Milimo 21 - Amazwi Yakwe Leza 2013

¹ Lino twapakasyanya nao tupita. Pacisila tucilinganya iziya, tulambila ku Kosi. Pa wanda walondelela tufika ku Lode, nga ukufuma kuku twaile ku Patala.

² Kuku akuno twaile tuzana uwato uwayanga ku Fonisya. Lyene tupatama tupita.

³ Lino twalola cilila ca Kupulo tuya ntunga yaku kaeya, tuya ku Silya. Lyene tuya tupatukila pa Tulo, pano akuno uwato wali nu kupatula katundu.

⁴ Tulonda, tuzanako aina Klistu yamwi, nga twikala nao mulungu onga. Nao Mupasi Wamuzilo ayanena kusoka Paulo kuti atakaye ku Yelusalemu.

⁵ Lino insita yakwikala nao yasila tukatuka, tutwalilila nu lwendo lwitu. Onsi pamwi na yamama yao na ana, yatusukilila kufuma mu musumba kuyafika kunzi. Alino tufukama nu kupepa.

⁶ Lyene tupakasyanya nao, twingila mu wato nga yaswililamo kumwao.

⁷ Tutwalilila nu lwendo lwitu tufuma ku Tulo tuya ku Musumba wa Putolemai, amuno twalamukana na ina itu, nga twikala nao uwanda onga.

⁸ Uwanda walondelela tukatuka tufika ku musumba wa Kesaliya. Tuya ku ng'anda yakwe Filipo kakosola wi Landwe Lisuma, wenga uwamu antu cinimbali asozilwe ku Yelusalemu, twikala nawe.

⁹ Wakweti ana akazyana asimbe yani yao akosolanga Landwe lyakwe Leza.

¹⁰ Twamazileko amanda aingi lino kasema umwi izina lyakwe Agabasi, wizile kufuma ku Yudeya.

¹¹ Alino aiiza kunotuli, asapula musipi wakwe Paulo, umwisikulu ainyepa maulu na makasa, nga avwanga ati, “Avino Mupasi Wamuzilo wavwanga ati vii avino Ayuda aku Yelusalemu yalanyepa umwine musipi uu, nga yamupele mu makasa ya Akulukuwa.”

¹² Lino tuvwa vintu vii, sweswe pamwi na ataile tupapata Paulo kuti ataya ku Yelusalemu.

¹³ Lelo Paulo avwanga ati, “Mukucita cani, ukulila nu kuntezula mwenzo? Ala kusi kunyepwa kutupu kuno naipela, lelo nu kufwa kwene mu Yelusalemu pamulandu wi zina lya Mwene Yesu.”

¹⁴ Twaposiwe kumutonsya. Caleka tusazya tuti, “Lekini kulonda kwa Mwene kucitike.”

¹⁵ Pacisila ca kwikala kweneko manda yamwi, tutola iviya vitu tuya ku Yelusalemu.

¹⁶ Alondezi yamwi aku Kesaliya yapita naswe yatutwala ku ng'anda ya muntu umwi wino zina lyakwe a Manasoni mwina Kupulo uwali mulondezi wa mpiti, akuno tufikila.

Paulo watandalila Yakobo

¹⁷ Lino twafika mu Yelusalemu aina itu yatuzengela ningo.

¹⁸ Uwanda walondelile tupita na Paulo kukulola Yakobo, na aikolo iuvi yonsi apano yali.

¹⁹ Paulo ayalamuka ayalandila vintu vyonsi vino Leza wacita pakasi ka Akulukuwa kupitila mu mulimo wakwe.

²⁰ Pacisila ca kumuvwa, yonsi yalumbanya Leza. Lyene yanena Paulo yati, “Mwina witu Paulo, watulola, vino Ayuda mazimbi aingi yati yataila muli Klistu nga nupya yaipelesya kuyela Masunde yakwe Mose.

²¹ Yuvwa ukuti wasambilizyanga Ayuda yano aikala mu mpanga zya Akulukuwa kuti yasule Masunde yakwe Mose, ala ukuyanena ukuti yatasilamula ana yao nanti ukulondela intambi zya Ayuda.

²² Ukuuvwa kwene yamauvwa ukuti watu wiza. Uzye icani cimacitwa?

²³ Cingazipa ucite vino tumakunena. Pano tuli pali antu yani ati yalaya nu mulapo.

²⁴ Pitini nao mukaisangulule kulingana nu lutambi, uyalipilile pakuti yakayapele inyele ku mitwe yao. Mu musango uu, umuntu wensi alamanya ukuti musi cumi mu vintu vyonsi vino vyalandwa pali wewe, lelo ukuti wemwisikulu wikala kulingana na Masunde yakwe Mose.

²⁵ Lelo pamulandu wa Akulukuwa yano ati yataila, twayatumila kalata uwakuyanena ukuti yatalinzile ukulya icilyo cili consi capeelwa ku tuluwi, nanti kulya uwazi, nanti nyama imwi inyoongwe, nupya yalinzile ukuisunga kufuma ku uzelele.”

²⁶ Alino Paulo asenda antu yaya, na pa wanda uwalondelela aisangulula pamwi nao. Lyene aingila mu Ng'anda ikulu yakwe Leza ukuya yamanyisya pano manda yakusangulula yalasilila, lino yalapeela impolelwa yakwe cila muntu.

Yalema Paulo mu Ng'anda ikulu yakwe Leza

²⁷ Lelo lino amanda cinimbali yali pipi nu kusila, Ayuda yamwi afumile ku mpanga ya Asiya yalola Paulo mu Ng'anda yakwe Leza. Yasongelekanya iumba lyonsi nga yalema Paulo.

²⁸ Yapunda yati, “Mwe ina Izlaeli, twazwini! Wii ali muntu akapita konsi ala akusambilizya wensi ukusula aina Izlaeli, Masunde yakwe Mose, nga ni Ng'anda ii ikulu yakwe Leza. Lyene ndakai wataleta na Akulukuwa kwene mu Ng'anda ikulu yakwe Leza nu kukowezya icifulo camuzilo!” (

²⁹ Yalanzile cii pano yaweni Tulofimo uwafumile ku Efeso, ala yali na Paulo mu musumba nga yelenginye ukuti Paulo wamusenzile nu mu Ng'anda ikulu yakwe Leza.)

³⁰ Icimvulunganya cisalangana monsi mu musumba nga na antu yonsi yasimwilila pamwi, yalema Paulo, yamufumya mu Ng'anda ikulu yakwe Leza. Lilyo kwene milyango ya Ng'anda ikulu yakwe Leza iyalwa.

³¹ Iumba lyalondanga kukoma Paulo lino izwi lyafisile kuli Musika mukalamba wa asilika ya Ciloma ukuti mu Yelusalemu muli mpanzela.

³² Lilyo kwene musika mukalamba akatusya asilika ni ntunguluzi zyao yasimwililako. Lino antu yamulola pamwi na asilika, yata ukuma Paulo.

³³ Lyene musika mukalamba aya kuli Paulo, amulema, nga apeela ilamulo kuti yamunyepe mu minyololo iili. Lyene auzya ati, “Uzye umuntu wii, aweni, nupya icani cino watacita?”

³⁴ Antu yamwi mwi umba yapunda vipusanepusane. Kwali icimvulunganya cakuti musika mukalamba aposiwa kumanya ni cacitike. Caleka apeela ilamulo ku antu yakwe kuti yasende Paulo ku kamba.

³⁵ Lyene lino yafika pamwi nawe pa muimbili, asilika yanyenyemula Paulo pamulandu wakuti iumba lyakalipa cuze.

³⁶ Antu alondelile cisila ala yakulaizya yati, “Mukomini.”

Paulo waitaasya

³⁷ Lino asilika yali pipi nu kumwingizya mu kamba, Paulo auzya musika mukalamba ati, “Uzye ntange mvwange cimwi kunuli?” Musika mukalamba wa asilika amuuzya ati, “Uzye wamanya kuvwanga Cigiliki?

³⁸ Uzye wemo usi mwina Eguputo wiya uwakatukile uteko pa myaka yapita nga nu kutungulula antu mazimbi yani mu lwanga yao ali azanzi.”

³⁹ Paulo amwaasuka ati, “Nene mu Yuda, uwavyalilwe ku Taliso, mu mpanga ya Kilikya nupya nene mwina musumba umumanyike. Napapata leka ndande ku antu.”

⁴⁰ Musika mukalamba amupeela ulusa. Caleka Paulo aimilila pa ciimbili ca ng'anda nga avwangila ku makasa anena antu kuti yamyalale. Lyene lino yamyalala, Paulo avwanga mu Ciyuda.