Milimo 2 - Amazwi Yakwe Leza 2013

¹ Lino wanda wa Pentekosti wafisile, alondezi ala yati yakongana pali pamwi pa cifulo conga.

² Mukupumikizya ciunda cikoline wa cipupu cikulu cuvwika kufuma kwiyulu, nga cilimba ng'anda yonsi muno yatenzi.

³ Lyene yalola cimbilimbili ca moto ciputokele, cikuloleka wa lulimi, ciikala pali cila muntu.

⁴ Alino yonsi yazuziwa na Mupasi Wamuzilo nga cila muntu atandika kuvwanga mu lulimi lwa cilendo kulingana na vino Mupasi wamupeela maka yakuvwanga.

⁵ Mu Yelusalemu mwali Ayuda, yakapepa acindike Leza, yao afumile ku mpanga zyonsi zya muno nsi.

⁶ Lino yuvwa congo, iumba likulu likongana nu kusamwa pano umuntu wensi uvwile ya kuvwanga mu lulimi lwakwe.

⁷ Lyene yonsi yazunguka ciyapezya mano, yati, “Uzye antu yaa yonsi akuvwanga asi aina Galile?

⁸ Uzye caya uli pakuti cila muntu munotuli auvwe yakuvwanga mu lulimi lwa kumwao?

⁹ Yamwi munotuli yafuma ku Patiya, ku Medya, ku Elamu, ku Mesopotamya, ku Yudeya, nga nu ku Kapadokiya. Yamwi nao yafuma ku Ponto nu ku Asiya,

¹⁰ ku Fulugiya nu ku Pamfuliya, nu ku Eguputo nga nu mu mpanga ya Libya pipi nu ku Kuleni. Yamwi munotuli aenyi afuma ku Loma,

¹¹ Ayuda nga na Akulukuwa yao asenukile ku mipepele ya Ciyuda. Yamwi munotuli aina Kulete nga na ina Alabya. Lelo swensi tukuvwa yakuvwanga mu ndimi zitu pamulandu ni vintu vikulu vino Leza wacita.”

¹² Onsi kwene yazunguka yapeziwa mano nga yauzyanya yati, “Uzye cii, cikusenula cani?”

¹³ Yamwi nao yavwanga misowe misowe yati, “Antu ya, yatiyakoleka.”

Petulo wasambilizya antu

¹⁴ Alino Petulo akatuka pamwi na atumwa ikumi na wenga. Lyene asanzika izwi avwanga kwi umba ati, “Mwe Ayuda yanji, na mwensi mwe muno mwikala mu Yelusalemu, uvwini kuno vino cii cikusenula.

¹⁵ Antu yaa yatakolike wakwe vino mukutunganya. Ndakai a 9 koloko nupya kacili a katondo.

¹⁶ Lelo cii cino mwalola acili cino kasema Yoeli wasemile lino wavwanzile ati, Leza wavwanga wati,

¹⁷ ‘Umu manda yampelelekezyo ndapongolwela Mupasi wane pa antu onsi. Ana inu aonsi na anaci yalasema, ana inu alumendo yalalola vilolwa, na ikolo yalalota viloto.

¹⁸ Endi, na pa yaomvi yane kwene, aonsi pali pamwi na anaci, ndapongolwela Mupasi wane mu manda yao, nga nao yalasema.

¹⁹ Ndacita vinjelengwe mwiyulu papela nga ni vilangililo pano pansi, kulaya wazi, moto, ni cifutika ca cunsi.

²⁰ Ilanzi lilasanguka mfinzi, nu mwezi nao ulayenza wa wazi, lino uwanda ukulu wa lulumbi uwa Mwene utacili ufike.

²¹ Lyene alino wensi wino alaama pi zina lya Mwene alatuulwa.’

²² “Mwe ina Izlaeli, uvwini mazwi yaa. Yesu uwaku Nazaleti umuntu wino Leza watumile kuli mwemwe, walangililwe mu vinjelengwe, mu vizungusyo, nga nu mu vilangililo vino Leza wacisile kupitila munoli. Mumanyile vii vyonsi, ukuti ivya cumi pano vyacitike.

²³ Leza, ukulingana nu kulonda nga nu kumanya kwakwe, wasolwile mpiti kuti Yesu apelwe kunomuli, nga namwe mwamukomile apakuleka antu yankota yamutane pa lupanda.

²⁴ Lelo Leza wamusapwile ku kuwaika kwa mfwa, wamuzyukwile kufuma ku afwe, pano imfwa yaposiwe kumucimvya.

²⁵ Davidi wavwanzile pamulandu na aliwe ati, ‘Nalolanga Mwene pipi nani nsita zyonsi pasi angansungutizya pano wene ali kwi kasa lyane lilunji.

²⁶ Caleka mwenzo wane uli ni nsansa, na mazwi yane aluzango pano nanti angala nene mwina kufwa lelo ndi nu upaalilo,

²⁷ pano we Mwene Leza utalansya ku Gehena, nanti kuleka muomvi wako Wamuzilo aole mwi lindi.

²⁸ Wandanga inzila zyakuntwala ku umi, nga nani ndazanga cuze lino wemo waya pipi nani.’

²⁹ “Inane, lekini munene paswe pamulandu wa cikolwe citu Davidi. Wene wafwile, azikwa, ni lindi lyakwe licilipo pakasi kitu ni lelo kwene.

³⁰ Wali akasema nupya wamanyile na cino Leza wamulavile. Leza walavile nu mulapo ukuti alimika umwi uwamu mupanda wakwe ukuya mwene, ndi vino Davidi wali.

³¹ Davidi waweni calimwi cino Leza wali nu kucita, acino wavwanzile pamulandu wa kuzyukuka kwakwe Klistu lino wavwanzile ati, ‘Leza atamutazyezile asyale kuzimo, umwili wakwe utaozile mwi lindi.’

³² Lelo Leza wazyukwile Yesu kufuma ku afwe, naswe sweswe yakambone ya vintu vii.

³³ Wene wakwela nu kwikala kwi kasa lilunji lyakwe Leza, nga wapokelile Mupasi Wamuzilo, kufuma kuli Isi, wakwe vino wamulavile. Na ndakai vii vino mukulola nu kuvwa, uwila wakwe Yesu uno watatuma panotuli.

³⁴ Pano Davidi umwisikulu atakwezile kwiyulu, lelo wavwanzile ati, ‘Umwene wanenyile Umwene wane ati, Ikala kwi kasa lyane lilunji

³⁵ kufika lino ndakucimvizya anisi yako yaye wa cilimba ca ngazo zyako!’

³⁶ “Caleka aina Izlaeli yonsi yalinzile kumanya ningo vino Yesu wii wino mwatanyile pa lupanda awino Leza watacita kuya Umwene na Klistu.”

³⁷ Lino antu yuvwa cii, yasakamala cuze, nga yavwanga kuli Petulo na atumwa yauze, yati, “Mwe ina itu uzye tumacita uli?”

³⁸ Petulo ayanena ati, “Zenzukini, cila muntu, muwatiziwe mwi zina lyakwe Yesu, pakuti maifyo inu yelelwe. Alino mulapokelela uwila uno Leza walaya.

³⁹ Pano ulayo uno Leza walavile uli pali mwemwe na pa ana inu, na pali yano yonsi ali kutali, yano Umwene Leza witu alaama kunoli.”

⁴⁰ Petulo ayasoka mu mazwi nayauze aingi nga nu kupapata ati, “Ituulini mweisikulu ku uvunuko uli nu kwiza pa antu aipe amu mukulo uu ukowele!”

⁴¹ Lino aingi yuvwa ilandwe lyakwe, yalipokelela, nga yawatiziwa. Uwanda kwene ulya antu kulingana na mazimbi yatatu yailundanya kwi umba.

Mwata wa Ina Klistu Ankolelo

⁴² Mu nsita zingi antu yakonkowizye kusambilila ku atumwa, nu kutoola imbali mu utandano nga nu mukumokoola umukate wa wina nga nu mu mapepo.

⁴³ Atumwa yacitanga vinjelengwe ni vizungusyo ivingi icakuti cileta ni ntete ku muntu wensi.

⁴⁴ Lyene ataile yonsi yakonkowezya kuya pamwi mu utandano nu kwankanya vintu vino yakweti kuli cila muntu.

⁴⁵ Yakazyanga vyuma vyao nu kwankanya impiya kuli yonsi kulingana na vino cila muntu ulilwe.

⁴⁶ Uwanda nu wanda yakongananga ku kupepa mu Ng'anda ikulu yakwe Leza. Yalyanga apali pamwi mu mang'anda yao, ukulya cakulya ni myenzo ya luzango ifuke,

⁴⁷ ala yakulumbanya Leza, nu kutemwikwa na antu onsi. Na cila wanda Umwene walundangako kwi umba lyao antu nayauze yano atuulwangwa.