Milimo 19 - Amazwi Yakwe Leza 2013

¹ Lino Apolo wali mu Kolinto, Paulo apita ukusalala mpanga pakasi aiiza ku Efeso. Kuko azanako alondezi yamwi nga

² ayauzya ati, “Uzye mwapokelile Mupasi Wamuzilo lino mwataile?” Nao Yaasuka yati, “Tutatala tuvwa ukuti kwaya Mupasi Wamuzilo.”

³ Paulo ayauzya ati, “Uzye lyene uluwatizyo lwa musango cii luno mwawatiziwe?” Nao yamwasuka yati, “Uluwatizyo lwakwe Yoane.”

⁴ Paulo ati, “Uluwatizyo lwakwe Yoane lwali ulwakwe yao azenzukanga. Yoane wanenyile aina Izlaeli ukutaila muli wenga uwali nu kwiza pacisila cakwe, kuli kuti, muli Yesu.”

⁵ Lino yuvwa cii, yawatiziwe mwi zina lya Mwene Yesu.

⁶ Paulo aika makasa yakwe panoyali, na Mupasi Wamuzilo aikila panoyali, nao yavwangila mu ndimi zipusanepusane nu kukosola ilandwe lyakwe Leza.

⁷ Yali yonsi pamwi antu manye aonsi ikumi na yaili.

⁸ Lyene Paulo aya mu ng'anda ya mapepo ya Ayuda, nga pa myezi itatu avwanga ku antu nu kupama ala akwezya na maka ukuyatonsya pamulandu wa Wene wakwe Leza.

⁹ Lelo yamwi yali akome myenzo, yakana ukutaila, yavwanga viipe pamulandu na mazwi ya Mwene pa manso ya antu onsi. Paulo ayasya apita pamwi na alondezi yaya, nga cila wanda ala yakukomana nu kulanzyanya mwi sukulu lyakwe Tilano.

¹⁰ Wacitanga vikwene kufika na pa myaka iili, na antu yonsi atenzi mu muputule wa mpanga ya Asiya, Ayuda na Akulukuwa kwene, yuvwile izwi lya Mwene.

Vicitwa vyakwe yamwana Sikeva

¹¹ Leza wacitanga vizungusyo ivya kuzunguka kupitila muli Paulo.

¹² Nanti ivitambala, ni nsalu kwene zino wazwalanga ndi yatwala ku alwale, ndwala zyao zipola ni mipasi yankota ifuma munoyali.

¹³ Ayuda yamwi, apitanga ala yakufumya mipasi yankota, nao kwene yezizye ukuomvya izina lya Mwene Yesu pa antu ali ni mipasi yankota. Yavwanga ku mipasi yankota yati, “Tukumupeela ilamulo mwi zina lyakwe Yesu, wino Paulo akakosola, twati fumini.”

¹⁴ Acitanga vii, ana yakalume cinimbali, ana yakwe Sikeva, Simapepo mukulu wa Ayuda.

¹⁵ Lelo umupasi wankota uyavwanzya uti, “Namanya Yesu, namanya ni vya pali Paulo, nga mwemo mwemwe yaweni?”

¹⁶ Lyene umuntu uwali nu mupasi wankota ayazanza na maka ayacimvya onsi. Lyene yonsi kwene yutuka yafuma mu ng'anda yakwe ni nsalu zilepoke, ala iyacisika.

¹⁷ Ayuda na Akulukuwa aikalanga mu Efeso yuvwile pali cii. Lyene yonsi yuvwa intete cuze, nga ni zina lya Mwene Yesu licindikwa cuze.

¹⁸ Yano ataile aingi iiza yazumila nu kuilongwela paswe vino yacisile.

¹⁹ Aingi muli yano acitanga malele yaleta impapulo zyao apali pamwi yazyoca pa manso ya antu. Lino yapenda yazana vino mutengo wakwezyo wali impiya zyakwe siluva mazimbi makumi yasano.

²⁰ Mu musango uu uwa maka amuno mazwi ya Mwene yasalangine kuluta, yaomba umulimo na maka.

Icimvulunganya mu Efeso

²¹ Pacisila cakwe vii, Paulo apanga kuti apite mu mpanga ya Makedoniya na Akaya nga aye ku Yelusalemu. Avwanga ati, “Ndi nafika kweneko, alino indi nu kuya ku Loma.”

²² Alino atuma yakazwa yakwe yaili, Timoti na Elasita ku Makedoniya, wene asyala mu muputule wa mpanga ya Asiya pa nsita imwi.

²³ Cali pa nsita kwene ii lino kwali cimvulunganya mu Efeso pamulandu ni nzila ya Mwene.

²⁴ Muntu umwi uwali kasula, izina lyakwe Demetiliyo uwasulanga siluva apanga vinkolanya vya ng'anda ikulu ya mapepo yakupepelamo Alitemi, leza wao mwanaci. Uculuzi wakwe uu, waletalanga aomvi yakwe muzano ukulu cuze.

²⁵ Caleka aama yonsi pamwi na yano mulimo wakwe wali uli umwi nu wakwao, ayanena ati, “Mwe antu mwe, mwamanya vino ukama witu ukafuma pa mulimo uu.

²⁶ Ndakai, mukuuvwa nu kuilolela mweisikulu vino umuntu wi Paulo akucita. Akuti yaleza apangwa na makasa ya antu yasi yaleza awe, nupya wataongola nu kupuulula antu aingi, muno mu Efeso na konsi mu muputule wa mpanga ya Asiya.

²⁷ Lyene kwati kuya uzanzo wakuti mulimo witu umasulwa. Cisi cico conga, lelo kuli nu uzanzo na uze wakuti ng'anda yakwe leza mwanaci Alitemi mukulu ilaya iyasilesile nu, ukulu wakwe ulasila, wino ali aka leza kakapepwa nu muntu wensi mu Asiya nga nu mu nsi yonsi.”

²⁸ Lino iumba lyuvwile mazwi yaa, lisoka cuze litandika nu kupunda liti, “Mukulu a Alitemi uwaku Efeso!”

²⁹ Kuya cimvulunganya mu musumba onsi. Iumba lilema Gayusi na Alisitako, aina Makedoniya apitanga na Paulo, yayasenda ku ng'anda ya kukonganilamo nanti kucinilamo.

³⁰ Paulo umwisikulu nalwakwe walondanga ukwingila mwi umba, lelo alondezi yamulesya.

³¹ Yamwi amu ntunguluzi zya muputule wa mpanga ya Asiya, yano ali acuza yakwe yamutumila mazwi akumupapata kuti atingila mu ng'anda ya kukonganilamo nanti kucinilamo.

³² Ukongano wao wali uwacimvulunganya. Antu yamwi yapundanga icintu conga, yamwi nao yapunda vyuze, pano aingi munoyali yatamanyile na cino yakonganile.

³³ Antu yamwi yelenginye ukuti Alekizanda ali mwine wa mulandu pano Ayuda ala yati yamukolezya yakumukunkizya. Lyene Alekizanda avwanga ala akuomvya ikasa ku antu ukuti yamyalale, aezya kuivwangila.

³⁴ Lelo lino yamanya vino wene u Muyuda, yapundila capamwi icili cimwi pa nsita ziili yati, “Mukulu a Alitemi uwaku Efeso!”

³⁵ Alino pa kusyalikizya kalemba uwamu musumba pa kumyalalika iumba alinena ati, “Mwe ina Efeso! Muntu wensi wamanya ukuti amu musumba wa Efeso ali yakalolela ya ng'anda ikulu yakwe Alitemi mukulu, nupya ali yakalolela aiwe ilyamuzilo lyaponyile kufuma mwiyulu.

³⁶ Kusi umwi angakana vintu vii. Caleka lyene mulinzile mumyalale nupya mutacita cintu cimwi ciipe.

³⁷ Mwati muleta antu yaa kuno, nanti angala yativile cimwi mu ng'anda zikulu zyakwe leza witu nanti kutuka leza witu mwanaci.

³⁸ Ndi Demetiliyo na aomvi yakwe yali nu mulandu pa muntu umwi, twakwata cilye ca milandu, na yakapingula akuno yali, akuno mungatwala mulandu.

³⁹ Lelo ndi kuli cuze icilusile pali cii cino mukulonda, cilapingulwa mu ukongano wa ikala mpanga.

⁴⁰ Pano pali uzanzo wakupelwa mulandu uze uwakucita mpanzela pali cii cati cicitika ilelo. Kusi nanti ukuipokolola pa mulundu wakweco, nupya tutangalanda ningo umulandu uno cicitikile.”

⁴¹ Lino wamala kuvwanga vii asalanganya iumba.