Mpendwa 21 - Amazwi Yakwe Leza 2013

Yapoka impanga yaku Aladi

¹ Lino umwene waku Aladi ku Kenani, uwikalanga ku Negebu, uvwa ukuti aina Izlaeli yali umu nzila yaku museo uwaya ku Atalimu yakwiza, akatuka aya ayazanza, alema na yamwi.

² Alino aina Izlaeli iyalaya Yawe nu mulapo yati, “Ndi watupeela antu yaa twayacimvya tulonona imisumba yao tuimalile.”

³ Yawe auvwa ukupapata kwa ina Izlaeli, nga ayapeela amaka iyaya yacimvya aina Kenani. Acino aina Izlaeli iyonona antu yalya iyayamalila kumwi ni misumba yao. Lyene iyatemela ni ncende ilya yati Holima.

Inzoka iyapangwa ku cela ca mukuwa

⁴ Alino aina Izlaeli iyafuma ku Mwamba wa Holi iyapita ku nzila iyaya kuli Yemba Muyenzu, iyapambata impanga ya Edomu. Lelo umu nzila antu iyatonta iyaposiwa nu kuteka imyenzo.

⁵ Alino lyene iyatandika ukuilizyanya kuli Yawe na kuli Mose, yati, “Uzye pacani cino watufumizye mu Eguputo nu kutuleta muno mu lwanga umwakuti tufwe? Musi ivyakulya! Musi amanzi! Ivyakulya vii ivyaulanda vyativifuula!”

⁶ Lyene Yawe nawe atuma inzoka izya usungu uwipisye pakasi kao. Nazyo iziyalumola cakuti aina Izlaeli afwile yali aingi.

⁷ Alino antu yiiza kuli Mose yamunena yati, “Twatituluvyanya pa kuilizyanya kuli Yawe na kuli wewe kwene. Si tupapatileko kuli Yawe, pakuti afuntusye inzoka zii kunotuli.” Acino Mose nawe ayapapatila kuli Yawe.

⁸ Alino Yawe anena Mose ati, “Panga inzoka ya mukuwa nga uikoweke pa mulongoti. Umuntu ali wensi uwalumwa ndi cakuti walolekesya inzoka kwene iyo, alaya nu umi.”

⁹ Acino Mose apanga inzoka ya mukuwa nga aikoweka na pa mulongoti. Lyene umuntu ali wensi ndi walumika ni nzoka, nga aiza alolekesya pa nzoka ya mukuwa, wene aya nu umi.

Ulendo wa ina Izlaeli wakuya ku Moabu

¹⁰ Aina Izlaeli iyafuma kweneko iyaya yakuula insakwe ku Oboti.

¹¹ Lyene iyatenuka ukufuma ku Oboti nga iyaya yakuula insakwe ku Iye Abalimu, mu lwanga lwaku ufumondaka wa mpanga ya ina Moabu.

¹² Lino yafuma kuko, iyaya yakuula insakwe ku Luzi lwa Zeledi.

¹³ Alino iyatenuka ukufuma kuku nga iyaya yakuula insakwe ku mbalama ku katutu ka Luzi lwa Alinoni, mu lwanga ulwafuminkana ukufika ku mpanga ya ina Amoli. Luzi lwa Alinoni ali mumpaka wa ina Moabu na ina Amoli.

¹⁴ Ali cino Lupapulo lwa Nkondo zyakwe Yawe lukati, “Waebu mumbali yakwe Sufa, nga ni vifoloma, Luzi lwa Alinoni,

¹⁵ alino nu mutentemuko wa vifoloma ivyafuminkana ukufika ku musumba wa Ali, nu kuciluka ukuyafika ku mupaka wa ina Moabu.”

¹⁶ Lino yafuma kuku iyaya yafika nu ku Beeli, ku cifulo cino Yawe wanenile penepo Mose ati, “Kakonganike antu pamwi, nga nani namayapeela amanzi.”

¹⁷ Ali lino aina Izlaeli yimvile ulwimbo ulwakuti, “Tufukoka mwe, fukokini! Twamwimbilila pa kufukoka,

¹⁸ kafukoka kano kimvilwe na yamwene, nga ni ntunguluzi zya antu, akimvilwe ku ntuwa ya wene nu ku nsonzo zino yakapitila kweneko.” Alino aina Izlaeli yafuma mu lwanga iyaya ku Matana,

¹⁹ alino lyene iyafuma ku Matana iyaya yafika ku Naalieli, nga iyafuma ku Naalieli iyaya ku Bamoti,

²⁰ nga iyafuma ku Bamoti iyaya ku cifoloma camu mpanga ya ina Moabu, ino yatembelela ku kansonsi ka Mwamba wa Pisiga, papo pano nu lwanga lukaloleka ukwisika.

Aina Izlaeli yacimvya umwene Siooni nu mwene Ogi

²¹ Alino aina Izlaeli yatuma inkombe kuli Siooni, umwene wa ina Amoli, ku kumunena yati,

²² “Tuzumilizye ukupita tusalale mu mpanga yako. Sweswe pamwi ni viteekwa vitu tutalasya mu museo nu kupalukila mu matimba nu mu vyalo vyako ivya matingi, nanti ukumwa amanzi amu vifula vyako. Tulalondelela sile inzila ya Mwene suka tukapuzye umupaka wa mpanga yako.”

²³ Lelo Siooni wene atazumilizye aina Izlaeli kuti yapite ukusalala mu mpanga yakwe. Akonganika ivita vyakwe nga afuma aya ku Yaazi mu lwanga, ku kuzanza aina Izlaeli.

²⁴ Lelo aina Izlaeli iyatola impanga zyao nga iyakomola anisi yao, nga iyapoka ni mpanga yakwe Siooni ukutandikila ku Luzi lwa Alinoni lwaku katutu kaku Yaboki, kuli kuti ku ina Amoni, lelo iyapeelela sile ku mupaka wao, pamulandu wakuti umupaka wao wacingililwe cuze.

²⁵ Acino aina Izlaeli iyapoka imisumba iya yonsi ikalamba ya ina Amoli, ukwikapo nu musumba ukalamba uwa Hesyiboni kumwi ni misumba inono izingulwike, nga yikala mwenemo.

²⁶ Umusumba wa Hesyiboni wali umusumba ukalamba wakwe Siooni umwene wa ina Amoli. Siooni wali umwene uwaile azanza umwene wankolelo wa ina Moabu nu kupoka impanga yakwe yonsi ukufika sile nu ku Luzi lwa Alinoni.

²⁷ Ali cino yakiimba ya numbo yakaimbila yati, “Ndangini ku Hesyiboni, ku musumba ukulu wa mwene Siooni! Lekini umusumba wakwe Siooni ukuulwe cipya cipya.

²⁸ Ukufuma mu musumba ukalamba uwa Hesyiboni, ivita vyakwe Siooni vyafumile wa moto ivyonona umusumba wa Ali uwaku Moabu nu kumalila intonje yonsi iya papela yakwe Alinoni.

²⁹ Owe! Kalanda kunomuli mwe ina Moabu! Mwe muno mukapepa Kemosyi mononeka! Leza winu uwaleka antu inu yaye imbutusi, na anaci nayo yayasenda uzya kuli Siooni umwene wa ina Amoli.

³⁰ Lelo ndakai amu mupanda wao yononeka. Nzila yonsi ukufuma ku Hesyiboni mpaka kufika ku Diboni, mpaka kufika ku Nofa, pipi nu ku Medeba.”

³¹ Caleka aina Izlaeli yikala mu mpanga ya ina Amoli,

³² nga Mose atuma aonsi akuyanengula nu kulola inzila ingazipisya ukuya zanza umusumba ukalamba uwa Yazeli. Alino aina Izlaeli iyaya yaupoka kumwi ni misumba inono izingulwike yakweo, nga yazingila aina Amoli ukunzi, yao aikalanga mwenemo.

³³ Lyene aina Izlaeli iyasenuka nu kulondela museo ulunga nu ku Basyani, nga umwene Ogi uwaku Basyani afuma ni vita vyakwe vyonsi ku kuyazanza ku Edilei.

³⁴ Yawe anena Mose ati, “Utamoopa, pano namakupeela ucimvyo pali aliwe, na pa antu yakwe onsi, nga na pa mpanga yakwe. Ucite kunoli wakwe vino wacisile kuli Siooni umwene wa ina Amoli, uwatesile mu Hesyiboni.”

³⁵ Acino aina Izlaeli iyakoma Ogi, na ana yakwe, nga na antu yakwe onsi, ukwaula kusya nanti umwi, nga yikala mu mpanga yakwe.