Milimo 3 - Amazwi Yakwe Leza 2013

¹ Wanda umwi Petulo na Yoane yayanga ku Ng'anda ikulu yakwe Leza pa 3 koloko amanguzi, nsita ya mapepo.

² Lyene pa mpongolo ya Ng'anda ikulu yakwe Leza, ino yamwangwa ukuti Mpongolo Iyembe, yazanapo umuntu uwavilwe cite. Cila wanda yamutwalanga ku mpongolo kuti alenga ku antu akwingila mu Ng'anda ikulu yakwe Leza.

³ Wene lino walola Petulo na Yoane yakwingila ayalenga kuti yamupeleko cimwi.

⁴ Lyene yamulolekesya, nga Petulo amunena ati, “Lola kunotuli.”

⁵ Nawe ayalolekesya, ala akupaalila kupelwa cimwi kufuma kunoyali.

⁶ Petulo amunena ati, “Ntakweti nanti lupiya lumwi, lelo namakupeela cino nkweti. Mwi zina lyakwe Yesu Klistu uwaku Nazaleti Katuka wapita!”

⁷ Alino amulema ikasa lilunji, nga amukatusya. Lilyo kwene ingazo nga nu tunkulungu twakwe vikoma.

⁸ Alino atoloka aimilila, atandika nu kupita, nga ayalondela nu mu Ng'anda ikulu yakwe Leza, ala akupita nu kutoloka nu kutasya Leza.

⁹ Iumba lyonsi lyamuweni akupita ala akulumbanya Leza.

¹⁰ Lyene lino yamulooka vino aliwe wino wikalanga akulenga pa Mpongolo Iyembe ya Ng'anda ikulu yakwe Leza, nao yazunguka pali cino cacitike kunoli.

Petulo wavwanga ku antu mu Ng'anda ikulu yakwe Leza

¹¹ Lino umuntu wii acilemelile Petulo na Yoane, antu yonsi yazunguka cuze, nga yasimwila kunoyali, ku lukungu luno lwamwangwa ukuti Lukungu lwakwe Solomoni.

¹² Lino Petulo walola antu ayauzya ati, “Mwe ina Izlaeli, uzye pacani mukuzunguka pali vii? Uzye pacani mukutulolekesya kwati mu maka itu nanti ukapepa witu wacilamo vyati vilenga kuti aapita?

¹³ Leza wakwe Abulaamu, Isaki na Yakobo, Leza wa vikolwe vitu uwapela lulumbi kuli Yesu muomvi wakwe. Mwemo mwamupile ku ntunguluzi zya Ciyuda mumukana pa manso yakwe Pilato, nanti angala Pilato wakasi kuti amusapule.

¹⁴ Yesu wali uwamuzilo nupya mololoke, lelo mwemo mwamukanyile, nga mulenga Pilato kuti amusapwile inkomi mu cifulo cakwe.

¹⁵ Mwakomile Umwene wino akapeela umi, lelo Leza wamuzyukwile kufuma ku afwe, nga naswe sweswe yakambone pali cii.

¹⁶ Pa kuya nu utailo mwi zina lyakwe Yesu, amuno umuntu wii wino mwalola nu kumanya wapelwa maka. Utailo uno akweti muli Yesu uwati umulenga kuti apoziwe mu cumi, ndi vino mwati mulola nu kumanya.

¹⁷ “Acino ndakai, inane, natimanya vino mwemo pamwi ni ntunguluzi zinu mwacisile cii pamulandu wa kuntamanya kwinu.

¹⁸ Ku mpiti Leza wavwanzile kupitila muli yakasema yonsi ukuti Klistu wino wasolwile alacuziwa, nga cati cifikiliziwa mu musango kwene uu.

¹⁹ Caleka zenzukini, nu kuswilila kuli Leza pakuti nawe amwelele maifyo inu,

²⁰ na pakuti Leza amupeele upemwilo uwaku Mupasi nga nu kutuma Yesu. Wene ali Katula uwalavilwe wino wasolola pamulandu winu.

²¹ Cingamuzipila kuti alali mwiyulu kufikila na pa kwiza kwa nsita lino vintu vyonsi vilalengwa ivipya. Vii avino Leza wavwanzile kupitila muli yakasema yakwe amuzilo aku manda yampiti.

²² Pano Mose wavwanzile ati, ‘Leza winu alamutumila kasema, wakwe vino wantumile. Wene alaya wenga uwamu antu inu, mukaamuvwa mu vintu vyonsi vino alamunena.

²³ Na wino wensi uwakana ukuvwa kasema wilya alapaatululwa kufuma ku antu yakwe Leza nu kononwa.’

²⁴ Endi na yakasema onsi, kutandika pali Samueli na yonsi alondelile yasemile ivikucitika manda yaa.

²⁵ Malayo yakwe Leza ukupitila muli yakasema yakwe yene akwe mwemwe, nga namwe mwemwe mpyanyi zya upangano uno Leza wapangine ni vikolwe vinu. Wakwe vino wanenyile Abulaamu ati, ‘Mu mupanda wako amuno inko zyonsi zilapolelelwa.’

²⁶ Caleka Leza wasolwile muomvi wakwe nu kumutuma kuli mwemwe nkolelo, ku kwiza mupolelela mu kulenga cila muntu afume ku misango yakwe iipe.”