Milimo 17 - Amazwi Yakwe Leza 2013

¹ Paulo na auze yapita yapuzya mu Amfipolisi nu mu Apoloniya iiza ku Tesalonika, ukwali ng'anda ya mapepo ya Ayuda.

² Lyene ndi vino umwata wakwe wali, Paulo aingila muno yali. Pa Masabata yatatu alanzyanya nao mu malembelo,

³ ala akuyalondolwela nu kuyasinila vino calingine kuti Klistu acule nu kuzyukuka kufuma ku afwe. Paulo ayanena ati, “Yesu kwene wii, wino nkukosola kunomuli ali Klistu.”

⁴ Yamwi munoyali yataila mazwi yailundanya kuli Paulo na Sailasi, nga ni umba lya Agiliki yano apepanga Leza, na anaci acindame, nao kwene yailundanya kunoyali.

⁵ Lelo Ayuda yuvwa uzuwa nga yakonganika antu yamwi asilesile amu misolo atali na mulimo wakuomba yapanga iumba lya mpanzela. Yaponya impanzela mu musumba onsi, yazanza ing'anda ya muntu uwi zina lyakwe Yasoni, umukwezya kulonda Paulo na Sailasi yafumiwe panzi ku antu.

⁶ Lelo lino yatayazanyile, yafumizye Yasoni na yano ataile yayatwala ku ntunguluzi zya musumba, yapunda yati, “Antu yaa yacita icimvulunganya mu misumba yonsi! Ndakai yati iiza nu mu musumba witu kwene,

⁷ na Yasoni uwayasunga mu ng'anda yakwe. Onsi yakavuna masunde ya mwene Kesa, pa kunena antu ukuti kwaya sile Mwene muze wino zina lyakwe a Yesu.”

⁸ Pa mazwi yaa, yavulunginye iumba ni ntunguluzi zya musumba yakatusya mpanzela.

⁹ Lelo ntunguluzi zinena Yasoni na auze kuti yalipile ulupiya sile pakuti yasapulwe, yayate yapite.

Ivyacitike mu Belea

¹⁰ Zuwa lino kwafita, aina yatuma Paulo na Sailasi ku Belea. Lino yafikako, yaya ku ng'anda yamapepo ya Ayuda.

¹¹ Antu ya kuku yene yali atekele kuluta aku Tesalonika. Yakutike kwi landwe nu muzonda, na cila wanda yasambililanga amalembelo pa kusininkizya vino Paulo walandanga ndi vya cumi.

¹² Aingi amuno yali yataila. Na ingi amu anaci acindame Agiliki yataila mu Mwene Yesu.

¹³ Lelo lino Ayuda amu Tesalonika yuvwa ukuti Paulo wakosola mazwi ilandwe lyakwe Leza nu mu Belea kwene, yaya ku kutunkola antu ukuti yapange mpanzela.

¹⁴ Lilyo kwene aina yatuma Paulo kuti aye kuli yemba, lelo Sailasi na Timoti yasyala mu Belea.

¹⁵ Antu asukilile Paulo yamufisizye ku Atena. Alino yaswilila ku Belea na mazwi yano Paulo wayatumilizye akuti Sailasi na Timoti nao yaye zuwa kunoli.

Ivyacitike mu Atena

¹⁶ Paulo walolelanga Sailasi na Timoti mu Atena, cimucuzya mu mwenzo pa kulola vino umusumba wazilemo tuluwi.

¹⁷ Caleka Paulo wayanga kung'anda yamapepo kukulanzyanya na Ayuda na Akulukuwa yao apepanga Leza wacumi, nga nu mumasokoni kwene wacitanga cili conga manda onsi kuli yano wazanangako.

¹⁸ Na antu amano asambilizyanga ivya Epikulio na Sitoiki nao kwene yapazyanya nawe. Yamwi yuzya yati, “Uzye civwangevwange wii umututu amanyile na cino akuvwanga?” Yamwi yazumila yati, “Cikoline kwati akuvwanga pali tuleza twa inamasi.” Yavwanzile cii pano Paulo wakosolanga pamulandu wakwe Yesu na pa kuzyukuka.

¹⁹ Caleka yasenda Paulo yamutwala kwi tengo lyakulanzyanya ilya Aleopago, yamunena yati, “Tungatemwa kumanya pali vino ukusambilizya pano vikuvwika ivipya kunotuli.

²⁰ Ivintu vimwi vino tukuvwa ukulanda vikuvwika ivipya, nga tukulonda ukumanya vino vikusenula.” (

²¹ Pano onsi aikala mu musumba wa Atena na inamasi atenzimo yatemilwe ukusumba utusita twao tonsi mu kuvwanga nu kuvwa amazwi ya pa vintu vipya.)

²² Paulo aimilila pa nkolelo ya cilye ca Aleopago avwanga ati, “Mwe antu amu Atena! Nalola ukuti mwemwe apefi mu musango onsi.

²³ Pano lino natandalanga mu musumba winu nu kulola mu vifulo vino mukapepelamo, nazanyile akavuwa apalembwa ukuti, ‘Kuli Leza wino atamanyikwa.’ Cico cino mukapepa mu kuntamanya, acino ndakai namamulandila.

²⁴ Leza uwaumvile insi na vyonsi ivyayamo, ali mwine wi yulu ni nsi, nupya asyaikala mu ng'anda yakulwa na antu.

²⁵ “Nupya asilonda cimwi cino tungaleta kunoli apakumuombela, pano umwisikulu akapeela umi nu muza ni vintu vyonsi kuli onsi.

²⁶ Ukufuma ku muntu wenga, waumvileko imitundu yonsi iya antu nu kuleka kuti ikale mu nsi yonsi. Wisile utusita utwalinga na yanande ya vifulo vyao vya kwikalamo.

²⁷ Wacisile cii pakuti yamulonda, nanti limwi yamuzane ndi yamumamanta, nanti angala Leza asi kutali naswe;

²⁸ ndi vino umwi walanda wati, ‘Pano munoli twakwata umi, tukapita sweswe antu.’ Cili wakwe vino yakalemba inu ya numbo yati, ‘Pano naswe kwene sweswe ana yakwe!’

²⁹ “Caleka pano sweswe ana yakwe Leza, tutaelenganya vino umwata wakwe Leza ukoline wa ciluwi cakwe zaabu nanti cakwe siluva nanti iwe, icapangwa nu muntu umulamoke.

³⁰ Caleka nsita zyakuntamanya Leza wasulanga kuli vino antu yacitanga. Lelo ndakai watapela ilamulo ku antu yonsi konsikonsi kuti yazenzuke.

³¹ Pano wimika uwanda uno alapingwilapo antu yonsi amu nsi mu wololoke ukupitila muli wino wasola. Wapela icisininkizyo pali wensi pakuzyukula umuntu wilya kufuma ku afwe!”

³² Lino yuvwile Paulo akulanda pa kuzyukuka kufuma ku afwe yamwi yamusoweka, lelo yamwi yamunena yati, “Nupya tungatemwa ukuvwa vino walanda.”

³³ Caleka Paulo afuma mu ukongano.

³⁴ Antu yamwi yailundanya kunoli, yataila. Wenga uwa munoyali a Dionisasi, uwali uwamu cilye ca Aleopago. Kwali nu mwanaci uwi zina lyakwe Damalisi, nga na antu yauze.