Mpendwa 13 - Amazwi Yakwe Leza 2013

Yatuma akulengula Kenani

¹ Yawe anena Mose ati

² “Tuma aonsi yamwi akuti yakendezye impanga yaku Kenani, ino nkupeela ku ina Izlaeli. Utume wenga ukufuma muli cila mutundu wa cikolwe cao, nupya intunguluzi panoyali.”

³ Acino api lamulo lyakwe Yawe, Mose nawe ali pa kuyatuma kutandikila sile ku Lwanga lwa Palani. Yonsi yali intunguluzi zya ina Izlaeli.

⁴ Yaa, ali mazina yao. Ukufuma mu mutundu wakwe Lubeni, a Syamua umwana umonsi wakwe Zakuli,

⁵ Ukufuma mu mutundu wakwe Simeoni a Syafati umwana umonsi wakwe Holi.

⁶ Ukufuma mu mutundu wakwe Yuda, a Kalebu umwana umonsi wakwe Yefune.

⁷ Ukufuma mu mutundu wakwe Isakali, a Igali umwana umonsi wakwe Yosefu.

⁸ Ukufuma mu mutundu wakwe Efulemu, a Hosyea umwana umonsi wakwe Nuni.

⁹ Ukufuma mu mutundu wakwe Benjamini, a Paliti umwana umonsi wakwe Lafu.

¹⁰ Ukufuma mu mutundu wakwe Zebuluni, a Gadieli umwana umonsi wakwe Sodi.

¹¹ Ukufuma mu mutundu wakwe Manase (mutundu wakwe Yosefu), a Gadi umwana umonsi wakwe Susi.

¹² Ukufuma mu mutundu wakwe Dani, a Amiyeli umwana umonsi wakwe Gemali.

¹³ Ukufuma mu mutundu wakwe Asyeli, a Setuli umwana umonsi wakwe Mikaeli.

¹⁴ Ukufuma mu mutundu wakwe Nafutali, a Nabi umwana umonsi wakwe Vofusi.

¹⁵ Ukufuma mu mutundu wakwe Gadi, a Geueli umwana umonsi wakwe Maki.

¹⁶ Yaa ali mazina yakwe yonsi yano Mose watumile ku kwendezya impanga yaku Kenani. Mose atemela Hosyea umwana wakwe Nuni izina lyakuti Yoswa.

¹⁷ Pa kuyatuma ku kwendezya impanga yaku Kenani, Mose ayanena ati, “Pitini mulemele ku Negebu alino mutumbele impanga ya myamba.

¹⁸ Mucecete vino impanga ili. Mulole na antu akaikala mwenemo ndi cakuti akome nanti yasi yakome, ndi cakuti avule nanti acepe.

¹⁹ Mulole impanga ino yakaikala mwenemo vino ili, ndi cakuti isuma nanti iipe. Ni misumba ino yakaikala mwenemo ndi ili pa mbiliwili nanti yazingulusya amalinga.

²⁰ Mulole impanga vino ikuloleka, ndi ya muvundo nanti foo, ndi ya miti nanti foo. Muombesye pa maka cakuti mukawele ni viseekwa vya mpanga ilya, vimwi vimwi.” (Insita kwene iya yali iya viseekwa vya nkolelo vya matingi.)

²¹ Caleka yatumbela ku kwendezya impanga ukutandikila ku Lwanga lwa Zini, nu kufika ku Leobu, pipi na pano yakaingilila ku Lebo Hamati.

²² Yapuzinkanya ukuya pita ku Negebu nu kwizafika ku Hebuloni, ukwikalanga Aiimani, Syesyai, na Talimai, amu mupanda wakwe Anaki. (Musumba wa Hebuloni wakuzilwe imyaka cinimbali lino umusumba wa Zoani uwamu Eguputo utali ukuulwe.)

²³ Lino yafisile ku cifoloma caku Esyikoli, ali kuno yakontwile musambo uwaseesile mukungo wa matingi. Antu yaili ayano yapinga mutembo. Yakuntula iviseekwa vya pomegeleneti na masamvu, iyasenda.

²⁴ Yatemela ni ncende iya izina lyakuti Cifoloma ca Esyikoli, pamulandu wakuti ali kuno aina Izlaeli yakulwile mukungo wa matingi.

Yawezya impwelo ya kwendezya

²⁵ Lino papita sile amanda ikumi na yani, antu yaya iyawela ukufuma ku lwendo lwa kwendezya impanga.

²⁶ Yiza yazana Mose na Aaloni pamwi na ina Izlaeli yonsi pa Kadesyi mu Lwanga lwa Palani. Kuku kwene yayalondolwela vyonsi vino yaile yalola nga iyayalanga ni viseekwa vya mpanga ilya.

²⁷ Yasimikila Mose yati, “Twaile mu mpanga ino watutumile mwenemo, nga cumi cumi yene iya uzombozi cuze nupya yavunda. Lola, iviseekwa vimwi vya mwenemo aivi.

²⁸ Lelo kwene antu akaikala mwenemo aamaka cuze. Ni misumba yao iikulu cuze nupya izingulusye amalinga. Kuluta pali vii, twaweni amu mupanda wakwe Anaki.

²⁹ Aina Amaleke yakaikala mu Negebu, nga aina Hiti, na ina Yebusi, na ina Amoli yakaikala mu mpanga ya myamba. Na ina Kenani nayo yakaikala mu nkumba yakwe Yemba Muyenzu nu mu nkumba ya Luzi lwa Yodani.”

³⁰ Alino Kalebu akonkomezya antu akongine kuli Mose, ati, “Kwene tulinzile twakatuka nu kuya poka impanga iyo, pano tungayacimvya.”

³¹ Lelo antu yano yapisile nawe yati, “Tutangazanza antu yalya akome cuze ukuluta sweswe.”

³² Acino yasalanganya ni mpwelo iya ntumpu ku ina Izlaeli yonsi iya wiipe wa mpanga ilya, ino yendizye, yati, “Impanga ino twapitanga mwenemo pakwendezya, impanga imwi muli inzala. Antu yonsi yano twaweni atuuluke sana, atali.

³³ Twaweni mwenemo na makonta, amakonono ya antu, amu mupanda wakwe Anaki. Mu kuloleka twalolike kwati sweswe vikwe, nga nu mu manso yao mu cumi ali vino twalolekanga.”