Mpendwa 10 - Amazwi Yakwe Leza 2013

Intandala zyakwe siluva

¹ Yawe anena Mose ati,

² “Panga intandala zyakwe siluva yaili akusula. Uce wayaomvya pa kwama iuvi napa kuyamanyisya ukutenuka pa nsakwe.

³ Lino yalizya intandala zyao zyoili, iuvi lilinzile kukongana panuli, pa mulyango wi Taalu lya Ukongano.

⁴ Lelo ndi yalizya intandala yonga, ale lyene yao sile alinzile kwiza kongana panuli intunguluzi zya nko zya ina Izlaeli.

⁵ Lino yalizya intandala yaputa lyonga sile, imitundu ino yakuula insakwe lwaku ufumondaka ilinzile kutenuka.

⁶ Lino yalizya intandala iila lyakwe ciili, yaputa lyonga sile, imitundu ino yakuula insakwe lwaku kaeya ilinzile kutenuka. Fwandi ukulizya kwa ntandala ukwa kuiteyanya ukukatuka.

⁷ Alino pa kukonganika sile iuvi mulizye intandala, lelo mutalizya mu musango wakupitilizya iciunda.

⁸ Ana yakwe Aloni, yasimapepo aliyo yalinzile kulizya intandala. Cii, cili nu kuya ali ceo cakuyelelela kunomuli nu ku mikulo ino iliza ku nkolelo.

⁹ Lyonsi lino mulaya umu nkondo mu mpanga inu, lino mukuipokolola ku anisi inu yano yatiyamuzanza, muce mulizye sile intandala zya nkondo. Lyene Yawe Leza winu atalamwilila, lelo alamutuula ku anisi inu.

¹⁰ Alino nu mu nsita zinu zyaluzango, ivili mu manda inu akuzevya myezi ipya nga nu kuzevya kuze ukwasyala ukwa upefi, muce mwalizya intandala pa kupeela amawila inu akoca na autandano. Lyene ndiusya ukumwazwilizya. Nene indi Yawe Leza winu.”

Aina Izlaeli yafumako ku Sinai

¹¹ Pa wanda uwalenga amakumi yaili, mu mwezi wakwe ciili kwene mu mwaka wakwe ciili, ikumbi ilikatuka lifuma papela yi Taalu lya Ukongano.

¹² Lyene aina Izlaeli ali pa kutenuka yafuma mu Lwanga lwa Sinai iyazeuluka ku cifulo ni cifulo, suka lino ikumbi lyaya limilila mu Lwanga lwa Palani.

¹³ Ali vino lyali iila lya kutandikilapo ukutenuka, ukukuyela ilamulo lino Yawe wapeezile Mose.

¹⁴ Inzipa ya nsakwe zya mutundu wakwe Yuda iyatandike ukupita kulingana namuno yayatantikile. Ni ntunguluzi yao wali a Nasyoni umwana wakwe Aminadabu.

¹⁵ Netaneli umwana wakwe Zuali wali intunguluzi ya amwi umba lya mutundu wakwe Isakali,

¹⁶ nga Eliabu umwana wakwe Heloni wali intunguluzi ya amwi umba lya mutundu wakwe Zebuluni.

¹⁷ Alino lyene iyapangulula Itaalu lya Ukongano, nga aluko lwakwe Gelisyoni na aluko lwakwe Melali, yakasenda yi Taalu lya Ukongano, nayo iyatenuka.

¹⁸ Alino pizile ipalondelela iumba lyakwe ciili. Ilili nzipa ya nsakwe zya amu mutundu wakwe Lubeni. Intunguluzi yao a Elizuli umwana wakwe Syedeuli.

¹⁹ Syelumieli umwana wakwe Zulisyadai wali intunguluzi ya amwi umba lya mutundu wakwe Simeoni,

²⁰ nga Eliyasafu umwana wakwe Deueli wali intunguluzi ya amwi umba lya mutundu wakwe Gadi.

²¹ Lyene aina Levi aluko lwakwe Koati nayo iyatenuka, ala yasenzile ivintu vyamuzilo. Lino yatali yafike pa cifulo cino yali nu kukuulapo insakwe, Itaalu lya Ukongano ala lyatilimikwa mpiti.

²² Alino pizile palondelela iumba lya nzipa ya amu nsakwe zya amu mutundu wakwe Efulemu, mu mpuka mu mpuka. Intunguluzi yao a Elisyama umwana wakwe Amiudi.

²³ Gamalieli umwana wakwe Pedazuli wali intunguluzi ya amwi umba lya mutundu wakwe Manase,

²⁴ nga Abidani umwana wakwe Gidyoni wali intunguluzi ya amwi umba lya mutundu wakwe Benjamini.

²⁵ Pakusyalikizya pizile pakatuka yao a nzipa ya nsakwe zya amu mutundu wakwe Dani. Wali ali wakufundikizya pa nsakwe zyonsi, nayo iyatenuka mu mpuka mu mpuka. Intunguluzi yao a Aiezeli umwana wakwe Amisyadai.

²⁶ Pagieli umwana wakwe Okalani wali intunguluzi ya amwi umba lya mutundu wakwe Asyeli,

²⁷ nga Aiila umwana wakwe Enani wali intunguluzi ya amwi umba lya mutundu wakwe Nafutali.

²⁸ Fwandi uwo uli musango uno imitundu ya ina Izlaeli yapitilanga mwenemo, ukulingana na muno yakonkanile lino yakutenuka.

²⁹ Alino Mose anena Hobabu, mulamu wakwe, umwana umonsi wakwe Leweli umwina Midyani ati, “Twasya tukatuke ukuya ku mpanga ino Yawe watulavile ukutupeela. Fwandi uce utulondele nga naswe tulakusunga ningo cuze, pasi pano Yawe walaya aina Izlaeli ukuya nu longo pee.”

³⁰ Hobabu nawe aasuka ati, “Awe mukwai nemo ntalalondela, nkuswilila kumwitu ku antu yane.”

³¹ Nawe Mose amunena ati, “Twapapata utatusya, pano wemo wamanya incende izyayana kukuula insakwe zitu mu lwanga. Cazipa uce uwaya ukutusopa.

³² Ndi wala wapita naswe, tulakupeela visuma pa vintu vino Yawe watupela.”

Antu iyatenuka

³³ Lyene lino antu yatenuka, yasya Mwamba wa Sinai, yapita ulendo wa manda yatatu. Pa manda yonsi yaa yatatu ala Mbokosi ya Upangano yakwe Yawe ikuyakolelela kuti yayalondele incende pakuti yangakuula insakwe.

³⁴ Lilyo lyonsi lino iyatenuka ukufuma pa nsakwe pano yali, ikumbi lyakwe Yawe lyayanga apapela pano yali musanya.

³⁵ Lyonsi lino yatenuka ni Mbokosi ya Upangano, Mose wavwanganga ati, “Si ungala ukatuke we Yawe usaasye anisi yako, na wensi uwakusoka asimule kutaluka kunuli.”

³⁶ Lyonsi lino yimilila ni Mbokosi ya Upangano, Mose wavwanganga ati, “Ndanga we Yawe, su ngala uwele kuno ku mintapendwa ya ina Izlaeli.”