Milimo 6 - Amazwi Yakwe Leza 2013

¹ Mu manda yalya lino alondezi yavulilangako, Ayuda avwanganga Cigiliki yailizyanya pa Ayuda avwanganga Ciyebulai pano yali na kasoozi pali yamukamfwilwa yao pa kuntayankanyako vino yulilwe cila wanda.

² Caleka atumwa ikumi na yaili yaama iumba lya alondezi onsi, yayanena yati, “Citanga cizipe kutazyela kukosola mazwi yakwe Leza kuti twaankanya vyakulya.

³ Caleka inane, sololini antu cinimbali amunomuli, azuziwamo na Mupasi Wamuzilo na mano, yano tumapela uwangalizi pa mulimo uu.

⁴ Naswe, sweisikulu lyene, tumaipelesya ku kupepa nga nu mulimo wa kukosola.”

⁵ Lyene mazwi ya atumwa yazipila iumba lyonsi nga yasola Sitivini, umuntu uwali nu utailo ukulu cuze nupya wazuziwemo na Mupasi Wamuzilo. Filipo nga na Polokolasi, Nikana, Timoni, Pamenasi na Nikolasi, umusenusi wafumile ku Antioki

⁶ Iumba liyaleta ku atumwa, nao yapepa, nu kwika makasa yao panoyali.

⁷ Caleka Ilandwe lyakwe Leza lisalangana konsi, nga ni mpendwa ya alondezi yavulilangako mu Yelusalemu. Yasimapepo yano ataile Ilandwe Lisuma, nao mpendwa ikula.

Ayuda yalema Sitivini

⁸ Sitivini wali umuntu wino Leza wapolelile umwenzo wakwe pakulu cuze nu kumupeela maka. Wene wacitanga vinjelengwe vikulu ni vizungusyo pakasi ka antu.

⁹ Lelo antu yamwi yamukatukila, yali amu Ng'anda yamapepo ino yatangi ya antu akululwa. Antu yaa yafumile ku Kuleni nu ku Alekizandilya. Yene pamwi na Ayuda yauze afumile ku Kilikya nu ku Asiya yatandike kupazyanya na Sitivini.

¹⁰ Lelo yaposiwe kumutonsya pano Mupasi Wamuzilo wamupile amano yakuvwangilamo.

¹¹ Caleka yapela mafukakanwa ku antu yamwi kuti yavwange yati, “Tuvwile akuvwanga mazwi ya misuli pali Mose na Leza!”

¹² Umu musango uu, yamusongelekanya ku antu, ku ikolo na kuli yakasambilizya ya Masunde, nga nao yamukatukila, yamulema, yamutwala kwi Tengo.

¹³ Lyene yaleta antu yamwi kuti yamutumpwile yati, “Muntu wi lyonsi akuvwanga mazwi ya misuli apa Ng'anda ikulu yakwe Leza yamuzilo na pa masunde yakwe Mose.

¹⁴ Tuvwile akuti Yesu uwaku Nazaleti alomoola Ng'anda ikulu yakwe Leza nu kusenula intambi zitu zyonsi izyafumile kuli Mose!”

¹⁵ Onsi ali mwi Tengo yalolekesya Sitivini, nga yalola vino usyu wakwe walolekanga kwati uwa mungeli.