Mpendwa 20 - Amazwi Yakwe Leza 2013

Amanzi yafuma mu ciliwe

¹ Umu mwezi wakutandika aina Izlaeli yonsi yafika mu Lwanga lwa Zini nu kukuula insakwe ku Kadesyi. Kuku ali kuno Milyamu wafwilile nu kuzikwa kweneko.

² Nga lelo incende iyo yauzilwe amanzi akuti iuvi liomvye. Antu fwandi ali pa kuunganila Mose na Aloni.

³ Iyatandika nu kuilizyanya kuli Mose yati, “Ata see! Fwandi ngano twafwile sile wakwe vino anji aina Izlaeli yafwile pa manso yakwe Yawe.

⁴ Uzye pacani cino mwaletile iuvi lyakwe Yawe mu lwanga luu? Uzye pakuti amuno tufwile pamwi ni viteekwa vitu?

⁵ Uzye pacani cino mwatufumizye mu Eguputo pakuti mutulete mu mpanga iyaipa ndi ii? Impanga imwi muno yatanga yakomele imbezu ili yonsi. Nupya musi amasamvu, musi amatingi nanti iviseekwa vya pomegeleneti. Amanzi yakumwa nayo kwene musi!”

⁶ Awe mukwai Mose na Aaloni ali pakusya iuvi lyonsi nu kulungama ku mulyango wi Taalu lya Ukongano nga yafukama pansi yafupime. Nga alino ucindami wakwe Yawe iuyalolekela.

⁷ Yawe nawe anena Mose ati,

⁸ “Tola intuwa yako ino ili ku nkolelo ya Mbokosi ya Upangano, nga lyene wewe na Aaloni mukonganike iuvi lyonsi. Alino pa manso yao munene iciliwe cii cizwe amanzi yano cakwata nga na manzi yamapongoloka ukufuma munocili, akuti umwesye iuvi lyonsi ni viteekwa vyao.”

⁹ Fwandi ali vino Mose watozile intuwa iyali ku nkolelo yakwe Yawe, wakwe vino Yawe wamupeezile ilamulo.

¹⁰ Ali lino Mose na Aaloni yakonganika antu pa nkolelo ya ciliwe, nga Mose ayanena ati, “Muvwikisye yacisanguka mwe! Uzye tutange tumufumizye amanzi mu ciliwe cii?”

¹¹ Alino Mose azunzula ikasa lyakwe, auma na pa ciliwe ni ntuwa amaila yaili. Awe amanzi iyatandika nu kufuma nyanya sile. Ni iuvi lyonsi ilimwa kumwi ni viteekwa vyao.

Leza wasokela Mose na Aloni

¹² Nga alino Yawe anena Mose na Aaloni ati, “Pano mwali mwakana ukuzumila ukuti indi na maka akulanga ucindami wane pa manso ya ina Izlaeli, mutalingizya iuvi lii mu mpanga ya ulayo ino nayapeela.”

¹³ Yao ali manzi yaku Meliba, kuno aina Izlaeli yailizinye kuli Yawe, nawe ali pa kuyasokolwela ukuti wene uwamuzilo.

Umwene waku Edomu wakanya aina Izlaeli ukupita mu mpanga yakwe

¹⁴ Ukufuma ku Kadesyi Mose atuma inkombe ati, “Ku musambazi, umwene waku Edomu, munyonko Izlaeli wavwanga ukuti wamanya mpiti ningo sana amasyamo yonsi yano yatuponela.

¹⁵ Ivikolwe vitu vyatentemukile ku Eguputo kuko kuno vyatenzi amanda avule cuze. Aina Eguputo yatucuzyanga wakwe cimwi, ndi muno yacitile ivikolwe vitu.

¹⁶ Ali lino twalaizye kuli Yawe, nga nawe uvwile ukulila kwitu nga atutumila mungeli uwatufumizye mu Eguputo. Api lelo asweswe yano ku Kadesyi, umusumba uwaya mu mupaka ni mpanga yako.

¹⁷ Ali cino fwandi tukulenga ulusa lwa kupita ukusalala mu mpanga yako. Ukuya kwene tutalapita mu matimba nanti sile mu vyalo vya matingi. Tutalamwa na manzi amu vifula vyako. Tulalondela sile inzila yamwene ukwaula kwalulukila kwi lunji nanti kwimani suka sile tukapuzye umupaka wako.”

¹⁸ Lelo aina Edomu nayo ali pa kwaasuka yati, “Utalapita ukusalala mu mpanga itu pano limwi uliukila twapontomoka nu kwiza kuzanza ku lupanga.”

¹⁹ Aina Izlaeli nayo yavwanga yati, “Ala tulapita mu museo ukalamba, nupya sweswe pamwi ni viteekwa vitu ndi cakuti twaca twamwa amanzi inu, ale lyene tulalipila. Cino tukulonda, ulusa lwa kupita ukusalala sile mwenemo pa ngazo.”

²⁰ Aina Edomu yaswilizya kwasuka yati, “Mutezya ukusalala mwenemo, twakana.” Nga yakatuka yafuma ni vita vya maka cuze ku kuyalwisya aina Izlaeli.

²¹ Pamulandu wakuti aina Edomu yakana kuzumilizya aina Izlaeli ukupita nu kusalala mu mpanga yao, aina Izlaeli ali pakusenuka nu kuswilila mwenemo.

Imfwa yakwe Aloni

²² Lyene aina Izlaeli yonsi yatenuka yafuma ku Kadesyi ku Mwamba wa Holi,

²³ pa mupaka wa mpanga ya Edomu. Kuku kwene Yawe anena Mose na Aaloni ati,

²⁴ “Aloni atakutala aingile mu mpanga ino nalavile ukupeela aina Izlaeli. Wene amafwa, pamulandu wakuti mweili kwene mwakanyile ukuyela ilamulo lyane pa kupelwa amanzi ku Meliba.

²⁵ Fwandi tola Aaloni na Eleaza umwana wakwe, nga ukwele nayo pa Mwamba wa Holi.

²⁶ Alino uzule Aaloni vyakuzwala vyakwe ivya usimapepo nu kuvizwika ku mwana, Eleaza. Aaloni wene amaya akafwe papa kwene.”

²⁷ Mose nawe ali pakucita wakwe vino Yawe wamupeezile ilamulo. Pa manso yi uvi lyonsi iyakwela Mwamba wa Holi.

²⁸ Alino Mose azula Aaloni ivyakuzwala vyakwe nu kuvizwika kuli Eleaza. Aaloni nawe afwila papa kwene pa mwamba papela, nga Mose na Eleaza yatantamuka nu mwamba.

²⁹ Lino iuvi lyonsi lyalola ukuti icacumi Aaloni watafwa, aina Izlaeli yonsi iyamulosya pa manda amakumi yatatu.