lwakwe. Icaleka Balamu afukama pansi afupime.

³² Lyene umungeli wakwe Yawe amuuzya ati, “Uzye pacani cino umila punda wako vii amaila yatatu? Nemo natiniza ku kukulesya ukupita. Ninkucilikila inzila pano utalinzile kuti uye pa lwendo kweneko.

³³ Lelo punda wako wali wandola nga apambata museo amaila yatatu. Iciya cakuti akana ku pambata museo, cumi kwene ngano nkukomile mpiti nu kuleka kuti wene apite ulumi.”

³⁴ Balamu ali pa kwasuka mungeli ati, “Natinifya pano icumi ntalimanyile ukuti awewe uwimilile mu museo kuti uncilikile. Fwandi lyene ndi cakuti ulendo wane utakuzanzizye, kambwelele.”

³⁵ Lelo mungeli amunena ati, “Pitangini na antu yayo, lelo utakezye ukulanda akantu nanti kamwi, suka sile cino natinkunena ukulanda.” Acino Balamu apita ni nkombe zino Balaki watumile.

Balaki wazengela Balamu

³⁶ Lino Balaki uvwa ukuti Balamu akwiza, akatuka aya ku kumukomenkanya ku Ali, umusumba ukulu uwaku nkumba ya Luzi lwa Alinoni mu mupaka waku Moabu.

³⁷ Alino Balaki pali pakunena Balamu ati, “Uzye intakutumiile inkombe zya kwizakwama? Uzye pacani cino fwandi cino utizile kunondi? Uzye ukunena ndi vino intange nkucindike?”

³⁸ Alino Balamu nawe amwaasuka ati, “Endi, lyene anene natiniza. Nga lelo uzye wemo ukuti ningavwanga civwangevwange? Nemo indi nu kuvwanga sile amazwi yano Yawe wanena ukuvwanga.”

³⁹ Lyene Balamu iyapita na Balaki iyaya ku musumba wa Kiliati Huzoti.

⁴⁰ Ali kuno Balaki afyula ing'ombe ni mfwele nga apeela inyama imwi kuli Balamu ni ntunguluzi zino zyali nawe.

⁴¹ Uwanda uwalondelilepo akatondo Balaki asenda Balamu nu kumulemezya ukupeela ku myamba ya Bamoti Baali, pakuti alole sile akapukutu ka ina Izlaeli ali ku lutwe lwa nsakwe.