Mpendwa 12 - Amazwi Yakwe Leza 2013

Akasa kakwe Milyamu na Aloni

¹ Milyamu na Aaloni yatandike ukuilizyanya pali Mose pamulandu wa muci umwina Kusyi, wino watwite pasi pano umuci wakwe wali umwina Kusyi.

² Ala yakuuzya yati, “Uzye Yawe wavwanzile sile kupitila muli Mose wenga? Uzye atavwangile kupitila na muli sweswe kwene?” Yawe nawe auvwa vivyo.

³ Lelo kwene Mose wali umuntu umwi mufuke cuze ukuluta antu yonsi amuno nsi.

⁴ Nga lilyo kwene Yawe anena Mose, Aaloni na Milyamu ati, “Izini mwensi yatatu mulungame mwi Taalu lya Ukongano.” Caleka yonsi yatatu iyaya.

⁵ Lyene Yawe ali pa kwika mu mvumba yi kumbi nu kwimilila pa mulyango wi Taalu. Alino aama Milyamu na Aloni, nayo yapalama kunoli.

⁶ Alino Yawe avwanga ati, “Uvwini amazwi yane. Lino kasema wakwe Yawe ali namwe, nkaisokolola kuli aliwe mu vilolwa, nu kulanda kunoli mu viloto.

⁷ Lelo caiyela lino nkulanda nu muomvi wane Mose. Wene akaikala uwakutailwa muli vyonsi vyamu ng'anda yane.

⁸ Tukalanda sika, na manso ntontonto. Tukalanda apaswe nupya musi mu tucole foo. Wene akalola ni cata cakwe Yawe. Uzye fwandi pacani cino mutakwatile intete zya kuilizyanya pa muomvi wane Mose?”

⁹ Awe Yawe ayasokela cipyu cipyu, nga apita ayasya.

¹⁰ Lino sile ikumbi likusenka pi paala li Taalu, Milyamu alola ukuti wakwata tembwe, aswepuluka aya swe wa mula. Lino Aaloni wasenuka wamulola ukuti ali na tembwe,

¹¹ anena Mose ati, “Uwi cumi musambazi! Sutatuvunuka pa kwifya kuno twifya pa kutumpa kwitu.

¹² Utaleka Milyamu aye wa kapopo akacivyalwa mu nda yakwe nyina nu mwili wakako uole mbali.”

¹³ Acino Mose nawe alaizya kuli Yawe ati, “We Leza wane, si leka apole napapata!”

¹⁴ Nawe Yawe aasuka Mose ati, “Ndi cali aisi uwamuswila amati pa manso, uzye atangazewane amanda cinimbali? Cisuma, fwandi mutolini nu kumuyalila kunzi ya nsakwe amanda cinimbali, alino muce mumuwezye.”

¹⁵ Caleka yayalila Milyamu kunzi ya nsakwe pa manda cinimbali. Na antu yatatazile yatenuke ulwendo, suka sile nalino yamuwezizye.

¹⁶ Pacisila cakwe vivyo, alino antu iyafuma ku Hazeloti iyaya yakuula insakwe zyao mu Lwanga lwa Palani.