Mpendwa 19 - Amazwi Yakwe Leza 2013

Itwi lya ng'ombe iyenzu indama

¹ Nupya Yawe apeela ilamulo kuli Mose na Aloni

² kuti yapeele amasunde yaa ku ina Izlaeli. Ayanena kuti yanene aina Izlaeli yalete kunoyali ing'ombe iyenzu, indama ino iyaula ulema nanti umwi nupya ino itatala yazwikwa ikoli.

³ Yaipeele kuli Eleaza simapepo. Yalinzile kuisenda ukunzi ya nsakwe nu kuifyulila pa manso yakwe.

⁴ Alino Eleaza simapepo nawe atoole uwazi umwi ku munwe wakwe nu kukanyila uwazi uwo amaila cinimbali ku mulyango wi Taalu lya Ukongano.

⁵ Alino lyene, lino acili akulola asininkizye ukuti yoca ing'ombe iyo ukutandikila sile ku minyefu, uwazi, impapa, ni vyamumala.

⁶ Lyene simapepo atoole kamusambo ka cimuti ca mukelide, nu musambo wa isopu ukulunda penepo na tutonge nu kuvisumbila pa cininkwa ca moto uno yakocelapo indama iyo.

⁷ Pacisila cakwe vivyo, simapepo afule ivyakuzwala vyakwe nu mwisikulu aowe ku mwili. Lyene alino angingila mu nsakwe. Lelo ala acili mukowele mpaka ukufika na lino ilanzi lyatemba.

⁸ Koca wa ndama iyo nawe kwene alinzile afule ivyakuzwala vyakwe nu kowa pa mwili. Nawe kwene amaya mukowele mpaka ukufika lino ilanzi lyatemba.

⁹ Umuntu muze wino asi mukowele kulingana nu lutambi awino azyole itwi nu kuya lisumbila pa ncende isanguluke kunzi ya nsakwe. Iuvi lya ina Izlaeli lilinzile ukusunga itwi lilyo pakuti lice likaomviwe mu manzi yakuisangulula. Lyene ilyakuomvya apa kuisangulula ku maifyo.

¹⁰ Kazyola wi twi nawe kwene alinzile afule insalu zyakwe nu kowa pa mwili. Nawe kwene amasyala mukowele mpaka kufika lino ilanzi lyatemba. Yao ali masunde yano aina Izlaeli pamwi na inamasi yonsi kwene aikala pamwi nayo yalinzile kulondela imyaka yonsi amanda pe.

Ivya makombezya pa kukumya icala

¹¹ Wino wensi uwala wakumya icala ca muntu ali wensi alasyala mukowele pa manda cinimbali.

¹² Fwandi wene alinzile kuisangulula umwisikulu mu manzi pa wanda uwalenga yatatu nu walenga cinimbali. Ale lyene wasyala uwaula mulandu. Nga camukumba wakana ukuisangulula pa wanda uwalenga citatu na pa wakwe cinimbali, ale wene amasyala mukowele.

¹³ Wino wensi uwala wakumya icala ca muntu ali wensi nga nu kucita mufulo wa kukana isangulula ale wene wakowezya Itaalu lya Ukongano. Umuntu wiyo alinzile kusukulwa mwi uvi lya ina Izlaeli. Pamulandu wakuti amanzi akumukondola yatapisile pa mwili wakwe, ali cino fwandi wene wasyala mukowele, na makombezya yakwe yasyala yamukambatile.

¹⁴ Umuntu ndi cakuti wafwila umwi taalu, isunde ilyakukonka aili. Wiyo wensi uwala wingila umwi taalu kumwi na wiyo ali umwi taalu yalasyala akowele mpaka ukufika pa manda cinimbali.

¹⁵ Ni civiya consi icisile pwanku, cino yatatupike nanti ukunyepa penepo intupiko, naco kwene ale cakowela.

¹⁶ Wino wensi ali mu mpanga ndi cakuti wakumya ku muntu wino yatiyakoma nanti ku muntu uwataifwila imfwa Leza, nanti sile wakumya ukwi fupa lya muntu mufwe nanti ukwi lindi, ale wene wakowela, nu kusyala mukowele pa manda cinimbali.

¹⁷ Umuntu uwa kowela yamulondele itwi lya ng'ombe ino yosile iya kupapatila akowele. Alino yaliike mu civiya nu kwitilamo amanzi lungu.

¹⁸ Alino umuntu asi uwa mulandu atoole musambo wa isopu nu kuutimpika mu manzi yao. Alino akupoolele api taalu na pa viya vyonsi kumwi na antu yonsi ali penepo, nupya alinzile akupoolele nu muntu kwene uwakumizye ukwi fupa nanti ku muntu wino yakomile, nanti pali wiyo uwakumizye ku muntu uwafwile imfwa Leza nanti pali wiyo uwakumizye ukwi lindi.

¹⁹ Umuntu asi mukowele alinzile akanyile umuntu mukowele pa wanda uwalenga citatu na pa wanda uwalenga cinimbali, nga pa wanda uwalenga cinimbali alinzile wamukondola. Umuntu wino yakukondola alinzile afule ivyakuzwala vyakwe nu kufulala pa mwili, nga lino ilanzi lyawa ale wasangululwa.

²⁰ Lelo ndi cakuti umuntu mukowele wakana ukucita vivyo, wene yalinzile kumusukula umwi uvi, pamulandu wakuti wene watakowezya Itaalu lyakwe Yawe. Pamulandu wakuti amanzi akumukondwela yatapisile pa mwili wakwe, ali cino fwandi wene wasyala mukowele na makombezya yakwe yasyala yamukambatile.

²¹ Isunde lii, lilasyala ilya manda pe kunomuli. Uwala wakupolezya amanzi akufumya amakombela ali nu kufula ivyakuzwala vyakwe. Nu wakumya ku manzi yao, ale wene wasyala mukowele mpaka ukufika lino ilanzi lyawa.

²² Cintu icili consi cino umuntu mukowele wakumya ale naco kwene casyala icikowele. Nu muntu kwene uwacikumya nawe kwene amasyala mukowele mpaka ukufika lino ilanzi lyawa.