Mpendwa 16 - Amazwi Yakwe Leza 2013

Ucisanguka wakwe Kola, na Datani na Abilamu

¹ Kola umwana wakwe Izali, umwana wakwe Koati, umwana wakwe Levi, pamwi na antu yamwi yatatu amu luko lwakwe Lubeni, Datani na Abilamu ana yakwe Eliabu, na Oni umwana wakwe Peleti,

² yonsi yaa ukwikapo na ina Izlaeli yauze 250 yano yali intunguluzi izyamanyike cuze, yasangukile Mose.

³ Awe mukwai yonsi yao iyakonganila Mose na Aaloni iyayanena yati, “Awe lyene cafula! Antu yaa yonsi akwe Yawe, nupya Yawe ali naswe kwene swensi. Uzye lyene pacani cino wemo Mose ukuyuvwa nu kuika papeela ukucila umuntu wensi umwi uvi lii?”

⁴ Lino Mose uvwa afukama pansi afupime.

⁵ Alino anena Kola, pamwi ni umba lyonsi ati, “Mutondo akatondo, Yawe alatulanga umuntu wakwe uwasololwa pakuti apalamile kuli aliwe. Wino alaleka apalamile kunoli, wiyo kwene ale awino wasolola.

⁶ Fwandi we Kola, pamwi na yonsi akukulondela, mulinzile ukucita vii. Mutole ivifutikilo mwikepo makala ya moto

⁷ nga mutondo katondo mwikepo umoto nu ubani pa manso yakwe Yawe. Lyene tulalola umuntu wino Yawe alasolola pakasi kitu. Ala amwemwe mwe ina Levi mwemuno cafula!”

⁸ Nupya Mose anena Kola ati, “Si uvwini mwe ina Levi!

⁹ Uzye kuli mwemwe mwacilola wa kantu akanono, pakuti Leza wa ina Izlaeli amusolole ukufuma mwi uvi lya ina Izlaeli ilyasyala, nga umwisikulu amupalamike pipi na aliwe kuti mwaomba mwi Taalu lya mwene, na pakuti mwaimilila pa nkolelo yi uvi nu kuomba umulimo uli onsi pa malo yao?

¹⁰ Ala Leza wakupalamika kunoli, wewe pamwi na auzo yonsi aina Levi, lelo mukwezya ukutoola nu mulimo wa usimapepo kwene!

¹¹ Lino mukuilizyanya pali Aloni, ala asi aliwe wino mukusangukila, lelo a Yawe.”

¹² Alino Mose aama Datani na Abilamu, ana yakwe Eliabu, lelo yavwanga yati, “Tusikwiza kweneko!

¹³ Uzye pakutufumya mu mpanga iyo iya uzombozi ukulu cuze nupya iivunde, kwacepa pakuti wize utukome mu lwanga? Uzye lyene ndakai ukulonda kuti uumalalike myenzo itu?

¹⁴ Ala wemo utatuleta mu impanga iya uzombozi ukulu cuze nupya iivunde nanti kutupela impanga nanti vyalo vya matingi vino tungapyana. Si manye ukwezya ukutusomba? Awe, tusikwiza kweneko!”

¹⁵ Lyene Mose asoka cuze, nga anena Yawe ati, “Suula ivya wila wao. Ntatala nifya umwi panoyali nupya ntatala nayatolela nanti a punda wenga.”

¹⁶ Mose anena Kola ati, “Mutondo wewe pamwi na auzo aina Levi 250, akakulondela mulinzile kwiza kwi Taalu lyakwe Yawe. Aaloni nawe kwene alazanwako.

¹⁷ Cila wenga munomuli ali nu kutoola icifutikilo, aikepo nu ubani nga lyene aupeele pa kavuwa.”

¹⁸ Acino cila wenga atoola icifutikilo cakwe, aikapo makala ya moto nga nu ubani, nga aimilila pamwi na Mose na Aaloni pa mulyango wi Taalu lya Ukongano.

¹⁹ Lyene Kola akonganika iuvi lyonsi pyu, yala yakulolana pa manso pipi pipi na Mose na Aaloni pa mulyango wi Taalu lya Ukongano. Lilyo kwene uluswepo lukulu lwa lulumbi lwakwe Yawe luloleka kwi uvi lyonsi,

²⁰ nga Yawe anena Mose na Aaloni ati,

²¹ “Funtukini ku antu yaa pakuti njonone yonsi kwene lilyo kwene.”

²² Lelo Mose na Aaloni yafukama pansi yafupime nga yapunda yati, “Iye we Leza, wewe uli ntendekelo ya umi. Uzye ungasokela iuvi lyonsi lino umuntu wenga umwi uvi wifya?”

²³ Yawe anena Mose ati,

²⁴ “Nena antu kuti yafuntuke kwi taalu lyakwe Kola, na Datani na Abilamu.”

²⁵ Alino Mose akatuka pamwi ni ntunguluzi zya ina Izlaeli, yaya kuli Datani na Abilamu.

²⁶ Alino anena iuvi ati, “Funtukini ku mataalu ya antu yaa ankota, nupya mutakumya icintu cao icili consi. Pano namwe kwene mungalowa kumwi nayo pamulandu wa maifyo yao.”

²⁷ Acino yafuntuka kwi taalu lyakwe Kola, na Datani na Abilamu. Datani na Abilamu ala yatiyafuma nupya ala yaimi pa milyango ya mataalu yao, pamwi na aci nga na ana yao.

²⁸ Alino Mose anena antu ati, “Vii, avili vino mumamanya ukuti Yawe watantuma kuti ncite vintu vii vyonsi nu kuti asi kukulonda kwane kuno nacita vintu vii.

²⁹ Ndi cakuti antu yaa yamafwa imfwa ivikafwa na antu yonsi asyala, kwaula kuvunukwa na Yawe, ale lyene tumati Yawe atantuma.

³⁰ Lelo ndi Yawe wacita cimwi icitatala cacitika, nga nu musili wovoke nu kutuwizya yonsi kwene kumwi na vyonsi ivyakwao, cakuti yasendwe umwi lindi lino yacili apuma, lyene alino mumamanya ukuti antu yaa yatiyasuula Yawe.”

³¹ Lilyo kwene lino wamalila sile kuvwanga vii vyonsi, musili apaimi Datani na Abilamu iulepuka nu kovoka

³² nga iuyatuwizya yonsi pyu kumwi na amu mang'anda yao, kumwi na antu yakwe Kola na vyonsi vino wakweti.

³³ Yasenzilwe mwi lindi lino yacili apuma, kumwi na vyonsi vino yakweti. Musili iuyavimbilikizya, nga yalowa.

³⁴ Apa kupunda kwao, antu yonsi aina Izlaeli ali penepo yutuka, yala yakuti, “Utukini! Naswe kwene musili ungatumila!”

³⁵ Alino Yawe aponya umoto pa antu 250, yao apeelanga ubani, nga iuyoca mpaka iyasila.

³⁶ Yawe anena Mose ati,

³⁷ “Nena Eleaza umwana wakwe Aloni, simapepo, kuti afumye ivifutikilo vya mukuwa pali vino vyativisyala vyakwe yayo ati yapya. Alino utoole amakala yayo ukufuma mu vifutikilo uyasansante ku ncende yuze, pano ivifutikilo vivyo ivyamuzilo.

³⁸ Vyene vyali ivyamuzilo ukufuma lino vyapezilwe kuli Yawe pa kavuwa. Acino tola ivifutikilo vya antu yaa yano yakomilwe pamulandu wa nkota zyao, uvipamante mu tumalata nga upange cakufupilila kavuwa. Vyene vimayanga ivyakusoka aina Izlaeli.”

³⁹ Acino Eleaza simapepo atoola ivifutikilo vivi vya mukuwa avipamanta mu tumalata tunyale kuti apange cakufupilila kavuwa.

⁴⁰ Cii, cali cakusoka aina Izlaeli ukuti kusi nanti wenga asi uwamu mupanda wakwe Aaloni wino angiza ku kocela Yawe ubani pa kavuwa, pano wene angononwa wakwe vino cacitikile Kola na antu yakwe. Vii vyonsi vyacisilwe wakwe vino Yawe wapeezile ilamulo kuli Eleaza kupitila muli Mose.

⁴¹ Uwanda uwalondelela iuvi lyonsi lya ina Izlaeli iliilizyanya kuli Mose na Aloni, ilivwanga liti, “Watukoma yamwi mu antu yakwe Leza.”

⁴² Lelo pacisila lino iuvi lili lyaunganila Mose na Aaloni nu kuilizyanya kunoyali, iliseleukila kwi Taalu lya Ukongano nga lilola ukuti ikumbi likuvimba Itaalu nu kuti uluswepo lwa lulumbi lwakwe Yawe lwaloleka.

⁴³ Lyene Mose na Aaloni yaya yiimilila pa nkolelo yi Taalu lya Ukongano

⁴⁴ nga Yawe anena Mose ati,

⁴⁵ “Funtuka ku antu yaa kuti njonone yonsi pyu likwene!” Nga yonsi yoili yafukama pansi yafupime.

⁴⁶ Lyene Mose anena Aaloni ati, “Tola icifutikilo cako, uwikepo makala ya moto, nga usumbile ubani umwi penepo, nga ucincile uye ku antu nu kuyacitila ulutambi lwa kufuta amaifyo yao. Cincila! Ukali wakwe Yawe nga ni mpungo, vyativitandika mpiti.”

⁴⁷ Acino Aaloni acita wakwe vino Mose wamunenile, asimula aya pakasi ki uvi. Mpungo yalanga yatitandika mpiti pakasi ka antu, lelo Aaloni aoca ubani nga acitila antu ulutambi lwa kufuta amaifyo yao.

⁴⁸ Cii, calenzile kuti impungo isile nga Aaloni asyala aimi pakasi ka antu apuma na afwe.

⁴⁹ Impendwa ya antu afwile yali 14,700, kufumyako yao afwile mu kutalama kwakwe Kola.

⁵⁰ Lino impungo yasila, Aaloni aswilila kuli Mose ku mulyango wi Taalu lya Ukongano.