Mpendwa 11 - Amazwi Yakwe Leza 2013

Antu yailizyanya kuli Yawe nu moto wayaponela

¹ Awe antu iyatandika kuilizyanya pa ntazi zyao. Lino Yawe uvwa vino yakuilizyanya, asoka cuze nga atuma umoto iuyaponela nga woca nu lutwe lumwi ulwa nsakwe.

² Antu nayo iyalaizya kuli Mose, nga nawe ayapapatila kuli Yawe. Alino umoto iuzima.

³ Ni ncende iya iyayama ukuti Tabela, pano umoto wakwe Yawe waponile pano yali.

Aina Izlaeli yapeelwa inkwale

⁴ Nga nupya kwene antu yamwi, maka maka ainamasi yano yapitanga nayo, yuvwa musu. Ali cino aina Izlaeli iyaswilizya ukuilizyanya yati, “Si cange cizipe umwi atupela inyama tulye!”

⁵ Swemo twiusya inswi zino twaipakizyanga ku Eguputo ukwaula kuviculila. Ni viimbi, ni vibiliki, na yaliiki na kanyense, pali pamwi na galiki.

⁶ Lelo kuno kwene awe cumi tumafwa sile ku nzala. Twatituulilwa vyonsi, tusikulola nanti cimwi, suka sile mana mutupu!

⁷ Fwandi mana wiyo wakozile utupece twa mbezu zyakwe kolianda. Alino nu kuloleka walolekanga kwati ivinyamuti.

⁸ Antu yayanga ku kuzyola, iyavisya api we nanti ukuponda mu cina. Alino lyene yavyeleka mu mpoto nu kutandika ukupanga imikate. Ndi walya vyuvwikanga kwati utumakeke tuno yakandilamo na amafuta ya miolivi.

⁹ Ndi cakuti ulumi lwakunga pa nsakwe usiku, ali lino na mana kwene waponanga.

¹⁰ Alino Mose auvwa kuno antu yakuilizyanya ulanda ulanda, cila luko pa mulyango wi taalu lyao. Yawe pasi pa kusoka. Mose nawe cimusakamika.

¹¹ Alino anena Yawe ati, “Uzye pacani cino wacitila muomvi wako icintu ukwipa ndi cii? Uzye pacani cino utazangile munondi? Uzye pacani cino wanjimila uluse lwako pa kunkaika icisendo ca mutundu onsi uu?

¹² Uzye icumi anene nanyomelile nu kuvyala antu yaa onsi? Fwandi uzye pacani cino ungantazyelela nu kuleka injasende nene mu minwe yane, ungati nene indi kalela wa tunya ututacili tusumuke, lilyo lino nkuyatwala ku mpanga ya ulayo ino walavile ivikolwe vyao?

¹³ Aukwi kuno ningafumya inyama yakuti antu yaa yonsi yalye? Pasi pano akuli nene akuno yakulilila yati, ‘Tupele inyama tulye!’

¹⁴ Awe icumi naposiwa kusenda antu yaa yonsi nenga, pano lyene waya umulimo umwi ucuzye. Cisendo cii canyomela cuze!

¹⁵ Ndi cakuti ali vino ukulonda uncitile, awe lyene cazipa sile nu kunkoma. Uncitila uluse, ngano utanzunyizye nupya.”

Inkombe amakumi cinimbali

¹⁶ Yawe anena Mose ati, “Konganika aikolo amakumi cinimbali ya ina Izlaeli, yao yano wamanya ukuti intunguluzi zicindame nupya inkombe pa antu yao. Uyalete ukwi Taalu lya Ukongano alino yimilile pamwi nawe.

¹⁷ Nani namaika nu kwiza landa nawe kukwa. Nupya indi nu kwiza tola mupasi uwaya pali wewe nu kuyapeela nayo kwene. Fwandi ali yano yamasendanga pamwi nawe icisendo ca mutundu uwo. Usikuyanga wenga pa kucisenda awe.

¹⁸ Lyene kanene antu yonsi uti, ‘Iteyanyini ku kuisangulula uwanda wa mutondo. Ali lino mulalya inyama, pasi pano mwatimuilizyanya kuli Yawe, nga nawe watauvwa kuno mukulila ulanda ulanda ala mukuvwanga ukuti cange cizipe umwi amupeela inyama mulye! Nu kuti mu Eguputo mwene mwasansamukanga! Fwandi acino Yawe amamupeela inyama, mumalya.

¹⁹ Mutalalya sile inyama uwanda onga, nanti amanda yaili, nanti amanda yasano, nanti amanda ikumi, nanti sile amanda amakumi yaili,

²⁰ lelo mulalya inyama umwezi utuntulu mpaka sile ikamufiisye ku mwenzo, nu kufumila mu mpuno alino nu kumuletela muselu. Pamulandu sile uwakuti mwasuula Yawe, wino akaikala namwe, mwailizyanya cuze kunoli ukuti cange cizipe ndi atamufumizye mu Eguputo.’ ”

²¹ Lelo Mose ali pa kunena Yawe ati, “Uluko luu luno nkwikala nalo, ulwa vita ivikapita pa ngazo ivili amazimbi mutanda. Ali vino ungalanda ukuti ungayapeela inyama iyakulya pa mwezi utuntulu?

²² Uzye ndi cakuti yakoma iviteekwa vyonsi ivinono ni vikulu, vingayakumana? Uzye ndi cakuti yuma inswi zyonsi zyamuli yemba, zingayakumana?”

²³ Yawe nawe aasuka Mose ati, “Uzye ikasa lyakwe Yawe iliipi? Ulailolela wemwisikulu, ndi cakuti izwi lino nakunena lilafikiliziwa nanti foo.”

Umupasi wikila pa Ikolo

²⁴ Alino Mose afuma anena antu amazwi yakwe Yawe. Akonganika aikolo amakumi cinimbali aleka yimilila ukuzinguluka Itaalu.

²⁵ Alino Yawe nawe aika umwi kumbi nu kulanda nawe. Ali pakutoola ku mupasi uwali pali Mose, nu kuwika pa ikolo yayo amakumi cinimbali. Lyene lino mupasi wikala panoyali, iyasema. Lelo yatatwalilile pa nsita ntali.

²⁶ Nga pa ntunguluzi kwene zizyo, aonsi yaili, Elidadi na Medadi, yasile mu nsakwe nupya yataile ukwi Taalu. Mumu kwene mwi Taalu mupasi uwikila panoyali, nga nayo kwene iyatandika ukusema wakwe vino yakasema yakacita.

²⁷ Alino mulumendo asimula nu kuya nena Mose ati, “Ala Elidadi na Medadi yakusema mu nsakwe.”

²⁸ Yoswa umwana umonsi wakwe Nuni uwazwilizyanga Mose ukutandikila sile ku wance wakwe, anena Mose ati, “We musambazi, Mose, uyalesye!”

²⁹ Lelo Mose amwaasuka ati, “Si uvwa uzuwa pali nene? Si cange cizipe ndi antu yonsi yakwe Yawe yaya yakasema, yapeelwa nu mupasi wakwe!”

³⁰ Alino Mose aswilila ku nsakwe pamwi ni ntunguluzi amakumi cinimbali zya ina Izlaeli.

Yawe wayaletela inkwale

³¹ Awe alino Yawe atuma icipunga icikatusya inkwale ukufuma lwa kuli yemba nu kwiza ziponyezya mu nsakwe. Izivimba musili mutika ukulingana na mamita yaili. Izilimba ukuliizya insakwe konsi konsi, nupya ukulingana ni ncende ino umuntu angapita musanya onsi.

³² Antu ali pa kukatuka nu kutandika ukulema inkwale, musanya onsi nu usiku onsi wa wanda ulya nga nu wanda uwalondelela penepo. Na wino tungati wakusile tunono awiyo uwakusile ukulingana na maooma ikumi. Alino iyanika inkwale monsi mumbali ya nsakwe.

³³ Lino inkwale zicili mu tunwa twao, yatacili yazisyete nu kuzimila, icipyu cakwe Yawe icivundukila antu nga ayaponyezya impungo imwi ikulu cuze.

³⁴ Caleka iyatemela incende iya izina lyakuti Kibuloti Hataava (cikasenula ukuti “Lindi lya Musu”), pamulandu wakuti ali kuno yazisile antu yao yacamusu.

³⁵ Ukufuma ku Kibuloti Hataava antu iyalungama ku Hazeloti, ali kuno yaya yakuula insakwe yikala kweneko.