Milimo 27 - Amazwi Yakwe Leza 2013

¹ Lino yapingula ukuti tuli nu kuya ku Italya mu wato, Yapela Paulo na anyepwe yauze kuli Juliasi musika wa asilika, uwali uwamu mpuka ya vita ino yatangi Impuka yakwe kateeka Agostino.

² Tupatama mu wato uwaku Adilamitiamu uwali nu kupita mu misumba yamu nkumba yakwe yemba, mu muputule wa mpanga ya Asiya, nga tukatuka tupita. Twali na Alisitako umwina Makedoniya, uwafumile ku Tesalonika.

³ Pa wanda uwalondelela tufika mu Sidoni. Juliasi wali nu luse pali Paulo, amuta kuti aye akalole yacuza yakwe, pakuti yamupele vino akulonda.

⁴ Alino kufuma kuku, lyene pano muza wakoma kuno tukuya, tulondela mu nkumba ya cilila ca Kupulo.

⁵ Alino tupita pali yemba ku kaeya ka Kilikya na Pamfuliya, tufika ku Mila muzi waku Likiya.

⁶ Kuku akuno musika azana uwato uwaku Alekizandilya, uwayanga ku Italya, nga amuno atupatika.

⁷ Lyene twapita panono panono pa manda aingi, ni ntazi ikulu cuze. Tusuka tufika pipi nu muzi wa Kinido. Pa kuzana vino umuza watulesyanga kuya pa nkolelo ya ntunga ilya, tupita mu nkumba ya cilila ca Kulete, kupuzya ku Salimone.

⁸ Twapita pipi nu mu nkumba nu lwendo lutala cuze tusuka tufika na kuno yakati, “Malambwa yasuma,” pipi nu musumba wa Laseya.

⁹ Pene twatenzipo insita ntali, kusuka kuya ni ntazi yakupita pali yemba, nu Wanda wa kuizilizya ukulya pa kwelelwa maifyo, ala wapita. Caleka Paulo ayasoka ati,

¹⁰ “Mwe antu mwe, nalola ukuti ulendo witu ukufuma pano umaya uwa uzanzo, kumaya ukuponzya kwa viya nu kononeka kwa wato, nu kulovya nu umi kwene.”

¹¹ Lelo Musika wa asilika azumilizya mazwi yakwe kangalila na mazwi ya mwine wato, asula mazwi yakwe Paulo.

¹² Ilambwa litalinzile ukwikalapo insita ya mwela. Caleka antu aingi yalondanga kufumako ukwezya kuya ku Fonikisi, ilambwa lya mu Kulete ilyalolenkana na kaeya ki lunji mbali yuze na kimani.

Cipupu pali Yemba

¹³ Umuza uwaku kaeya utandika kupunga kanono, antu yelenganya vino mapange yao yamaomba. Caleka yakatusya nanga yapita pipi mu nkumba ya Kulete.

¹⁴ Lelo lilyo kwene umuza wa maka akulu uno yamanga yati, “Katutu-Ufumondaka” upunga kufuma mu cilila.

¹⁵ Wiza upuma uwato, nao usendwa nga pano twapindamilwa nu muza tuposiwa kulungika uwato.

¹⁶ Alino tuzingulukila kumwi tutulilizya umupipi na ka cilila aka Kauda, kwi lunji lya kaeya. Pano twali na kawato kanono kano twakulanga twati kamaponga, twezya na maka ukukaleta mukasi.

¹⁷ Awe tusuka tukanyepelela ni myando ku wato ukalamba. Pano yuvwile intete zyakuti limwi uwato ungaya ukapume mu musensenga uwamu nkumba ya Libya, iisya matanga kuti uwato wasensela sile na maimbi.

¹⁸ Cipupu citwalilila, caleka uwanda uwalondelela yatandika ukusumba muli yemba iviya ivyali mu wato.

¹⁹ Uwanda uze walondelela yatandika kusumba na makasa yao iviombelo vya wato.

²⁰ Tutaweni ilanzi nanti intanda apa manda aingi, nu muza watwalilile ukupunga na maka akulu cuze. Alino pacisila tuponzya upaalilo uno twali nao uwakutuulwa.

²¹ Pacisila lino antu iikala nsita ntali kwaula cakulya, Paulo aimilila pakasi kao avwanga ati, “Mwe antu, mwakanyile munguvwe pakuti mutafuma ku Kulete. Lyene nga twalewike ukononeka kuu nu kuponzya kwa vyuma.

²² Lelo ndakai namupapata, posyini! Kusi nanti umwi uwa munomuli amalovya umi wakwe. Uwato sile umaononeka.

²³ Pano ilelo usiku mungeli wakwe Leza wino naya nawe nupya wino nkapepa wali wiza wanena ati,

²⁴ ‘Utuvwa intete, Paulo! Uli nu kuya imilila pa manso yakwe Kesa. Leza mu usuma wakwe kunuli watakupeela amaumi ya antu yonsi yano mupatime nao, yatakufwa.’

²⁵ Caleka posyini, mwe antu mwe! Pano nataila muli Leza ukuti cimaya ndi vino wali wanena.

²⁶ Lelo cimatusumba pa cilila cimwi.”

²⁷ Cali usiku uwanda walenga ikumi na yani, cipupu citusunkilizya muli yemba wa Adiliya. Usiku pakasi yakapisya ya wato yatunganya kuti yapalamila ku mulundu.

²⁸ Caleka yanyepelela icela ku mwando, yasumbila muli yemba, nga yazana ukuti kuzika kwakwe yemba kuli amamita umwanda onga na makumi yaili. Papita kasita kanono nupya yapima yazana makumi fundimbali.

²⁹ Lyene yoopa yati limwi uwato ungapuma ku milunda, caleka iisizye inanga zini kufuma ku cisila ca wato, yapepa kuti uce zuwa.

³⁰ Yakapisya ya wato yene yalonda kuutuka, iisya kawato kanono yacita kwati yakuya ika inanga nkolelo ya wato.

³¹ Lyene Paulo anena musika wa asilika pamwi na asilika ati, “Ndi mwaleka yakapisya ya wato yapita, ale lyene mutangatuulwa.”

³² Caleka asilika yaputula mwando uno yanyepelile ku kawato kanono nga yaleka kaponela mu manzi.

³³ Lyene lino wati waca, Paulo ayapapata kuti yalye, ayanena ati, “Mwalolelanga ukufika na manda ikumi na yani, nga amanda onsi mutalile nanti cimwi.

³⁴ Namupapata, lyene, mulye kamwi kuti muye nu umi. Kusi nanti umwi munomuli amaponzya nanti lunyele longa kumutwe wakwe.”

³⁵ Pacisila cakuvwanga cii, Paulo atoola mukate, ataizya kuli Leza pa manso yao, aumokoola, nga atandika ukulya.

³⁶ Alino yonsi yaposya yatandika ukulya.

³⁷ Swensi swe muno twali mu wato twali mpendwa imyanda iili na makumi cinimbali na mutanda (276).

³⁸ Pacisila lino umuntu wensi walya wikuta, yangupazya uwato pa kusumbila ingano zyonsi muli yemba.

³⁹ Lino waca katondo, yakapisya ya wato yafilwa kulooka kunoyali, lelo yaweni pamwi pali cikoline wa lusenga pa nkumba nga akuno yapanga kuya sika wato ndi cingaya.

⁴⁰ Lyene yaputula inanga zya wato yazituwizya muli yemba, yasapula ni myando yalemile inkafi. Lyene yakatusya itanga inkolelo ya wato apakuti umuza ungapisya uwato inkolelo, nga tupita ukulungama ku mulundu.

⁴¹ Lelo uwato uya upuma mu citumba ca musensenga uwatulime muli yemba. Alino uwato ufyama inkolelo ni cisolo cauko citandika ukulepoka mulandu wa maimbi.

⁴² Asilika yapanga kukoma anyepwe yonsi pakuti yatowela ku mulundu yutuke.

⁴³ Lelo musika walondanga kutuula Paulo. Caleka ayalesya kucita cico. Lelo apeela ilamulo lyakuti antu yonsi yano angowa yafume mu wato inkolelo nu koowa ukuya ku mulundu.

⁴⁴ Na yauze yalondele, ale yati yalemelela ku mbao nanti ku tupimfya twa wato. Vii, vili vino swensi twafumile ku nkumba mu mutende.