Milimo 24 - Amazwi Yakwe Leza 2013

¹ Pacisila ca manda yasano Ananiya uwali a simapepo mukulu, aya ku Kesaliya pamwi na aikolo yamwi ni nkonkotela ya masunde, izina lyakwe a Tetulo. Yene imilila inkolelo ya mulasi Felikisi, yalongwela Paulo.

² Lino yaama Paulo, Tetulo atandika kumulongwela ati, “We Musambazi Felikisi! Utunguluzi wako uwa mano watuletela mutende pa manda aingi, nga ni vintu vikutunguluka nu kuzipa mu mpanga itu.

³ Naswe tukazumilizya cii mu mpanga yonsi nu mu nsita zyonsi, nga naswe tukukutaizya cuze.

⁴ Nsikulonda kuti nkusumbile insita, caleka nakulenga ukuti uye nu luse uvwe ku kulanda kwitu mu wipi.

⁵ Twazana ukuti umuntu wii umutalinkane cuze. Akatandika kucita mpanzela mu Ayuda amu nsi yonsi nupya wene intunguluzi ya kaungwe ka ina Nazaleti.

⁶ Wezizye ukukowezya Ng'anda ikulu yakwe Leza, nga naswe tumulema. [Twapangine kumupingula kulingana na masunde itu.

⁷ Lelo Lisiasi musika mukalamba wizile amupokolola sile ku maka kufuma kunotuli

⁸ amuleta kunuli.] Ndi wamuzya muntu wii, wemwisikulu umamanya kufuma kunoli ivintu vyonsi vino tukumulongwela.”

⁹ Ayuda yazumilizya, yalanda ukuti vii vyonsi ivya cumi.

Paulo waiitasya inkolelo ya Mulasi Felikisi

¹⁰ Mulasi akapizya Paulo kuti alande, nawe Paulo avwanga ati, “Namanya ukuti pa myaka iingi wewe ukapingula antu amu luko lwitu. Acino indi nu luzango lwa kuitasya pa manso yako.

¹¹ Mwemwe kwene mungazana cumi cakwe, citalusile pa manda ikumi na yaili apita lino naile ku Yelusalemu ku kupepa.

¹² Ayuda yatatazile yazana tukupazyanya na umwi mu Ng'anda ikulu yakwe Leza, nanti ukukatusya cimvulunganya mu antu, nanti mu ng'anda ya mapepo nanti akumwi kuze mu musumba.

¹³ Yene yatangasininkizya kunomuli milandu ino yakundongwela.

¹⁴ Lelo nkuzumila cii pa manso inu, ukuti nkapepa Leza wa vikolwe vitu pa kulondela inzila ilya ino yakati iyaufi. Lelo nataila na muli vyonsi ivyalembwa mu Masunde yakwe Mose, nu mu mpapulo zyakwe yakasema.

¹⁵ Nakwata upaalilo muli Leza uli umwi na uno yene yakweti, uwakuti antu onsi, asuma na aipe, yalazyukuka kufuma ku afwe.

¹⁶ Caleka nsita zyonsi nkaezya na mano yane kuya na kampingu uwakaele inkolelo yakwe Leza na antu.

¹⁷ “Pacisila ca myaka ingi pano nafumile ku Yelusalemu, nupya naile kweneko kuti ntwalile antu amu luko lwane uwila uno yantumilizye nga na kuti nkapele impolelwa.

¹⁸ Cali pa nsita ino nacitanga cii lino yanzanyile mu Ng'anda ikulu yakwe Leza ala nati mala kucita vya kuisangulula. Ntali pamwi ni umba, nupya kutali icimvulunganya.

¹⁹ Lelo Ayuda yamwi afumile ku muputule wa mpanga ya Asiya apano yali, alio aisikulu yalinzile kuti iize yandongwele mulandu pa manso yako, ndi yakweti mulandu umwi pali nene.

²⁰ Nanti leka antu yaa ali pano yalande mulandu uno yanzanyile nao lino naimi pa manso yakwe yao ali mwi Tengo,

²¹ Lelo cintu conga sile cino nalanzile kunoyali cakuti, ‘Ilelo nkupingulwa pakutaila vino afwe yalazyukuka yaye aumi.’”

²² Lyene Felikisi wamanyile ningo vyonsi vya nzila ya Mwene. Caleka azinyazinya mulandu ati, “Alala Lisiasi, musika mukalamba uwa asilika wiza alino ndaputula mulandu winu.”

²³ Alino apeela ilamulo ku musilika uwasunganga Paulo kuti amusunge ningo lelo atamuyalile nanti kulesya yacuza yakwe kumuletela vyonsi vino angalonda.

Paulo walandana na Felikisi na Dulusila

²⁴ Pacisila ca manda yamwi Felikisi aiiza nu muci wakwe Dulusila, uwali u Muyuda. Alino atuma kuti yaame Paulo kuti auvwe kunoli pamulandu wa utailo muli Yesu Klistu.

²⁵ Lelo lino Paulo watandika kulondolola vya musango wakuya mu wololoke nu kuikanya nga nu kwiza kwa Wanda wa upinguzi, Felikisi auvwa intete nga anena Paulo ati, “Ungapita ndakai. Ndakwama lino ndakwata insita.”

²⁶ Pa kasita kali kamwi kwene wapaalilanga ukuti Paulo angamupeelako ulupiya, acino wamwamilanga lililili ku kulanda nawe.

²⁷ Pacisila ca myaka iili, Polokia Fesito atoola cifulo ca ulasi wakwe Felikisi. Lelo pano Felikisi walondanga kutasiwa na Ayuda, asya Paulo mu ng'anda yaminyololo.