Milimo 25 - Amazwi Yakwe Leza 2013

¹ Lino Fesito wafika mu mpanga ya Yudeya pacisila ca manda yatatu afuma ku Kesaliya aya ku Yelusalemu.

² Yasimapepo akalamba ni ntunguluzi zya Ciyuda iiza kunoli ku kusitaka Paulo. Alino yapapata kuli Fesito

³ kuti ace aleke yalete Paulo ku Yelusalemu, pano yalanga yati yumana kapi yateyamila Paulo kuti yamukome.

⁴ Fesito nawe ayanena ati, “Paulo wasungwa mu ng'anda yaminyololo ku Kesaliya, nani akuno nkuswilila zuwa.

⁵ Acino tungapita ni ntunguluzi zinu zimwi zikamulongwele kuku kwene ndi kuli cimwi cino waifya.”

⁶ Fesito aikala nao mu Yelusalemu manda cinani nanti ikumi nga aswilila ku Kesaliya. Lino waca katondo aikala pa cilimba ca kupingwila milandu, alino apeela ilamulo kuti yalete Paulo pa manso yakwe.

⁷ Lino Paulo wafika, Ayuda yao aizile kufuma ku Yelusalemu iiza yamuunganila, yatandika kumulongwela milandu iingi ino yatangamusinila.

⁸ Lelo Paulo aitaasya ati, “Ntacita icintu cimwi ciipe pa masunde ya Ayuda nanti pa Ng'anda ikulu yakwe Leza nanti kuli Kesa kateeka uwaku Loma.”

⁹ Fesito walondanga ukuzanzya Ayuda. Caleka auzya Paulo ati, “Uzye ungatemwa kuti upite ku Yelusalemu akuno inkakupingwile milandu ii yonsi?”

¹⁰ Lelo Paulo aasuka ati, “Nemo njimi mu cilye ca milandu cakwe Kesa, icilinzile cimputwile mulandu. Ntacisile icintu cimwi ciipe ku Ayuda, wakwe vino nawe kwene umanyile.

¹¹ Ndi cakuti nati mvuna isunde nu kucita icintu cimwi icilingine kuti nkomwe, lyene ntanguzya kuti ntakomwa. Lelo ndi cakuti mu milandu ino yakundongwela musi cimwi, lyene kusi umuntu angampeela kunoyali. Lelo nemo nkulenga kuti mulandu uye kuli Kesa.”

¹² Lyene Fesito, pacisila ca kulanzyanya na yasicilye yakwe, avwanga ati, “Watulenga kuti mulandu uye kuli Kesa. Caleka umaya kuli Kesa.”

Fesito walondolwela mwene Agilipa mulandu wakwe Paulo

¹³ Pacisila ca manda yamwi, mwene Agilipa pamwi na Benise muci wakwe iiza ku Kesaliya ukwiza lamuka Fesito.

¹⁴ Lino ikalako manda yamwi, Fesito alondolwela mwene Agilipa mulandu wakwe Paulo ati, “Kuli umuntu umwi wino Felikisi wasya mu ng'anda yaminyololo.

¹⁵ Lino naile ku Yelusalemu, yasimapepo akalamba na ikolo ya Ayuda yamulongwelile imilandu nu kunguzya kuti imuvunuke.

¹⁶ Lelo nayanenyile inti lusi lutambi lwa Ciloma kupingula umuntu wino yalongwela milandu lino atali kuti akomane na yao akumulongwela milandu. Wene pa kutandika alinzile kuti apelwe kasita kakuitaasya pamulandu uno yakumulongwela.

¹⁷ Lino nizile kuno, ntasumvile kasita. Lelo uca katondo nikala pa cilimba ca kupingwila milandu, impela ilamulo kuti yalete Paulo ku cilye.

¹⁸ Lelo lino yasimilandu yakwe imilile yatamulongwelile ciipe nanti cimwi, wakwe vino nelenginye!

¹⁹ Yapazyanyizye sile nawe pamulandu wa mipepele yao nga na pa muntu uwi zina lyakwe Yesu, wino uwafwile. Lelo Paulo akavwanga ukuti ali nu umi.

²⁰ Nemo naposiwe caleka nuzya Paulo ndi angazumila kumutuma ku Yelusalemu kuti akuno akapingwilwe mulandu wakwe.

²¹ Lelo Paulo watalenga kuti asungwe mu ng'anda yaminyololo ukufikila lino mwene Kesa alapingula mulandu wakwe. Caleka napiile ilamulo ukuti asungwe ukufikila lino ndamutuma ku mwene Kesa.”

²² Agilipa anena Fesito ati, “Nani kwene ningatemwa kuvwa ku muntu wii nemwisikulu.” Nawe Fesito amunena ati, “Ulamuvwa mutondo.”

²³ Uwanda walondelela Agilipa na Benise izile nu lulumbi lwa wene lukulu, nga aingila muno yakauvwila milandu, pamwi na yamusika ya asilika nga na aikolo acindame amu musumba. Lyene Fesito apeela ilamulo kuti yalete Paulo.

²⁴ Alino Fesito avwanga ati, “Mwene Agilipa na yonsi ali muno pamwi naswe, mwalola umuntu wii, wino Ayuda yonsi aya kuno nu ku Yelusalemu yati yavwanga ukuti atalingine ukwikala mumi.

²⁵ Lelo nemo ntazanyile ukuti wacita icintu cimwi icakumupingwila ukufwa. Na pakuti umwisikulu walenga kuti mulandu wakwe uye kuli Kesa, nani nelenganya ukumutuma.

²⁶ Lelo ntakweti visinka vimwi vya mulandu vyakuti indembele umwene Kesa. Caleka nati muleta kunuli we mwene Agilipa, pakuti icisila cakulondelezya umulandu wakwe ningo nani inkwate ivyakulemba.

²⁷ Pano citangaloleka ca mano kunondi ukutuma umunyepwe ukwaula ukulondolola imilandu yakwe ningo.”